ជាតិ
រមណីយដ្ឋានធម្មជាតិ «រលុះធំ» នៅឧត្តរមានជ័យ មានដីច្រោះផុសជាជួរៗដ៏កម្របំផុត
× រមណីយដ្ឋានរលុះធំ បានក្លាយជាគោលដៅទេសចរណ៍ថ្មីមួយ របស់ខេត្តឧត្តរមានជ័យ។ រមណីយដ្ឋានទេសចរណ៍ធម្មជាតិ រលុះធំ ស្ថិតក្នុងភូមិត្រពាំងទូង សង្កាត់កូនក្រៀល ក្រុងសំរោង ខេត្តឧត្តរមានជ័យ និងខាងជើងឈៀងខាងលិច នៃភូមិក្បាលចាស់ចម្ងាយប្រហែល ៦គីឡូម៉ែត្រ។
ផ្ទាំងដីច្រោះផុសត្រដែតឡើងជាជួរៗ នៅរមណីយដ្ឋានរលុះធំ គឺជាទស្សនីយភាពដ៏ប្លែក និងកម្រមាននៅតំបន់ទេសចរណ៍នានានៅកម្ពុជា។ ក្រៅពីដីច្រោះធម្មជាតិដ៏ប្លែកភ្នែកហើយ ដីច្រោះទាំងនេះ នឹងបញ្ចេញពណ៌មាស នៅពេលពន្លឺព្រះអាទិត្យបញ្ចេញរស្មី ប៉ះចំផ្ទាំងដីដែលរឹងដូចថ្មទាំងនោះ ហើយបង្កើនសម្រស់ រលុះធំ ឲ្យកាន់តែទាក់ទាញអស្ចារ្យមួយកម្រិតទៀត។
លោកស្រី ធិន នីមុន្នីរស្មី ប្រធានមន្ទីរទេសចរណ៍ខេត្តឧត្តរមានជ័យ ថ្លែងប្រាប់សារព័ត៌មាន Thmeythmey25 ថារមណីយដ្ឋានរលុះធំ មានភ្ញៀវទេសចរកើនឡើង ចាប់តាំងពីឆ្នាំ២០១៩ មកហេដ្ឋារចនាសម្ព័ន្ធបានទៅដល់ និងមានការផ្សព្វផ្សាយ ពីរូបភាពនៃសម្រស់ដ៏ទាក់ទាញ របស់ដីច្រោះទាំងនោះ របស់មន្ទីរទេសចរណ៍ខេត្ត និងភ្ញៀវទេសចរដែលទៅលេងនៅតំបន់នោះ។
លោកស្រី នីមុន្នីរស្មី បន្ថែមថា៖«មន្ទីរទេសចរណ៍បានសិក្សាពីតំបន់នេះ តាំងពីឆ្នាំ២០០៦មកម្ល៉េះ តែដោយសារហេដ្ឋារចនាសម្ព័ន្ធមិនទាន់ទៅដល់ ទើបទីនោះមិនទាន់ល្បី។ ក្រោយពីហេដ្ឋារចនាសម្ព័ន្ធផ្លូវកៅស៊ូទៅដល់ ធ្វើឲ្យដីរលុះនោះ លេចត្រដែតនៅនឹងមាត់ផ្លូវជាតិ ធ្វើឲ្យទេសចរងាយស្រួលទៅដល់ ទើបតំបន់ដីរលុះធម្មជាតិមួយនេះ មានភាពល្បីល្បាញ»។
តាមប្រធានមន្ទីរទេសចរណ៍ខេត្ត ក្រៅពីទស្សនីយភាពដីច្រោះពណ៌មាសដ៏កម្រហើយនោះ ភ្ញៀវទេសចរ អាចបោះតង់សម្រាក គយគន់ផ្កាព្រៃច្រើនប្រភេទដែលដាំដោយសហគមន៍ អមជាមួយព្រៃឈើនៅជើងភ្នំដងរែកផងដែរ។ កាលពីឆ្នាំ២០១៩ តំបន់ទេសចរណ៍ធម្មជាតិមួយនេះ ទាក់ទាញភ្ញៀវទេសចរបានជាង១ម៉ឺននាក់។ នេះបើតាមប្រធានមន្ទីរទេសចរណ៍ខេត្ត។
សូមជម្រាបថា ក្រៅពីរមណីយដ្ឋានធម្មជាតិរលុះធំ ខេត្តឧត្តរមានជ័យក៏មានរមណីយដ្ឋានដ៏ទាក់ទាញមួយចំនួនទៀតដែរ ដូចជាតំបន់ទេសចរណ៍ប្រវត្តិសាស្ត្រ សារមន្ទីរផ្ទះតាម៉ុក និង ប្រាសាទតាមាន់-តាក្របី ជាដើម៕
Tag:
ទេសចរណ៍
ដីច្រោះ
ដីរលុះ
រលុះធំ
© រក្សាសិទ្ធិដោយ thmeythmey.com