តួលេខករណីឆ្លងCOVID-19 សរុបនៅអាមេរិក គិតត្រឹមថ្ងៃទី២៣ ខែកក្កដា បានកើនដល់ជាង ៤លានករណី ខណៈអ្នកស្លាប់មានចំនួនជាង ១៤ម៉ឺននាក់។ នេះបើតាមតួលេខរបស់វេបសាយ Worldometer។ រដ្ឋកាលីហ្វ័រនីញ៉ា និងរដ្ឋញូវយ៉ក ក្លាយជារដ្ឋមានករណី COVID-19 ឈរនៅជួរមុខគេ ខណៈរដ្ឋផ្លរីដា និងរដ្ឋតិចសាស់ ត្រូវគេរំពឹងថា នឹងមានករណីឆ្លងកាន់តែច្រើនដែរ។
ក្នុងចំណោមរដ្ឋទាំងអស់របស់អាមេរិក រដ្ឋញូវយ៉ក នៅតែមានករណីឆ្លងកូរ៉ូណាវីរុសច្រើនជាងគេ ពោលគឺមានចំនួន៤៣៧៥២៩ករណី ដែលតាមពីក្រោយដោយ រដ្ឋCalifornia មាន ៤៣២៣៤៥ករណី, រដ្ឋ Florida មាន៣៨៩៨៦៨ករណី, រដ្ឋTexas មាន៣៧៧៣៩៦ករណី និងរដ្ឋផ្សេងទៀត។ នេះបើតាមការស្រង់ទិន្នន័យរបស់វេបសាយ Worldometers។
ប៉ុន្តែក្នុងពេលឆាប់ៗខាងមុខ រដ្ឋCalifornia, រដ្ឋ Florida, រដ្ឋ Texas ត្រូវបានគេរំពឹងថា នឹងមានករណីឆ្លងច្រើនជាង រដ្ឋញូវយ៉កទៅទៀត ព្រោះរដ្ឋទាំងបីនេះ មានករណីឆ្លងក្នុងមួយថ្ងៃមានជាង ១ម៉ឺនករណី និងជិតមួយម៉ឺនករណីឯណោះ។ ចំណែករដ្ឋផ្សេងទៀតរបស់អាមេរិក គឺមានករណីឆ្លងចាប់ពី១ពាន់ ទៅ៤ពាន់ប៉ុណ្ណោះក្នុងមួយថ្ងៃ។
មកទល់ពេលនេះ អាមេរិកនៅតែឈរលើកំពូលតារាងនៃបណ្តាប្រទេសមានកូរ៉ូណាវីរ៉ុសទាំងអស់។ ជាមធ្យមក្នុងមួយម៉ោង អាមេរិក បានរាយការណ៍ពីករណីឆ្លងCOVID-19 ចំនួន២៦០០ករណី។ នៅក្នុងថ្ងៃទី២៣ ខែកក្កដា អាមេរិកបានប្រកាសរកឃើញករណីឆ្លងកូរ៉ូណាវីរុសថ្មីចំនួន ៦៩១១៦ករណី និងមានអ្នកស្លាប់ចំនួន ១១៥០នាក់។ ចំនួននេះ គឺថយបន្តិច បើធៀបនឹងថ្ងៃទី២២ ខែកក្កដា ដែលមានករណីឆ្លងរហូតដល់ ៧១៩៦៧ករណី និងអ្នកស្លាប់ចំនួន ១២០៥នាក់។
តួលេខសរុបCOVID-19 នៅអាមេរិក មានចំនួន ៤១៦៩៩៩១ករណី អ្នកស្លាប់មានចំនួន ១៤៧៣៣៣នាក់។ ចំណែកអ្នកជាសះស្បើយមានចំនួន ១៩៧៩៦១៧នាក់។
ដោយសារតែមានករណីឆ្លងCOVID-19 ច្រើនពេកនៅក្នុងទឹកដីអាមេរិក សូម្បីតែប្រធានាធិបតី លោក ដូណាល់ ត្រាំ ដែលកន្លងមក ដែលបដិសេធមិនពាក់ម៉ាស និងបដិសេធវិធានការចាប់បង្ខំឲ្យពាក់ម៉ាស់ជាសាធារណៈនោះ ក៏បានជំរុញឲ្យពលរដ្ឋអាមេរិកទាំងអស់ពាក់ម៉ាស់ដែរ នៅពេលដែលមិនអាចរក្សាគម្លាតសុវត្ថិភាពបាន ដើម្បីបង្ការការរាតត្បាត COVID-19។
សូមបញ្ជាក់ថា នាពេលកន្លងមក លោកវេជ្ជបណ្ឌិត Anthony Fauci អ្នកជំនាញជំងឺឆ្លងនៅអាមេរិក បានព្រមានថា ករណីឆ្លងCOVID-19 ក្នុងមួយថ្ងៃនៅអាមេរិក អាចនឹងហក់ឡើងដល់ ១០ម៉ឺនករណី ដោយសារតែការបើកតំបន់ឆាប់ពេក ចំណាត់ការរបស់រដ្ឋនីមួយៗមិនស៊ីសង្វាក់គ្នា និងការមិនចូលរួមពីសំណាក់ប្រជាពលរដ្ឋដូចជាមិនពាក់ម៉ាស់ ឬរក្សាគម្លាតសុវត្ថិភាពជាដើម៕