សាលាឧទ្ធរណ៍ព្រះសីហនុ នឹងដំណើរការចាប់ពីថ្ងៃ១កញ្ញាទៅ

ច្បាប់ / សិទិ្ធមនុស្ស / តុលាការ

ជាតិ

សាលាឧទ្ធរណ៍ព្រះសីហនុ នឹងដំណើរការចាប់ពីថ្ងៃ១កញ្ញាទៅ

21, Jul 2020 , 9:59 pm

រូបភាព

លោក កើត រិទ្ធ រដ្ឋមន្រ្តីក្រសួងយុត្តិធម៌ ស្ថិតក្នុងអង្គប្រជុំជាមួយសាលាដំបូង និងអយ្យការអមសាលាដំបូងខេត្តបាត់ដំបង កាលពីថ្ងៃទី១០ ខែកក្កដា ឆ្នាំ២០២០ ស្តីពីការពិនិត្យវឌ្ឍនភាពការងារ និងចំណាត់ការលើសំណុំរឿង ក្នុងសាលាដំបូងនិងអយ្យការអមសាលាដំបូងខេត្តបាត់ដំបង

ដោយ: ថ្មីៗ

សាលាឧទ្ធរណ៍តំបន់ព្រះសីហនុ នឹងចាប់ផ្តើមដំណើរជាផ្លូវការ ពីថ្ងៃទី១ ខែកញ្ញា ឆ្នាំ២០២០តទៅ។ នេះបើតាមប្រកាសរបស់លោក កើត រិទ្ធ រដ្ឋមន្ត្រីក្រសួងយុត្តិធម៌ ដែលចេញនៅថ្ងៃទី២១ ខែកក្កដា។

តាមពិត សាលាឧទ្ធរណ៍តំបន់ព្រះសីហនុ ត្រូវដាក់ឲ្យដំណើរការ ស្របនឹងសាលាឧទ្ធរណ៍តំបន់ត្បូងឃ្មុំ និងសាលាឧទ្ធរណ៍តំបន់បាត់ដំបង តាំងពីខែមេសា ឆ្នាំ២០២០មកម្ល៉េះ ប៉ុន្តែ ដោយសារតែពេលនោះ អគារនៃសាលាឧទ្ធរណ៍តំបន់ព្រះសីហនុ មិនទាន់សាងសង់រួចរាល់ ទើបត្រូវពន្យារពេលមកដល់ពេលនេះវិញ។

លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់សារព័ត៌មានថ្មីៗ តាមទូរសព្ទ័ថា ដល់ខែកញ្ញា ឆ្នាំ២០២០ អគារសាលាឧទ្ធរណ៍តំបន់ព្រះសីហនុ នឹងអាចសាងសង់រួចរាល់ ហើយនឹងអាចចាប់ផ្តើមបើកដំណើរការបាន។

លោក លើកឡើងថា ប្រធាន អនុប្រធាន ចៅក្រម អគ្គព្រះរាជអាជ្ញា អគ្គព្រះរាជអាជ្ញារង ក្រឡាបញ្ជី និង មន្ត្រីរដ្ឋបាលផ្សេងទៀតនៃសាលាឧទ្ធរណ៍តំបន់ទាំង៣ ត្រូវបានតែងតាំងរួចរាល់ហើយ។ យ៉ាងណា លោក អះអាងថា អាចនឹងមានការតែងតាំងមន្ត្រីមួយចំនួនតាមក្រោយទៀត។

ពីមុន កម្ពុជា មានសាលាឧទ្ធរណ៍ភ្នំពេញតែមួយប៉ុណ្ណោះ គឺស្ថិតក្នុងបរិវេណនៃក្រសួងយុត្តិធម៌ នៅមុខព្រះបរមរាជវាំង ។ តែបច្ចុប្បន្ន សាលាឧទ្ធរណ៍ ត្រូវបានបង្កើតឡើង៣បន្ថែមទៀត។

សាលាឧទ្ធរណ៍ភ្នំពេញ និងមហាអយ្យការអមសាលាឧទ្ធរណ៍ភ្នំពេញ ក្តោបសំណុំរឿងក្នុងរាជធានីភ្នំពេញ ខេត្តកណ្តាល និង សំណុំរឿងដែលតុលាការកំពូល ទម្លាក់មកឲ្យវិញ។

លោក យូ ប៊ុនឡេង ជាប្រធានសាលាឧទ្ធរណ៍ភ្នំពេញ ហើយលោក អ៊ុំ សេងស៊ីវុត្ថា ជាអនុប្រធាន។

សាលាឧទ្ធរណ៍តំបន់ព្រះសីហនុ និងមហាអយ្យការអមសាលាឧទ្ធរណ៍តំបន់ព្រះសីហនុ ទទួលខុសត្រូវលើសំណុំរឿង ដែលកើតនៅ៥ខេត្ត គឺខេត្តព្រះសីហនុ តាកែវ កំពត កំពង់ស្ពឺ និងកោះកុង។

លោក សុខ កល្យាណ ជាប្រធានសាលាឧទ្ធរណ៍តំបន់ព្រះសីហនុ ឯលោក អ៊ិន ម៉ានិត្យ ជាអនុប្រធាន។

សាលាឧទ្ធរណ៍តំបន់ត្បូងឃ្មុំ និងមហាអយ្យការអមសាលាឧទ្ធរណ៍តំបន់ត្បូងឃ្មុំ ទទួលបន្ទុកលើសំណុំរឿង ដែលកើតនៅបណ្តាខេត្តចំនួន១០ រួមមានខេត្តត្បូងឃ្មុំផ្ទាល់ ខេត្តកំពង់ចាម កំពង់ធំ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ព្រៃវែង និងស្វាយរៀង។

លោក ម៉ុង មុនីចរិយា គឺជាប្រធានសាលាឧទ្ធរណ៍ត្បូងឃ្មុំ ដោយមានលោក វ៉េង ប៊ុនធឿន ជាអនុប្រធាន។

សំណុំរឿង ដែលអាចបញ្ជូនបន្តទៅសាលាឧទ្ធរណ៍តំបន់បាត់ដំបង និងមហាអយ្យការអមសាលាឧទ្ធរណ៍តំបន់បាត់ដំបង គឺជាសំណុំរឿង ដែលកើតនៅ៧ខេត្ត គឺខេត្តបាត់ដំបង កំពង់ឆ្នាំង ពោធិ៍សាត់ ប៉ៃលិន បន្ទាយមានជ័យ ឧត្តរមានជ័យ និងសៀមរាប។

នៅសាលាឧទ្ធរណ៍បាត់ដំបង គឺលោក សម ប៊ុនថុន ជាប្រធាន ហើយលោក ធូ មណី ជាអនុប្រធាន។

ការបង្កើតសាលាឧទ្ធរណ៍បន្ថែមនេះ គឺរដ្ឋាភិបាល ចង់បង្ខិតសេវាយុត្តិធម៌ ឲ្យកាន់តែទៅជិតប្រជាពលរដ្ឋ៕