ជាតិ
ក្រសួងព័ត៌មាន និងយូណេស្កូ សម្ពោធសៀវភៅ វិជ្ជាជីវៈសារព័ត៌មាន «ដំណឹងក្លែងក្លាយ» និង «ព័ត៌មានមិនពិត» រូបភាពពីលោក ខឹម សុវណ្ណារ៉ា
× ភ្នំពេញ៖ កាលពីព្រឹកថ្ងៃទី២៣ ខែកក្កដា ក្រសួងព័ត៌មាន សហការជាមួយអង្គការយូណេស្កូ បានរៀបចំពិធីសម្ពោធដាក់ឲ្យប្រើប្រាស់សៀវភៅជាភាសាខ្មែរ វិជ្ជាជីវៈសារព័ត៌មាន«ដំណឹងក្លែងក្លាយ» និង «ព័ត៌មានមិនពិត»។ សៀវភៅនេះ ជាមេរៀនសម្រាប់ការអប់រំ និងការបណ្តុះបណ្តាលផ្នែកវិជ្ជាជីវៈសារព័ត៌មាន សម្រាប់អ្នកសារព័ត៌មាន និងអ្នកអប់រំផ្នែកសារព័ត៌មាន។
ការសម្ពោធដាក់ឲ្យប្រើប្រាស់សៀវភៅមួយក្បាលនេះ មានគោលបំណងណែនាំ ទ្រឹស្ដី និងបរិបទ សម្រាប់សារព័ត៌មាន និងអ្នកអប់រំផ្នែកវិជ្ជាជីវៈសារព័ត៌មាន ព្រមទាំងនិស្សិត ក្នុងការអនុវត្តកិច្ចការសារព័ត៌មានដែលមានវិជ្ជាជីវៈ និងក្រមសីលធម៌។ លើសពីនេះ សៀវភៅនេះ នឹងបម្រើជាជម្រើសមួយមានតម្លៃខ្ពស់ និងគួរឲ្យទុកចិត្ត ក្នុងការប្រឆាំងនឹងព័ត៌មានមិនពិត និងព័ត៌មានខុស។
រូបភាពពីលោក ខឹម សុវណ្ណារ៉ា
ក្នុងពិធីសម្ពោធសៀវភៅ វិជ្ជាជីវៈសារព័ត៌មាន «ដំណឹងក្លែងក្លាយ» និង «ព័ត៌មានមិនពិត» លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានលើកឡើងថា៖ «ខ្ញុំសង្ឃឹមថា សៀវភៅនេះ នឹងឲ្យអ្នកអានមើលយល់ និងចេះបែងចែក ពីកម្រិតសេរីភាពនៃការបញ្ចេញមតិ»។
លោករដ្ឋមន្ត្រីក្រសួងព័ត៌មាន បន្តថា ដំណឹងក្លែងក្លាយនេះ ក៏ផ្ដល់ផលប្រយោជន៍ផងដែរ ដែលធ្វើឲ្យអ្នកអានចេះពិចារណា និងផ្ទៀងផ្ទាត់មុននឹងអាន និងចែករំលែក។
បើតាមសេចក្ដីប្រកាសព័ត៌មានរបស់អង្គការយូណេស្កូ និងក្រសួងព័ត៌មាន សៀវភៅមួយក្បាលនេះ អាចឲ្យអ្នកវិជ្ជាជីវៈសារព័ត៌មាន និងនិស្សិតផ្នែកវិជ្ជាជីវៈសារព័ត៌មាន ចេះនូវជំនាញផ្ទៀងផ្ទាត់ការពិត និងផ្នែកអក្ខរកម្មប្រព័ន្ធផ្សព្វផ្សាយ និងព័ត៌មាន ដើម្បីលើកកម្ពស់ភាពជឿជាក់បាននៃវិជ្ជាជីវៈសារព័ត៌មាន។
សៀវភៅ វិជ្ជាជីវៈសារព័ត៌មាន «ដំណឹងក្លែងក្លាយ» និង «ព័ត៌មានមិនពិត» មានកម្រាស់១៨៩ទំព័រ និងមានមេរៀនចំនួន ៧ ដែលបកប្រែដោយវិទ្យាស្ថានសារព័ត៌មានហ្វូចូ និងបោះពុម្ពដោយ យូណេស្កូ៕
Tag:
ព័ត៌មាន
យូណេស្កូ
សៀវភៅ
ដំណឹងក្លែងក្លាយ
© រក្សាសិទ្ធិដោយ thmeythmey.com