COVID-19
ជាតិ
COVID-19៖ កម្ពុជារកឃើញ១ករណីទៀត លើបុរសខ្មែរដែលមកពីរុស្សុី
× ព្រឹកថ្ងៃព្រហស្បតិ៍នេះ ក្រសួងសុខាភិបាលប្រកាសរកឃើញអ្នកឆ្លងជំងឺកូវីដ-១៩ (COVID-19) ១ករណីទៀត លើបុរសខ្មែរវ័យ២៨ឆ្នាំ ដែលបានត្រឡប់ពីប្រទេសរុស្សុី កាលពីថ្ងៃទី១៩កក្កដា ឆ្នាំ២០២០។ លទ្ធផលវិជ្ជមានCOVID-19 លើបុរសខ្មែរនេះ បានរកឃើញនៅថ្ងៃទី២២ ខែកក្កដា បន្ទាប់ពីក្រសួង បានយកសំណាកធ្វើតេស្តជាលើកទីពីរ។ ករណីថ្មី១ទៀតនេះ បានធ្វើឱ្យកម្ពុជាមានជំងឺកូវីដ-១៩ សរុប ១៩៨នាក់។
ក្រៅពីរកឃើញ១ករណីថ្មីនៃជំងឺកូវីដ-១៩ខាងលើ ក្រសួងសុខាភិបាលក៏បានប្រកាសព្យាបាលលើបុរសខ្មែរ២នាក់ ដែលមានស្រុកកំណើតខេត្តព្រះសីហនុ ជាសះស្បើយពីជំងឺនេះ ផងដែរ។
គិតត្រឹមថ្ងៃទី២៣កក្កដា កម្ពុជាបានព្យាបាលអ្នកជំងឺកូវីដ-១៩ ជាសះស្បើយចំនួន១៤២នាក់។ រីឯ អ្នកជំងឺ៥៤នាក់ទៀត កំពុងសម្រាកព្យាបាលនៅតាមមន្ទីរពេទ្យរដ្ឋ និងមានអ្នកជំងឺ២នាក់ កំពុងសម្រាកព្យាបាលនៅបន្ទប់ដោយឡែកក្នុងស្ថានទូតអាមេរិកប្រចាំកម្ពុជា។
ជាមួយនឹងគ្នានេះ ក្រសួងសុខាភិបាលក៏បានកែតម្រូវចំពោះការប្រកាសរកឃើញជំងឺកូវីដ-១៩ លើបុរសខ្មែរម្នាក់ដែលបានមកពីប្រទេសកូរ៉េខាងត្បូង កាលពីថ្ងៃទី២០កក្កដា ផងដែរ ដោយបញ្ជាក់ថា បុរសខ្មែរម្នាក់ដែលមានជំងឺកូវីដ-១៩នោះ គឺជាអ្នកធ្វើដំណើរមកពីប្រទេសបារាំង ដោយឆ្លងកាត់ប្រទេសកូរ៉េខាងត្បូង មកដល់កម្ពុជា នាថ្ងៃទី១៩កក្កដា ឆ្នាំ២០២០៕
© រក្សាសិទ្ធិដោយ thmeythmey.com