នេប៉ាល់ នឹងបើកជើងហោះហើរអន្តរជាតិឡើងវិញ ដើម្បីជំរុញវិស័យទេសចរណ៍

COVID-19

អន្តរជាតិ

នេប៉ាល់ នឹងបើកជើងហោះហើរអន្តរជាតិឡើងវិញ ដើម្បីជំរុញវិស័យទេសចរណ៍

22, Jul 2020 , 8:29 am

រូបភាព

ព្រលានយន្តហោះអន្តរជាតិ Tribhuvan ក្នុងប្រទេស នេប៉ាល់ (The Himalayan Times)

ដោយ:

រដ្ឋាភិបាលនេប៉ាល់ នៅថ្ងៃទី ២១ ខែកក្កដា បានប្រកាសថា ខ្លួននឹងបើកដំណើរការជើងហោះហើរអន្តរជាតិឡើងវិញ នៅពាក់កណ្ដាលខែសីហាខាងមុខ ក្នុងគោលដៅជំរុញវិស័យទេសចរណ៍ដែលរងគ្រោះដោយសារ COVID-19 ។

នេប៉ាល់ដែលជាប្រជាជាតិក្នុងតំបន់អាស៊ីខាងត្បូង បានបិទព្រលានយន្តហោះខ្លួន ចាប់តាំងពីចុងខែមីនា ដើម្បីប្រយុទ្ធនឹងការរាលដាល COVID-19 ដែលមកដល់ពេលនេះបានចម្លងមនុស្ស១៧ ៨៤៤នាក់ ហើយសម្លាប់៤០នាក់ក្នុងប្រទេសនេះ។ ការបិទនេះ បានប៉ះពាល់ធ្ងន់ធ្ងរដល់វិស័យទេសចរណ៍ដែលជាវិស័យដ៏សំខាន់មួយរបស់សេដ្ឋកិច្ចប្រទេសនេះ។

តាមការចុះផ្សាយរបស់ទីភ្នាក់ងារព័ត៌មាន AFP រដ្ឋមន្ត្រីទេសចរណ៍ និងអាកាសចរណ៍ស៊ីវិលនេប៉ាល់ Yogesh Bhattarai អះអាងថា ការសម្រេចចិត្តបើកជើងហោះហើរទាំងក្នុងស្រុកនិងអន្តរជាតិជាថ្មីចាប់ពីថ្ងៃទី១៧ ខែសីហានេះ ត្រូវបានលើកឡើងក្នុងកិច្ចប្រជុំគណៈរដ្ឋមន្ត្រីមួយ កាលពីថ្ងៃទី ២០ ខែកក្កដា។

«ខាងក្រសួងកំពុងធ្វើការលើវិធានសុវត្ថិភាពសម្រាប់ការគ្រប់គ្រងព្រលានយន្តហោះ ប្រតិបត្តិករជើងហោះហើរ និងអ្នកដំណើរសម្រាប់គោលបំណងនេះ»។ លោករដ្ឋមន្ត្រី និយាយដូច្នេះ ដោយបន្ថែមថា រាល់អ្នកដំណើរដែលមកដល់ និងចាកចេញ នឹងតម្រូវឲ្យមានលិខិតបញ្ជាក់ថា ពួកគេគ្មានជំងឺ COVID-19 ។

ម្យ៉ាងទៀត លោក Bhattarai លើកឡើងថា អ្នកដំណើរដែលមកដល់ទឹកដីនេប៉ាល់ ក៏នឹងតម្រូវឲ្យធ្វើចត្តាឡីស័កផងដែរ ។ ក៏ប៉ុន្តែលោកពុំបានបញ្ជាក់ពេលវេលាជាក់លាក់នៃការធ្វើចត្តាឡីស័កឡើយ។

យោងតាមរបាយការណ៍របស់រដ្ឋាភិបាល នេប៉ាល់ ប្រមាណ១ភាគ៣នៃអ្នកដំណើរសរុបទាំង១,២លាននាក់ដែលទៅលេងកម្សាន្តនៅនេប៉ាល់កាលពីឆ្នាំមុន គឺស្ថិតក្នុងអំឡុងរដូវស្លឹកឈើជ្រុះ (ចន្លោះពីថ្ងៃទី២២ កញ្ញា ដល់ ថ្ងៃទី ២១ ធ្នូ)។ អ្នកទេសចរទាំងនោះ គឺភាគច្រើនជាអ្នកចូលចិត្តដើរកម្សាន្តតាមព្រៃភ្នំ៕