អ្នកស្លាប់ដោយសារ COVID-19នៅឥណ្ឌា កើនលើស៣ម៉ឺននាក់

COVID-19

អន្តរជាតិ

អ្នកស្លាប់ដោយសារ COVID-19នៅឥណ្ឌា កើនលើស៣ម៉ឺននាក់

24, Jul 2020 , 4:21 pm

រូបភាព

មន្ត្រីសុខាភិបាលឥណ្ឌា ពិនិត្យកម្តៅប្រជាជន ក្នុងទីក្រុង ម៉ុមប៉ៃ នៅថ្ងៃទី៤ ខែកក្កដា (AFP)

ដោយ:

ករណីស្លាប់ដោយសារជំងឺរាតត្បាតសកល COVID-19 ក្នុងប្រទេសឥណ្ឌា បានកើនលើសប្រទេសបារាំងហើយ នៅថ្ងៃទី ២៤ ខែកក្កដា ដោយទិន្នន័យផ្លូវការ បង្ហាញថា មនុស្សសរុបរហូតដល់ ៣០ ៦០១នាក់ បានស្លាប់ពីជំងឺនេះ។ បច្ចុប្បន្ន បារាំងមានករណីស្លាប់ដោយសារ COVID-19 សរុប ៣០១៨២នាក់។

ក្នុងពេល២៤ម៉ោង ប្រទេស ឥណ្ឌា បានរាយការណ៍ករណីស្លាប់ដោយសារ COVID-19 ថ្មីចំនួន ៧៤០នាក់ ហើយករណីឆ្លងថ្មីជិត៥ម៉ឺននាក់។ នេះបើតាមរបាយការណ៍របស់ក្រសួងសុខាភិបាលឥណ្ឌា ដែលដកស្រង់ចុះផ្សាយដោយទីភ្នាក់ងារព័ត៌មាន AFP។

ឥណ្ឌាជាប្រទេសដែលមានករណីស្លាប់ដោយសារ COVID-19 ច្រើនបំផុតលំដាប់ទី៦ ដោយតាមពីក្រោយ សហរដ្ឋអាមេរិកដែលមានជាង១៤,៦ម៉ឺននាក់, ប្រេស៊ីលមានជាង៨,៤ម៉ឺននាក់, ចក្រភពអង់គ្លេសមានជាង៤,៥ម៉ឺននាក់, ម៊ិកស៊ិកមានជាង៤,១ម៉ឺននាក់ និងអ៊ីតាលីមានជាង៣,៥ម៉ឺននាក់ ។ ម្យ៉ាងទៀត ឥណ្ឌា ក៏ជាប្រទេសមានករណីឆ្លងច្រើនបំផុតលំដាប់ទី៣ ជាមួយតួលេខ ១,៣លានករណី។

ទោះជាបែបនេះក្តី អ្នកជំនាញជាច្រើន អះអាងថា ខណៈការធ្វើតេស្ត COVID-19 មានកម្រិតទាប តួលេខឆ្លងពិតប្រាកដក្នុងប្រទេសដែលមានប្រជាជនច្រើនបំផុតលំដាប់ទី២របស់ពិភពលោកនេះ ប្រហែលជាអាក្រក់ខ្លាំងជាងអ្វីដែលបានរាយការណ៍។

ការសិក្សាមួយរបស់រដ្ឋាភិបាលឥណ្ឌាដែលចេញក្នុងសប្ដាហ៍នេះ បានបង្ហាញថា ជិត១ភាគ៤នៃប្រជាជនរស់នៅក្នុងទីក្រុងញូវដេលីដែលមានជិត៣០លាននាក់ មានផ្ទុកជំងឺ COVID-19 ។ តួលេខនេះ គឺមានជិត៤០ដងលើសតួលេខរាយការណ៍ផ្លូវការ។

រដ្ឋាភិបាលនាយករដ្ឋមន្ត្រី នារិន្ទ្រា ម៉ូឌី បានដាក់សម្រេចបិទប្រទេសនៅចុងខែមីនា តែចាប់ផ្ដើមបន្ធូរបន្ថយវិធានការនេះវិញ ក្នុងគោលដៅជួយសេដ្ឋកិច្ចដែលប៉ះពាល់ធ្ងន់ធ្ងរដោយសារជំងឺ COVID-19 ។ យ៉ាងណាមិញ រដ្ឋជាច្រើនក្នុងប្រទេសនេះ បានផ្ដើមដាក់ចំណាត់ការទប់ស្កាត់ COVID-19ឡើងវិញ ខណៈករណីបន្តហក់ឡើង៕