អន្តរជាតិ
អាមេរិក ផ្ដល់រង្វាន់៥លានដុល្លារសម្រាប់ដំណឹងឈានដល់ការចាប់ប្រធានតុលាការកំពូលវ៉េណេស៊ុយអេឡា
ប្រធានតុលាការកំពូលវ៉េណេស៊ុយអេឡា លោក Maikal Moreno Perez និងប្រធានាធិបតីលោក នីកូឡាស់ ម៉ាឌុយរ៉ូ ។ រូបភាព Reuters
×![]()
ក្រសួងការបរទេសអាមេរិក បានប្រកាសផ្ដល់ប្រាក់រង្វាន់រហូតដល់៥លានដុល្លារ សម្រាប់ព័ត៌មានឈានដល់ការចាប់ខ្លួន ប្រធានតុលាការកំពូលវ៉េណេស៊ុយអេឡា លោក Maikal Jose Moreno Perez ។ បច្ចុប្បន្ន លោក Perez ត្រូវអាមេរិកចោទថា លាងលុយកខ្វក់។ 
ក្នុងសេចក្តីថ្លែងការណ៍ នៅថ្ងៃទី ២១ ខែកក្កដា រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ និយាយថា លោក Perez បានប្រព្រឹត្តអំពើពុករលួយ ក្រោមរូបភាពទទួលសំណូកទាំងជាលុយ ឬទ្រព្យសម្បត្តិ ជាថ្នូរនឹងការកែប្រែលទ្ធផលសំណុំរឿងដែលលោកទទួលបន្ទុកក្នុងពេលជាច្រើនឆ្នាំមកនេះ។
«លោក Perez បានស៊ីសំណូកជាថ្នូរនឹងការប្រើអំណាចតុលាការក្នុងរឿងក្តីជាង២០ករណី ដូចជា បញ្ជាឲ្យចៅក្រមសាលាឧទ្ទរណ៍ដោះលែងជនជាប់ចោទ ឬទម្លាក់ចោលរឿងក្តីជាដើម»។ លោករដ្ឋមន្ត្រី ប៉ុមប៉េអូ និយាយដូច្នេះ។
តាមការចុះផ្សាយរបស់ទីភ្នាក់ងារព័ត៌មាន AFP ប្រមុខការទូតអាមេរិករូបនេះ អះអាងថា ការផ្ដល់ប្រាក់រង្វាន់តាមប្រមាញ់បុគ្គលរូបនេះ គឺបង្ហាញជំហរម៉ឺងម៉ាត់របស់ក្រុងវ៉ាស៊ីនតោនក្នុងការប្រយុទ្ធប្រឆាំងអំពើពុករលួយ និងឧក្រិដ្ឋកម្មឆ្លងដែនជាប្រព័ន្ធនៅវ៉េណេស៊ុយអេឡា។
បន្ថែមពីលើនេះ ប្រធានតុលាការកំពូល Moreno Perez ដែលជាប់ឈ្មោះក្នុងបញ្ជីខ្មៅរបស់ក្រសួងរតនាគារអាមេរិក ចាប់តាំងពីឧសភា ឆ្នាំ២០១៧ ត្រូវបានដាក់បញ្ចូលក្នុងបញ្ជីខ្មៅដាច់ដោយឡែកមួយទៀតរបស់ក្រសួងការបរទេស នៅថ្ងៃទី២១ ខែកក្កដា ជាមួយភរិយាលោក ពាក់ព័ន្ធប្រព្រឹត្តអំពើពុករលួចធ្ងន់ធ្ងរ។ នេះមានន័យថា ប្តីប្រពន្ធមួយគូនេះ លែងអាចជាន់ទឹកដីអាមេរិកជារៀងរហូត។
មែនទែនទៅ រដ្ឋបាលប្រធានាធិបតីអាមេរិក ដូណាល់ ត្រាំ កាលពីថ្មីៗនេះ បានបង្កើនការដាក់សម្ពាធកាន់តែខ្លាំងលើមេដឹកនាំវ៉េណេស៊ុយអេឡា លោក នីកូឡាស់ ម៉ាឌុយរ៉ូ និងដៃជើងរបស់លោក។ មេតុលាការកំពូលខាងលើ គឺជាមនុស្សជំនិតរបស់លោក ម៉ាឌុយរ៉ូ ។ ក្រុងវ៉ាស៊ីនតោន លែងទទួលស្គាល់លោក ម៉ាឌុយរូ ជាប្រធានាធិបតីនៃប្រទេសហ៊ុមព័ន្ធដោយវិបត្តិមួយនេះ ហើយក៏ព្យាយាមទម្លាក់លោកពីអំណាចផងដែរ៕
Tag:
សហរដ្ឋអាមេរិក
វ៉េណេស៊ុយអេឡា
© រក្សាសិទ្ធិដោយ thmeythmey.com
