COVID-19
អន្តរជាតិ
លោក លី សៀនឡុង បន្តធ្វើជានាយករដ្ឋមន្ត្រីសិង្ហបុរី ឯមន្ត្រីជំនាន់ទីបួនដឹកនាំក្រសួងសំខាន់ៗ នាយករដ្ឋមន្រ្តីសិង្ហបុរី លី សៀនឡុង (កណ្ដាល) ថ្លែងក្នុងពិធីប្រកាសសមាសភាពរដ្ឋាភិបាលអាណត្តិថ្មីនៅថ្ងៃទី២៥ ខែកក្កដា។ រូបភាព Screenshot ពីវេបសាយទូរទស្សន៍ Channel NewsAsia
× នាយករដ្ឋមន្ត្រីសិង្ហបុរី លី សៀនឡុង នៅថ្ងៃទី២៥ ខែកក្កដា បានប្រកាសសមាសភាពគណៈរដ្ឋមន្ត្រីថ្មី ១៥ថ្ងៃក្រោយទទួលជ័យជម្នះក្នុងការបោះឆ្នោតជ្រើសរើសសមាជិក។ មន្ត្រីជំនាន់ទីបួន (4G) បន្តដឹកនាំក្រសួងសំខាន់ៗក្នុងរដ្ឋាភិបាលថ្មីនេះ ដោយមានជំនួយពីមន្ត្រីដែលទើបដំឡើងតួនាទីថ្មី ដែលធ្វើឲ្យក្រសួងខ្លះមានរដ្ឋមន្ត្រីពីរ។ យ៉ាងណាមិញ លោក លី មិនទាន់បង្ហាញពេលវេលាដែលលោកផ្ទេរតំណែងនៅឡើយទេ។
ពីរសប្ដាហ៍ក្រោយទទួលជោគជ័យក្នុងការបោះឆ្នោតសភា លោក លី សៀនឡុង បានបញ្ចេញបញ្ជីឈ្មោះសមាជិករដ្ឋាភិបាលថ្មី ដោយទុករដ្ឋមន្ត្រីវ័យក្មេងក្ដាប់តំណែងក្រសួងសំខាន់ៗ និងបន្ថែមឈាមថ្មីផងដែរ។ លោក លី ដែលកាន់តំណែងនាយករដ្ឋមន្ត្រីតាំងពីឆ្នាំ២០០៤ បន្តធ្វើជាប្រមុខរដ្ឋាភិបាលដដែល។
លោក ហេង ស្វីគៀត ដែលជាអ្នកស្នងតំណែងពីលោក លី ក៏បន្តកាន់តំណែងឧបនាយករដ្ឋមន្ត្រី និងរដ្ឋមន្ត្រីហិរញ្ញវត្ថុ តែមានតំណែងថ្មីមួយទៀតជារដ្ឋមន្ត្រីសម្របសម្រួលគោលនយោបាយសេដ្ឋកិច្ច។ លោក ហេង ធ្វើមិនសូវបានល្អឡើយក្នុងការបោះឆ្នោតថ្ងៃទី១០ ខែកក្កដា ដ្បិតលោកអាចយកឈ្នះបេក្ខជនបក្សប្រឆាំងយ៉ាងប្រផុតប្រផើយបំផុត។ នាសន្និសីទសារព័ត៌មានថ្ងៃទិ២៥ ខែកក្កដា លោក លី មិនបានលើកឡើងពីកាលបរិច្ឆេទដែលលោកផ្ទេរតំណែងឲ្យលោក ហេង ឡើយ។
រដ្ឋមន្ត្រីវ័យក្មេងដែលត្រូវបានហៅថា មេដឹកនាំជំនាន់ទីបួន នៅតែមានតួនាទីសំខាន់ក្នុងរដ្ឋាភិបាលថ្មី។ តួយ៉ាង លោក ចាន់ ឈុនស៊ីង បន្តកាន់តំណែងរដ្ឋមន្ត្រីពាណិជ្ជកម្មដដែល។ លោក លី ក៏រក្សាទុករដ្ឋមន្ត្រីដែលធ្វើការលើការងារប្រយុទ្ធជំងឺ COVID-19 រួមមានរដ្ឋមន្ត្រីសុខាភិបាល និងការងារជាដើម។ រដ្ឋការបរទេស ការពារជាតិ មហាផ្ទៃ និងច្បាប់ ក៏មិនត្រូវបានផ្លាស់ប្ដូរ។
ដោយសារមានការតែងតាំងមន្ត្រីវ័យក្មេងបន្ថែម គេសង្កេតឃើញក្រសួងខ្លះមានរដ្ឋមន្ត្រីពីរដូចជាក្រសួងការបរទេស, ហិរញ្ញវត្ថុ, ច្បាប់, អភិវឌ្ឍជាតិ, ចីរភាព និងបរិស្ថាន និងពាណិជ្ជកម្ម និងឧស្សាហកម្មជាដើម។ សម្រាប់សិង្ហបុរី នេះមិនមែនជារឿងចម្លែកឡើយដែលក្រសួងមួយមានរដ្ឋមន្ត្រីពីរ ដែលវាអាស្រ័យលើទំហំការងារក្នុងក្រសួងនីមួយៗ។
ជារួម សមាសភាពរដ្ឋាភិបាលថ្មីមានចំនួន៣៧នាក់។ គណៈរដ្ឋមន្ត្រីថ្មីនឹងចូលកាន់តំណែងផ្លូវការនៅថ្ងៃទី២៧ ខែកក្កដា៕
Tag:
សិង្ហបុរី
លី សៀនឡុង
© រក្សាសិទ្ធិដោយ thmeythmey.com