ពីនេះ ពីនោះ
សុខភាព
សម្រួលការរំលាយអាហារ កម្ចាត់ជាតិពុលក្នុងរាងកាយ កុំភ្លេចបន្ថែមគ្រឿងផ្សំទាំងនេះក្នុងទឹក
×![]()
ដោយ: សារព័ត៌មានថ្មីៗ
ភាគច្រើននៃពួកយើងសុទ្ធតែដឹងហើយថាទឹកជាភេសជ្ជៈដ៏ប្រសើរបំផុតមួយដែលអ្នកអាចទទួលទានដើម្បីសម្រួលដល់ការរំលាយអាហារ ជម្រុញការដុតរំលាយអាហារក្នុងរាងកាយ កម្ចាត់ជាតិពុលផ្សេងៗ រក្សាជាតិទឹក និងគ្មានផ្ទុកកាឡូរីឡើយ។ ប៉ុន្តែថាតើអ្នកធ្លាប់ដឹងទេថាប្រសិនបើបន្ថែមគ្រឿងផ្សំមួយចំនួនក្នុងទឹកនោះវានឹងបង្កើនអត្ថប្រយោជន៍សុខភាពទ្វេដង? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគ្រឿងផ្សំដែលអ្នកគួរសាកល្បងបន្ថែមក្នុងទឹកដើម្បីសម្រួលការរំលាយអាហារ ព្រមទាំងបន្សាបជាតិពុល ៖
១. ស្លឹកជីអង្កាមស្រស់
ការបន្ថែមស្លឹកជីអង្កាមក្នុងទឹកមុននឹងទទួលទានអាចជួយឱ្យលំហូរទឹកប្រមាត់មានលក្ខណៈកាន់តែប្រសើរឡើង ព្រមទាំងបង្កើនមុខងារនៃក្រពេញទឹកមាត់ថែមទៀតផង។ ស្លឹកជីអង្កាមក៏មានផ្ទុកលក្ខណៈសម្បត្តិផលិតអង់ស៊ីមរំលាយអាហារផងដែរ។ អង់ស៊ីមនេះជួយស្រូបយកវីតាមីននិងសារធាតុចិញ្ចឹមក្នុងអាហារ។
២. ក្រូចឆ្មារ
មានផ្ទុកសម្បូរទៅដោយវីតាមីន C ខ្ពស់ដែលមិនត្រឹមតែជួយពង្រឹងប្រព័ន្ធភាពស៊ាំរាងកាយប៉ុណ្ណោះទេ ប៉ុន្តែក៏ល្អក្នុងការសម្រួលប្រព័ន្ធរំលាយអាហារនិងបង្កើតអង់ស៊ីមរំលាយអាហារផងដែរ។ អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ ឬបន្ថែមក្រូចឆ្មារប៉ុន្មានចំណិតក្នុងទឹកមុនទទួលទាន។
៣. ទឹកខ្មេះផ្លែប៉ោម
ការបន្ថែមទឹកខ្មេះផ្លែប៉ោម ២ ស្លាបព្រាបាយក្នុងទឹកមួយដបមុននឹងទទួលទានអាចជួយកម្ចាត់ជាតិពុលពីក្នុងរាងកាយបាន។ ភេសជ្ជៈនេះក៏សម្រួលដល់ការរំលាយអាហារ និងជម្រុញការដុតរំលាយអាហារក្នុងរាងកាយផងដែរ។ ទឹកខ្មេះផ្លែប៉ោមលាយទឹកក៏ជួយរក្សាតុល្យភាព pH នៃរាងកាយគួរឱ្យកត់សម្គាល់។
៤. ម្សៅឈើអែម
ការបន្ថែមម្សៅឈើអែមបន្តិចក្នុងទឹកមុននឹងទទួលទានពិតជាអាចជួយសម្រួលចរន្តឈាមរត់ ធ្វើឱ្យការរំលាយអាហារកាន់តែមានលក្ខណៈប្រសើរឡើង កាត់បន្ថយកម្រិតជាតិស្ករក្នុងឈាម និងជម្រុញការដុតរំលាយអាហារក្នុងរាងកាយបានយ៉ាងប្រសើរ។
៥. មើមខ្ញី
ខ្ញីមានផ្ទុកលក្ខណៈសម្បត្តិប្រឆាំងមេរោគបាក់តេរី ព្រមទាំងការរលាកក្នុងរាងកាយដែលជួយសម្រួលចរន្តឈាមរត់និងទប់ស្កាត់ជំងឺមហារីក។ បន្ថែមខ្ញីស្រស់ៗប៉ុន្មានចំណិតក្នុងទឹក។ រួចទុកចោលសម្រាប់រយៈពេល ១ យប់សិនសឹមទទួលទានដើម្បីឱ្យទឹកអាចស្រូបយកសារធាតុចិញ្ចឹមពីខ្ញីបានកាន់តែច្រើន។
៥. ត្រសក់
មិនត្រឹមតែផ្ដល់រសជាតិត្រជាក់និងស្រស់ស្រាយបន្ថែមក្នុងទឹកដែលអ្នកទទួលទានឡើយ ត្រសក់ក៏ជួយកម្ចាត់ជាតិពុលនិងសម្រួលដល់ការរំលាយអាហារបានផងដែរ។ ត្រសក់ថែមទាំងមានផ្ទុកសម្បូរទៅដោយជាតិសសៃនិងសារធាតុប្រឆាំងអុកស៊ីតកម្មទៀតផង។ អ្វីដែលអ្នកត្រូវធ្វើ គឺគ្រាន់តែបន្ថែមចំណិតត្រសក់ក្នុងទឹកជាការស្រេច៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
