ប៉ូលិស បំបែកហ្វូងអ្នកគាំទ្រ Liverpool អបអរការលើកពាន ដើម្បីបង្ការ COVID-19

COVID-19

កីឡាអន្តរជាតិ

អន្តរជាតិ

ប៉ូលិស បំបែកហ្វូងអ្នកគាំទ្រ Liverpool អបអរការលើកពាន ដើម្បីបង្ការ COVID-19

23, Jul 2020 , 10:59 pm

រូបភាព

ដោយ: ទេព ពិទូរ្យ

ក្រុមប៉ូលិសអង់គ្លេសបានបំបែកហ្វូងអ្នកគាំទ្រនៅក្បែរកីឡដ្ឋាន Anfield ជាកន្លែងក្រុម Liverpool អបអរពានរង្វាន់ Premier League ជាលើកដំបូងក្នុងរយៈពេល ៣០ ឆ្នាំចុងក្រោយ។ ចំណាត់ការនេះ ធ្វើឡើងដើម្បីការពារសណ្តាប់ធ្នាប់ និងបង្ការការឆ្លងជំងឺ COVID-19 តាមរយៈការប្រមូលផ្តុំគ្នា។

អ្នកគាំទ្រក្រុមហង្សក្រហមរាប់ពាន់នាក់បានប្រមូលផ្តុំគ្នានៅតាមដងផ្លូវដោយមានដុតភ្លើង និងកាំជ្រួចផងដើម្បីអបអរការឈ្នះជើងឯកលីគកំពូលអង់គ្លេសរបស់ក្រុម Liverpool នៅក្រោយពេលក្រុមនេះបានយកឈ្នះ Chelsea ក្នុងលទ្ធផល ៥-៣ នាជំនួបសប្តាហ៍ទី៣៧ នៅយប់ថ្ងៃទី២២ ខែកក្កដា។

ដោយសារមានមនុស្សច្រើនផ្តុំគ្នាដែលអាចបង្កឲ្យមានហានិភ័យខ្ពស់ក្នុងការឆ្លងជំងឺរាតត្បាតសកល ប៉ូលិសនៅតំបន់ Merseyside បានបញ្ជាឲ្យបំបែកក្រុមអ្នកគាំទ្រទាំងនោះនៅត្រឹមរយៈពេល ៤៨ ម៉ោង។ ការប្រមួលផ្តុំគ្នារបស់អ្នកគាំទ្ររបៀបនេះបានកើតឡើងម្តងរួចមកហើយ នៅពេលក្រុមលោក Jurgen Klopp បានដឹងលទ្ធផលថា ក្រុមលោកបានឈ្នះពាន Premier League តាំងពីប្រកួតទី៣១មកនោះ។

ការបង្ហាញការអបអរពីសំណាក់អ្នកគាំទ្រដោយមិនរអានឹងការឆ្លង COVID-10 តាមរយៈការប្រមូលផ្តុំ និងថែមទាំងរំលោភច្បាប់គម្លាតសុវត្ថិភាពផងនោះ ពីព្រោះតែក្រុម Liverpool របស់ពួកគបានរង់ចាំរយៈពេល៣០ឆ្នាំមកហើយ ដើម្បីលើកពាននេះសារជាថ្មី។

ក្រោមការដឹកនាំរបស់អ្នកចាត់ការទូទៅសញ្ជាតិអាល្លឺម៉ង់ Liverpool អាចឈ្នះពានក្របខណ្ឌកំពូលអង់គ្លេសនេះជាលើកទី១៩ ពោលគឺតាំងពីរដូវកាល ១៩៨៩-៩០ និងជាការឈ្នះពានដែលប្តូរឈ្មោះទៅជា Premier League ជាលើកដំបូង។

គិតត្រឹមថ្ងៃទី២៣ ខែកក្កដានេះ ចក្រភពអង់គ្លេសមានករណីឆ្លងជំងឺ COVID-19 ជិត៣សែននាក់ ក្នុងនោះស្លាប់ជាង ៤៥០០០នាក់៕