ជាតិ
ផលិតផល «ពងទាកូនស្រែរនោង» នាំឲ្យនាយករដ្ឋមន្ត្រីចាត់ទុកតាកែវជាខេត្តនៃអធិរាជពងទាកូន
ផលិតផលពងទាកូនស្រែរនោង។ ប្រភពហ្វេសប៊ុក ពងទាកូនស្រែរនោង ខេត្តតាកែវ
×![]()
ពងទាកូនស្រែរនោង ក៏ជាផលិតផលកសិកម្មរបស់ខេត្តតាកែវ មានភាពល្បីល្បាញទូទាំងប្រទេស។ បើតាមលោកអភិបាលខេត្ត អ៊ូច ភា ផលិតផលសម្គាល់ភូមិសាស្ត្រដែលចេញពីឃុំស្រែរនោងនេះហើយ ដែលនាំឲ្យសម្តេចនាយករដ្ឋមន្ត្រី ហ៊ុន សែន ចាត់ទុកខេត្តតាកែវជា «ខេត្តនៃអធិរាជពងទាកូន»។
ផលិតឡើងដោយសហគមន៍កសិករ នៅឃុំស្រែរនោង ស្រុកត្រាំកក់ ខេត្តតាកែវ ជាមួយនឹងការយកចិត្តទុកដាក់ និងប្រើប្រាស់បច្ចេកទេសចិញ្ចឹម និងថែទាំតាមធម្មជាតិ ពងទាកូនស្រែរនោង កំពុងផ្គត់ផ្គង់លើទីផ្សារទូទាំងប្រទេស។
ថ្លែងនៅក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងាររបស់ខេត្តតាកែវ កាលពីថ្ងៃទី២៣ ខែកក្កដា លោក អ៊ូច ភា បានអះអាងថា ផលិតផលសហគមន៍ពងទាស្រែរនោង ចូលរួមបង្កើតការងារ និងលើកកម្ពស់កម្រិតជីវភាពកសិករ នៅក្នុងឃុំស្រែរនោងកាន់តែធូរធារ។ បើតាមលោកអភិបាលខេត្ត ពងទាកូនស្រែរនោង ក៏ជាទិសដៅម្ហូបអាហារសម្រាប់ភ្ញៀវទេសចរផងដែរ។
តាមរបាយការណ៍រដ្ឋបាលខេត្តតាកែវ ខេត្តទាំងមូលចិញ្ចឹមទាសរុបជាង១.៦លានក្បាល ក្នុងនោះ មានការចិញ្ចឹមជាលក្ខណៈគ្រួសារ និងកសិដ្ឋាន១៧២កន្លែង និងកន្លែងភ្ញាស់ពងទា៧២កន្លែង។
លោក អ៊ូច ភា អភិបាលខេត្តតាកែវ នាសន្និសីទសារព័ត៌មាននៅទីស្តីការគណៈរដ្ឋមន្ត្រី កាលពីថ្ងៃទី២៣ ខែកក្កដា។ ថតដោយ ប៉ាន់ បូនី
លោក ញិប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តតាកែវ ក៏បានបញ្ជាក់នៅក្នុងសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរដ្ឋាភិបាលផងដែរថា ទានៅសហគមន៍ស្រែរនោង ផលិត១ថ្ងៃបានជាង៥០ម៉ឺនពង ដែលធ្វើជាពងទាប្រៃ ពងទាសាប ក៏ដូចជាផលិតឲ្យភ្ញាស់ចេញជាពងទាកូនផងដែរ។
ប្រធានមន្ទីរកសិកម្ម បានអះអាងថា ផលិតផលពងទាពីស្រែរនោង បានផ្គត់ផ្គង់នៅទីផ្សារក្នុងខេត្ត ក៏ដូចជានាំចេញទៅតាមបណ្តាខេត្តផ្សេងៗផងដែរ។ «អ្នកទិញមិនចាំបាច់ទៅដល់កន្លែងឡើយ គ្រាន់តែបញ្ជាទិញ អ្នកលក់អាចវេចខ្ចប់ផ្ញើទៅបាន»។ នេះជាការលើកឡើងរបស់លោក ញិប ស្រ៊ន។
ខេត្តតាកែវ បានក្លាយជាទីតាំងប្រមូលផ្តុំនៃរោងចក្រ សហគ្រាស ឧស្សាហកម្មផ្នែកកមន្តសាល និងសិប្បកម្ម ហើយក៏ជាគោលដៅនិយោគក្នុងវិស័យឧស្សហកម្ម របស់អ្នកវិនិយោគជាតិ និងអន្តរជាតិដែរ។ ជាមួយគ្នានេះ វិស័យកសិកម្មខេត្តតាកែវ ក៏ជាប់ចំណាត់ថ្នាក់លេខ៣ នៅទូទាំងប្រទេសផងដែរ៕
Tag:
ពងទាកូន
កសិកម្ម
តាកែវ
© រក្សាសិទ្ធិដោយ thmeythmey.com
