ជាតិ
សង្គមជាតិ
សិស្សសាលាឯកជន៖ ឌីប្លូម នៅតែប្រឡងនៅថ្ងៃ៣-៤សីហា ឯបាក់ឌុប ត្រូវលើកទៅប្រឡងនៅថ្ងៃ២៧-២៨សីហាវិញ
សិស្សានុសិស្សាកំពុងអង្គុយត្រៀមប្រឡងបាក់ឌុបនៅក្នុងបន្ទប់រំប្រឡងកាលពីសម័យប្រលងបាក់ឌុបឆ្នាំ២០១៩-២០២០ (រូបភាព៖ ញឹក ស្រីល័ក្ខ)
×![]()
ភ្នំពេញ៖ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា បានចេញសេចក្តីណែនាំថ្មី នៅថ្ងៃទី២៤ ខែកក្កដា ឆ្នាំ២០២០ ដោយកែសម្រួលថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់សិស្សសាលាឯកជន នៅថ្ងៃទី១៧-១៨ ខែសីហា ឆ្នាំ២០២០ ត្រូវលើកទៅថ្ងៃទី២៧-២៨ ខែសីហា ឆ្នាំ២០២០វិញ។ 
លោករដ្ឋមន្ត្រី បញ្ជាក់ហេតុផលថា ដោយសារតែ ១៧-១៨ សីហា ចំថ្ងៃឈប់សម្រាក ទើបបានជារដ្ឋមន្ត្រីអប់រំ ប្រកាសប្តូរថ្ងៃប្រឡងបាក់ឌុប សម្រាប់សិស្សសាលាឯកជន។
កាលពីចូលឆ្នាំខ្មែរ រដ្ឋាភិបាល មិនអនុញ្ញាតឲ្យឈប់សម្រាក់នោះទេ ដូច្នេះ រដ្ឋាភិបាល បានសម្រេចសងវិញ ដោយឲ្យឈប់សម្រាករយៈពេល៥ថ្ងៃ គឺចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០។
ចំពោះការប្រឡងសញ្ញាបត្រមធ្យមសិក្សាបឋមភូមិ (ឌីប្លូម) សម្រាប់សិស្សសាលាឯកជន ដែលក្រសួង កំណត់យកនៅថ្ងៃទី៣-៤ ខែសីហា ឆ្នាំ២០២០ គឺនៅតែរក្សាដដែល ដោយមិនផ្តាស់ប្តូរឡើយ។
លោក រស់ សុវាចា អ្នកនាំពាក្យក្រសួងអប់រំ ប្រាប់អ្នកសារព័ត៌មានថ្មីៗតាមតេឡេក្រាមថា លោកមិនទាន់អាចបញ្ជាក់ពីចំនួនសាលាឯកជន ដែលបានចុះឈ្មោះរៀបចំដំណើរការប្រឡងបាក់ឌុប និងឌីប្លូមនោះទេ។ ក្រសួង តម្រូវឲ្យសាលាឯកជន បញ្ជូនឈ្មោះទៅក្រសួង មុននឹងរៀបចំការប្រឡង។
រីឯ ការប្រឡងឌីប្លូម និងបាក់ឌុប សម្រាប់សិស្សសាលារដ្ឋវិញ ក្រសួងអប់រំ បានពន្យារពេល ដោយមិនទាន់អាចកំណត់កាលបរិច្ឆេទជាក់លាក់ថា នឹងត្រូវប្រឡងនៅពេលណាឡើយ។ អ្នកនាំពាក្យខាងលើ លើកឡើងថា ក្រសួងអប់រំ នឹងជូនដំណឹងនៅពេលក្រោយ អំពីការប្រឡងឌីប្លូមនិងបាក់ឌុបរបស់សិស្សសាលារដ្ឋ។
ក្រសួងអប់រំ ស្នើឲ្យសិស្សានុសិស្ស បន្តការសិក្សាតាមអនឡាញ ដោយអនុវត្តតាមការណែនាំរបស់ក្រសួងសុខាភិបាល៕
Tag:
ប្រឡង
ឌីប្លូម
បាក់ឌុប
សិស្ស
អប់រំ
© រក្សាសិទ្ធិដោយ thmeythmey.com
