COVID-19
អន្តរជាតិ
ថៃ នឹងបន្តស្ថានភាពអាសន្ន១ខែទៀត ទោះគ្មានការឆ្លង COVID-19 ក្នុងស្រុកជិតពីរខែ រូបភាព៖ Reuters
× មជ្ឈមណ្ឌលគ្រប់គ្រងស្ថានការណ៍COVID-19 (CCSA) របស់ថៃ នៅថ្ងៃទី២២ ខែកក្កដា សម្រេចបន្តដាក់ប្រទេសក្នុងស្ថានភាពអាសន្នរយៈពេល ១ខែទៀត។ សេចក្តីសេចក្តីសម្រេចនេះ នឹងដាក់ទៅរដ្ឋាភិបាលថៃនៅសប្តាហ៍ក្រោយ ដើម្បីអនុម័តជាផ្លូវការ។
ប្រសិនគ្មានការប្រែប្រួលទេ សេចក្តីសម្រេចរបស់មជ្ឈមណ្ឌលគ្រប់គ្រងស្ថានការណ៍COVID-19 ដែលស្នើឲ្យដាក់ប្រទេសក្នុងស្ថានភាពអាសន្ន១ខែទៀត នឹងដាក់ទៅគណៈរដ្ឋមន្ត្រីថៃនៅសប្តាហ៍ក្រោយ ដើម្បីអនុម័ត ខណៈពេលថៃ មិនមានករណីឆ្លង COVID-19 នៅក្នុងប្រទេសជាច្រើនថ្ងៃ។ មួយរយៈចុងក្រោយ ថៃ មានករណីឆ្លងថ្មីដែលសុទ្ធតែជាករណីនាំចូលពីបរទេស និងអ្នកដែលស្នាក់នៅដាក់នៅមជ្ឈមណ្ឌលចត្តាឡីស័ក។ ចំនួនករណី COVID-19 របស់ថៃមានចំនួន ៣២៦១នាក់ និងអ្នកស្លាប់មានចំនួន ៥៨នាក់។
ការបន្តស្ថានភាពអាសន្នដែលត្រូវចប់នៅថ្ងៃទី៣១ ខែកក្កដា ធ្វើឡើងដើម្បីទប់ស្កាត់ការរាតត្បាតនៃជំងឺ COVID-19 និងការពារសុវត្ថិភាពប្រជាជន។ នេះបើតាមការបញ្ជាក់របស់លោក Somsak Rungsita អគ្គលេខាធិការក្រុមប្រឹក្សាសន្តិសុខជាតិ។ ដើម្បីសង្គ្រោះសេដ្ឋកិច្ចរបស់ខ្លួន ថៃ ក៏បានចាប់ផ្តើមបើកប្រទេសបណ្តើរៗ និងអនុញ្ញាតឲ្យជនបរទេសចូលមកក្នុងប្រទេសដែរ ដោយមានភ្ជាប់លក្ខខណ្ឌមួយចំនួន។
យ៉ាងណាក៏ដោយ ការបន្តដាក់ប្រទេសក្នុងស្ថានភាពអាសន្ននេះ ត្រូវបានអ្នករិះគន់មួយចំនួនមើលឃើញថា អាចជាឧបករណ៍ដើម្បីគ្រប់គ្រងបាតុកម្មនៅក្នុងប្រទេស។ នៅចុងសប្ដាហ៍មុន និងដើមសប្ដាហ៍នេះ បាតុកម្មបានផ្ទុះឡើងជាថ្មីដែលបានទាមទារឲ្យរំលាយសភា បញ្ចប់ការបៀតបៀនលើអ្នករិះគន់រដ្ឋាភិបាល ធ្វើវិសោធនកម្មរដ្ឋធម្មនុញ្ញឡើងវិញ និងទាមទារឲ្យនាយករដ្ឋមន្ត្រីចុះចេញពីតំណែង។
ពាក់ព័ន្ធនឹងបញ្ហានេះ លោក ប្រាយុទ្ធ ចន្ទអូចា បានលើកឡើងនៅមុនសេចក្តីសម្រេចរបស់មជ្ឈមណ្ឌលគ្រប់គ្រងស្ថានការណ៍ COVID-19 យ៉ាងដូច្នេះថា៖ « រដ្ឋាភិបាល មិនបំពានអនុក្រឹត្យស្តីពីស្ថានភាពអាសន្ន យកទៅប្រឆាំងក្រុមបាតុករថៃឡើយ»។ ប៉ុន្តែប្រមុខរដ្ឋាភិបាលថៃរូបនេះ បានព្រមានក្រុមបាតុករឲ្យប្រយ័ត្ន និងជៀសវាងការបំពានច្បាប់ស្តីពីការដាក់ទោសការប្រមាថព្រះមហាក្សត្រ។ នេះបើតាមការចុះផ្សាយរបស់កាសែតបាងកកប៉ុស្តិ៍។
ទាក់ទងភាពអាសន្នវិញ លោក Rungsita បានអះអាងថា ប្រសិនបើសំណើបន្តដាក់ប្រទេសក្នុងស្ថានភាពអាសន្នត្រូវរដ្ឋាភិបាលអនុម័ត រាល់ការហាមឃាត់លើសកម្មភាពជួបប្រជុំជាសាធារណៈ ដែលមានចែងក្នុងអនុក្រិត្យស្តីពីស្ថានភាពអាសន្ន នឹងមិនត្រូវយកមកប្រើប្រាស់ឡើយ។ ប៉ុន្តែរដ្ឋាភិបាលថៃ អាចនឹងប្រើច្បាប់ពាក់ព័ន្ធនឹងសកម្មភាពជួបប្រជុំជាសាធារណៈផ្សេងទៀត មកជំនួសវិញ៕
© រក្សាសិទ្ធិដោយ thmeythmey.com