COVID-19
អន្តរជាតិ
ប្រទេសអឺរ៉ុប ឯកភាពលើកញ្ចប់លុយ៨៥៨ពាន់លានដុល្លារដើម្បីងើបចេញពីវិបត្តិ COVID-19 ប្រធានគណៈកម្មការអឺរ៉ុប អឺស៊ុឡា វ៉ុន ដឺ លៃអេន ជល់កែងដៃជាមួយប្រធានក្រុមប្រឹក្សាអឺរ៉ុប ឆាល មីឈែល ក្រោយរដ្ឋសមាជិកឯកភាពលើកញ្ចប់ថវិកាស្រោចស្រង់សេដ្ឋកិច្ច។ រូបភាព AFP
× រដ្ឋសមាជិកអឺរ៉ុប ត្រូចំណាយពេលដល់ទៅបួនយប់បួនថ្ងៃដើម្បីអនុម័តកញ្ចប់ថវិកាដ៏ច្រើនសម្បើម សំដៅជួយស្រោចស្រង់សេដ្ឋកិច្ចចេញពីវិបត្តិ COVID-19 ។ មេដឹកនាំសហភាពអឺរ៉ុប បង្ហាញក្ដីរីករាយចំពោះការយល់ព្រមលើកញ្ចប់ទឹកប្រាក់ដែលត្រូវផ្ដល់រហស្សនាមថា ផែនការម៉ាសាល់សម័យ COVID-19 ដែលកើតចេញពីការប្រឹងប្រែងខ្លាំងក្លារបស់អាល្លឺម៉ង់ និងបារាំង ព្រោះរដ្ឋសមាជិកខ្លះមិនចង់ចាយលុយច្រើនសម្រាប់ស្ថានការណ៍បច្ចុប្បន្ន។
កញ្ចប់ទឹកដ៏ច្រើនសន្ធឹកសន្ធាប់ចំនួន៧៥០ពាន់លានអឺរ៉ូ ស្មើនឹង៨៥៨ពាន់លានដុល្លារ ត្រូវបានអនុម័តដោយមេដឹកនាំរដ្ឋសមាជិកទាំង២៧ នៅថ្ងៃទី២១ ខែកក្កដា ក្រោយការចរចាយ៉ាងតឹងតែងដែលចាប់ផ្ដើមនៅចុងសប្ដាហ៍មុន។ ប្រធានាធិបតីបារាំង អេម៉ានុយអែល ម៉ាក្រុង គំរាមដើរចេញពីកិច្ចប្រជុំ ដោយសារខឹងមេដឹកនាំរដ្ឋសមាជិកខ្លះជំទាស់ការចំណាយច្រើនបែបនេះ។
ប្រធានក្រុមប្រឹក្សាអឺរ៉ុប ឆាល មីឈែល ដែលដឹកនាំកិច្ចប្រជុំប៉ុន្មានថ្ងៃមកនេះ បានបង្ហាញក្ដីរីករាយចំពោះលទ្ធផលនេះ។ លោកនិយាយថា៖ «នេះជាការចរចាដ៏លំបាកក្នុងពេលដ៏លំបាកសម្រាប់ប្រជាជនអឺរ៉ុប ហើយចាត់ទុកជំនួបកំពូលបួនថ្ងៃនេះ ជាការរត់ម៉ារ៉ាតុនដែលប្រជាជនអឺរ៉ុបមកពី២៧ប្រទេស ទទួលជោគជ័យដូចគ្នា។»
បើតាមទីភ្នាក់ងារព័ត៌មាន AFP លោក ម៉ាក្រុង និងអធិការបតីអាល្លឺម៉ង់ អែនជែឡា មឺហ្គែល ប្រឹងប្រែងខ្លាំងក្នុងការរកច្រកចេញ ព្រោះកញ្ចប់ថវិកាស្រោចស្រង់នេះ រងការជំទាស់ពីហូឡង់ អូទ្រីស ស៊ុយអែត ហ្វាំងឡង់ និងដាណឺម៉ាកដែលមានជំហរមិនចង់ចាយលុយច្រើន។ ក្នុងសន្និសីទសារព័ត៌មានជាមួយលោកស្រី មឺហ្គែល ក្រោយកិច្ចប្រជុំនៅទីក្រុងព្រុចសែល លោក ម៉ាក្រុង បានហៅលទ្ធផលនេះជាការផ្លាស់ប្ដូរជាប្រវត្តិសាស្ត្រមួយ។
ក្នុងកញ្ចប់លុយនេះ ទឹកប្រាក់ចំនួន៣៩០ពាន់លានដុល្លារ នឹងស្ថិតក្រោមទម្រង់ជាជំនួយសម្រាប់ប្រទេសរងគ្រោះដោយសារ COVID-19 ។ ទំហំទឹកប្រាក់នេះ ទាបជាងសំណើរបស់បារាំង និងអាល្លឺម៉ង់ដែលចង់បាន៥០០ពាន់លានដុល្លារ។ ទឹកប្រាក់ចំនួន៣៦០ពាន់លានដុល្លារទៀត គឺជាកម្ចី។ អេស្ប៉ាញ និងអ៊ីតាលីដែលរងគ្រោះខ្លាំងដោយជំងឺមួយនេះ ស្ថិតក្នុងចំណោមរដ្ឋសមាជិកដែលទទួលបានកម្ចីច្រើនពីកញ្ចប់ជំនួយនេះ។
នាយករដ្ឋមន្ត្រីអេស្ប៉ាញ ផេដ្រូ សាន់ឆេស ចាត់ទុកទឹកប្រាក់នេះជាផែនការម៉ាសាល់សម្រាប់អឺរ៉ុប។ លោកអះអាងថា កញ្ចប់ទឹកប្រាក់នេះ នឹងជួយសេដ្ឋកិច្ចយ៉ាប់យ៉ឺនរបស់អេស្ប៉ាញឲ្យបានខ្លាំងក្លានៅរយៈពេល៦ឆ្នាំបន្ទាប់។ ប៉ុន្តែនាយករដ្ឋមន្ត្រីហូឡង់ ម៉ាក រូត ព្រមានថា ការចេញទឹកប្រាក់តែម្ដងនេះ មិនមានលើកទីពីរឡើយ។
រដ្ឋសមាជិកនឹងមិនអាចប្រើប្រាស់ថវិកានេះតាមអំពើចិត្តដែរ។ ការប្រើប្រាស់លុយជំនួយនេះ នឹងស្ថិតក្រោមការត្រួតពិនិត្យតឹងរ៉ឹង ហើយត្រូវស្របតាមគោលនយោបាយរបស់អឺរ៉ុបដូចជាកំណែទម្រង់សេដ្ឋកិច្ច និងបញ្ហាបរិស្ថានផងដែរ៕
© រក្សាសិទ្ធិដោយ thmeythmey.com