កសិដ្ឋានចិញ្ចឹមគោ មាន់ និងទា នៅកំពង់ចាម នឹងបង្កើតការងារជិត១៥០កន្លែង

ជាតិ

សេដ្ឋកិច្ច

កសិដ្ឋានចិញ្ចឹមគោ មាន់ និងទា នៅកំពង់ចាម នឹងបង្កើតការងារជិត១៥០កន្លែង

23, Jul 2020 , 8:59 am

រូបភាព

រូបៈ ក្រសួងកសិកម្ម

ដោយ: សែម វណ្ណា (Sem Vanna)

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ២០ ខែកក្កដា បានអនុម័តគម្រោងកសិដ្ឋានចិញ្ចឹមសត្វ គោ មាន់ និងទា ថ្មីមួយ ដែលមានតម្លៃវិនិយោគចុះបញ្ជីរហូតដល់ទៅជិត៣២លានដុល្លារអាមេរិក និងអាចបង្កើតការងារចំនួន ១៤៤កន្លែង។

បើតាម CDC ក្រុមហ៊ុនវិនិយោគកសិដ្ឋាននេះ មានឈ្មោះ KANG HWA E & C (CAMBODIA) CO., LTD ដែលមានទីតាំងវិនិយោគស្ថិតនៅភូមិកកោះ ឃុំត្រពាំងព្រះ ស្រុកព្រៃឈរ ខេត្តកំពង់ចាម។ ក្រៅពី បង្កើតកសិដ្ឋានចិញ្ចឹមសត្វ ក្រុមហ៊ុននេះ ក៏បង្កើតរោងចក្រកែច្នៃ និងបង្កើតស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យកម្លាំង ៤,៥មេហ្គាវ៉ាត់ ដើម្បីទុកសម្រាប់ប្រើប្រាស់ក្នុងកសិដ្ឋាន។

កន្លងមក រដ្ឋាភិបាលកម្ពុជា បានជំរុញឱ្យកសិករទាំងអស់ ខិតខំបង្កើនផល ដើម្បីផ្គត់ផ្គង់តម្រូវការក្នុងស្រុក ដើម្បីកាត់បន្ថយការនាំចូលសត្វ។ កម្ពុជា មានតម្រូវការសាច់ជាង ២៩ម៉ឺនតោនក្នុងមួយឆ្នាំ ខណៈដែលកម្ពុជាអាចផ្គត់ផ្គង់ក្នុងស្រុកខ្លួនឯង បានជាង២៣ម៉ឺនតោន ដែលស្មើ៨២ភាគារយប៉ុណ្ណោះ៕