ក្រោយស្ងាត់ជាង១០០ថ្ងៃ ឡាវមានករណី COVID-19 ថ្មី១ទៀតដែលជាជនជាតិកូរ៉េខាងត្បូង

COVID-19

អន្តរជាតិ

ក្រោយស្ងាត់ជាង១០០ថ្ងៃ ឡាវមានករណី COVID-19 ថ្មី១ទៀតដែលជាជនជាតិកូរ៉េខាងត្បូង

24, Jul 2020 , 2:59 pm

រូបភាព

ពលរដ្ឋឡាវម្នាក់ ពាក់ម៉ាស់ រត់ហាត់ប្រាណ នៅវិមាន Patuxay កាលពីថ្ងៃទី ៣ ខែមេសា ឆ្នាំ២០២០ (Xinhua)

ដោយ:

ក្រសួងសុខាភិបាលឡាវ នៅថ្ងៃទី២៤ ខែកក្កដា បានរាយការណ៍ពីករណីឆ្លង COVID-19 ថ្មី ជាលើកដំបូង ក្នុងរយៈពេល១០២ថ្ងៃចុងក្រោយ។ នេះគឺករណីឆ្លងទី២០របស់ប្រទេសឡាវ។

ករណីឆ្លងថ្មីនេះ គឺជាបុរសកូរ៉េខាងត្បូង ដែលជាបុគ្គលិកគម្រោងទំនប់វារីអគ្គិសនីក្នុងប្រទេសឡាវ ។ បើតាមក្រសួងសុខាភិបាលឡាវ អ្នកជំងឺអាយុ ៣២ឆ្នាំរូបនេះ បានធ្វើដំណើរពីប្រទេស ជប៉ុន ហើយប្ដូរជើងហោះហើរនៅកូរ៉េខាងត្បូង នៅថ្ងៃទី ១៨ ខែកក្កដា ហើយទៅដល់ឡាវ នៅថ្ងៃដដែល។

បុរសរូបនេះ ត្រូវបានបញ្ជូនទៅមណ្ឌលចត្តាឡីស័កក្នុងទីក្រុង វៀងចន្ទន៍ ដោយជិះឡានជាមួយអ្នកដំណើរ៦នាក់ទៀត។ បើតាមការចុះផ្សាយរបស់ទីភ្នាក់ងារព័ត៌មាន Xinhua អ្នកជំងឺកូរ៉េខាងត្បូងនេះ កំពុងសម្រាកព្យាបាលនៅមន្ទីរពេទ្យមួយដែលរដ្ឋរៀបចំ ។

គិតត្រឹមថ្ងៃទី ២៣ ខែកក្កដា ករណីសង្ស័យ ២៤ ៤៧៩ ត្រូវបានធ្វើតេស្តរក COVID-19 ក្នុងប្រទេស។ ហើយក្នុងចំណោមករណីវិជ្ជមានសរុប ២០នាក់ មនុស្ស១៩នាក់បានជាសះស្បើយពីជំងឺ COVID-19 ។ ឡាវ បានប្រកាសករណីឆ្លង២ដំបូង កាលពីថ្ងៃទី ២៤ ខែមីនា៕