COVID-19
អន្តរជាតិ
កំណត់ត្រា! ត្រឹម២៤ម៉ោង លោក Jeff Bezos ថៅកែ Amazon មានចំណូល១៣ពាន់លានដុល្លារ លោក Jeff Bezos នាអំឡុងពេលធ្វើដំណើរទៅដល់ក្រុងញូវដេលី ប្រទេសឥណ្ឌា កន្លងមក។ រូបថត រ៉យទ័រ
× អំឡុងនៃវិបត្តិកូវីដ-១៩ ការបញ្ជាទិញតាមអនឡាញតាមរយៈក្រុមហ៊ុន Amazon បានកើនឡើងយ៉ាងគំហុក។ ម្ចាស់ក្រុមហ៊ុន លោក Jeff Bezos ក៏មានទ្រព្យសម្បត្តិកាន់តែលើសមុនផងដែរ បន្ទាប់ពីរកចំណូលរហូតដល់ទៅ១៣ពាន់លានដុល្លារអាមេរិកក្នុងរយៈពេលត្រឹមតែ២៤ម៉ោងប៉ុណ្ណោះ កាលពីថ្ងៃទី២០ ខែកក្កដា។ តាមការផ្សាយរបស់ Capital ចំណូលទាំងនេះ គឺជាកំណត់ត្រាដំបូងបំផុត បើគិតចាប់តាំងពីការបង្កើតសទស្សន៍ Bloomberg Billionaires នៅឆ្នាំ២០១២មក។
ភាគហ៊ុនក្រុមហ៊ុន Amazon របស់លោក Jeff Bezos បានកើនឡើងជាលំដាប់ ដោយឡើងដល់៧.៩ភាគរយ ដែលជាកម្រិតខ្ពស់បំផុតចាប់ពីខែធ្នូ ឆ្នាំ២០១៨។ ការបិទភោជនីយដ្ឋាន ហាងទំនិញ និងទីផ្សារទំនើបផ្សេងៗ បាននាំឲ្យមានការបញ្ជាទិញទំនិញអនឡាញដ៏ច្រើនសន្ធឹកសន្ធាប់ ខណៈមនុស្សជាច្រើនត្រូវរស់នៅក្រោមវិធានចត្តាឡីស័កក្នុងផ្ទះដោយខ្លួនឯង។
ចន្លោះពីខែមីនា ដល់ខែឧសភា ទ្រព្យសម្បត្តិរបស់មហាសេដ្ឋីអាមេរិក ឡើងជាង៣០ភាគរយ ហើយភាគហ៊ុនគាត់នៅ Amazon ឡើង៤៥ភាគរយ។ នេះបើតាមរបាយការណ៍របស់ Americans for Tax Fairness និងវិទ្យាស្ថាន Institute for Policy Studies Program for Inequality របស់សហរដ្ឋអាមេរិក។
ឈានដល់វ័យ៥៦ឆ្នាំ លោក Bezos ជាមនុស្សដែលមានជាងគេលើពិភពលោកជាមួយទ្រព្យសម្បត្តិ ១៨៩.៣ពាន់លានដុល្លារអាមេរិក ដោយនាំមុខលោក Bill Gates នៃក្រុមហ៊ុន Microsoft (១១៨ពាន់លានដុល្លារ) និងលោក Bernard Arnault នៃក្រុមហ៊ុន LVMH (៩៤.៧ពាន់លានដុល្លារ)។
ជាមួយគ្នានេះផងដែរ លោកស្រី MacKenzie Bezos ដែលជាអតីតភរិយារបស់លោក ក៏ទទួលបានភាគលាភពីចំណូលដ៏មហាសាលផងដែរ។ យោងតាម Capital ជាមួយភាគហ៊ុន៤ភាគរយនៅ Amazon អ្នកស្រី MacKenzie បានចំណូលបន្ថែម៤.៦ពាន់លានដុល្លារ ហើយបច្ចុប្បន្នជាស្ត្រីទី២ដែលមានជាងគេលើលោក (៦២ពាន់លានដុល្លារ) បន្ទាប់ម្ចាស់ក្រុមហ៊ុន L’Oreal គឺលោកស្រី Francois Bettencourt Meyers (៦៦.៧ពាន់លានដុល្លារ)៕
Tag:
មហាសេដ្ឋី
Jeff Bezos
© រក្សាសិទ្ធិដោយ thmeythmey.com