COVID-19
ជាតិ
ក្រសួងទេសចរណ៍ជំរុញឲ្យបន្តអនុវត្តវិធានការអនាម័យនាអំឡុងថ្ងៃឈប់សម្រាកជំនួសចូលឆ្នាំ លោក ថោង ខុន រដ្ឋមន្ត្រីក្រសួងទេសចរណ៍
× ភ្នំពេញ៖ ដើម្បីកាត់បន្ថយហានិភ័យ និងទប់ស្កាត់ការរីករាលដាល នៃជំងឺកូវីដ-១៩ នាអំឡុងពេលឈប់សម្រាក ជំនួសថ្ងៃចូលឆ្នាំខ្មែរ នៅខែសីហាខាងមុខ ក្រសួងទេសចរណ៍ នៅថ្ងៃទី២១ កក្កដា បានចេញសេចក្ដីណែនាំ ៥ចំណុច ឱ្យមន្ទីរទេសចរណ៍រាជធានី-ខេត្ត។
តាមរយៈលិខិតនេះ ក្រសួងទេសចរណ៍ បានណែនាំមន្ទីរទេសចរណ៍ទាំងអស់ ឲ្យបន្តជំរុញការអនុវត្តវិធានសុវត្ថិភាពទេសចរណ៍ ដែលរួមមានវិធានសុវត្ថិភាពទេសចរណ៍កន្លែងស្នាក់នៅ, វិធានសុវត្ថិភាពទេសចរណ៍សម្រាប់ភោជនីយដ្ឋាន និងអាហារដ្ឋាន, វិធានសុវត្ថិភាពទេសចរណ៍សម្រាប់សេវាកម្មដឹកជញ្ជូនផ្លូវទឹក និងផ្លូវគោក, វិធានសុវត្ថិភាពទេសចរណ៍សម្រាប់រមណីយដ្ឋាន និងវិធានសុវត្ថិភាពទេសចរណ៍សហគមន៍ទេសចរណ៍។
ក្រៅពីនេះ មន្ទីរទេសចរណ៍ ត្រូវផ្សព្វផ្សាយវិធានសុវត្ថិភាពទេសចរណ៍ ទៅដល់ប្រតិបត្តិករទេសចរណ៍ ម្ចាស់មូលដ្ឋានអាជីវកម្ម និងទីតាំងទេសចរណ៍ទូទាំងប្រទេស។ នេះបើតាមលិខិតរបស់ក្រសួងទេសចរណ៍ ដែលបានណែនាំទៅមន្ទីរទេសចរណ៍ទាំងអស់ទៀតថា ឲ្យសហការជាមួយប្រតិបត្តិករទេសចរណ៍ ក្នុងការគ្រប់គ្រងគោលដៅទេសចរណ៍ ពង្រឹងគុណភាពសេវាកម្ម និងផលិតផលទេសចរណ៍ ដោយអនុលោមតាមវិធានសុវត្ថិភាពទេសចរណ៍ និងការណែនាំរបស់ក្រសួងសុខាភិបាល។ អនាម័យម្ហូបអាហារ បរិស្ថាន ពិសេសរក្សាតម្លៃផលិតផល និងសេវាកម្មឲ្យនៅសមរម្យ ក៏ត្រូវមានការធានាផងដែរ ពីប្រតិបត្តិករទេសចរណ៍។
រដ្ឋាភិបាល បានកំណត់យកថ្ងៃទី១៧-២១ ខែសីហា ជាថ្ងៃឈប់សម្រាកជំនួសបុណ្យចូលឆ្នាំ ប្រពៃណីជាតិ ដែលត្រូវបានផ្អាកដើម្បីទប់ស្កាត់ការឆ្លងជំងឺកូវីដ-១៩។
គិតត្រឹមថ្ងៃទី២២ ខែកក្កដា កម្ពុជារកឃើញអ្នកឆ្លងជំងឺកូវីដ-១៩ ចំនួន១៩៨នាក់ ក្នុងនោះមានអ្នកសះស្បើយចំនួន១៤២នាក់ និង៥៦នាក់កំពុងសម្រាកព្យបាល។ ដើម្បីកាត់បន្ថយការឆ្លងរាលដាលនៃជំងឺនេះ ក្រសួងសុខាភិបាលនៅតែទទូចឲ្យពលរដ្ឋ អនុវត្តន៍ឲ្យខ្ជាប់ខ្ជួននូវវិធានអនាម័យ និងការរស់នៅបែបគន្លងថ្មី៕
© រក្សាសិទ្ធិដោយ thmeythmey.com