COVID-19
អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
អាមេរិក នៅថ្ងៃទី២៤ ខែកក្កដា បានចេញបម្រាមថ្មីមួយទៀតទាក់ទងនិស្សិតបរទេស។ ក្នុងសេចក្ដីណែនាំថ្មី និស្សិតបរទេសដែលចុះឈ្មោះចូលរៀននៅតាមសាកលវិទ្យាល័យអាមេរិក នឹងមិនអាចជាន់ទឹកដីអាមេរិកបានឡើយ បើសាលារៀនរបស់ពួកគេ ផ្ដល់ការបង្រៀនតាមប្រព័ន្ធអនឡាញទាំងស្រុងនោះ។
ក្នុងសេចក្ដីប្រកាសរបស់អង្គភាពអន្តោប្រវេសន៍ និងគយ (ICE) និស្សិតបរទេសដែលត្រូវបន្តការសិក្សានៅអាមេរិកនៅឆមាសខាងមុខ មិនត្រូវបានអនុញ្ញាតឲ្យចូលទឹកដីអាមេរិក ក្នុងករណីសាលារៀនដែលពួកគេបានចុះឈ្មោះ សម្រេចបង្រៀនតាមអនឡាញពេញលេញ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការរាតត្បាតជំងឺ COVID-19 បង្កផលប៉ះពាល់យ៉ាងខ្លាំងដល់ប្រព័ន្ធអន្តរជាតិ ហើយអាមេរិកដែលជាទិសដៅរបស់និស្សិតបរទេសរាប់សិបម៉ឺននាក់ ក៏មិនខុសគ្នាដែរ។ មិនទាន់មានការសម្រេចចិត្តណាមួយពាក់ព័ន្ធការបង្រៀនអនឡាញ ឬយ៉ាងណាឡើយ ប៉ុន្តែប្រធានាធិបតីអាមេរិក ដូណាល់ ត្រាំ ចង់ឲ្យសាលារៀនទាំងអស់បើកទ្វារទទួលសិស្សឡើងវិញ។ បំណងនេះ រងការរិះគន់ខ្លាំងព្រោះអាចប៉ះពាល់សុខភាពសិស្សតាមរយៈការឆ្លង ឬចម្លងជំងឺផ្លូវដង្ហើមនេះ។
នេះជាការផ្លាស់ប្ដូរគោលនយោបាយលើកទីបីរបស់រដ្ឋបាលលោក ត្រាំ ទាក់ទងនិស្សិតបរទេសដែលជាប្រភពចំណូលសំខាន់មួយរបស់សាកលវិទ្យាល័យអាមេរិក។ ពីដំបូង រដ្ឋបាលរបស់លោក រងប្រតិកម្មយ៉ាងខ្លាំងក្រោយចេញការណែនាំមិនបន្តទិដ្ឋាការឲ្យនិស្សិតបរទេសដែលកំពុងរៀននៅអាមេរិក បើពួកគេត្រូវរៀនតាមអនឡាញ។ ស្ថាប័នអប់រំអាមេរិក ក៏ប្ដឹងទៅតុលាការឲ្យរកខុសត្រូវ។ នៅថ្ងៃទី១៤ ខែកក្កដា រដ្ឋាភិបាលអាមេរិក ក៏លុបចោលការណែនាំនេះវិញ។
វិធានការខាងលើនេះ ត្រូវគេមើលឃើញថា ជាការដាក់សម្ពាធរបស់លោក ត្រាំ សាលារៀនអាមេរិកដើម្បីឲ្យពួកគេបើកទ្វារឡើងវិញ ខណៈសាលារៀនភាគច្រើន ហាក់ប្រយ័ត្នប្រយែងក្នុងការធ្វើបែបនវ នៅពេលដែលជំងឺ COVID-19 មិនទាន់ធូរស្រាលផងនោះ។ សម្រាប់លោក ត្រាំ វត្តមានសិស្សក្នុងថ្នាក់រៀន ជាសញ្ញានៃការវិលត្រឡប់ទៅរកប្រក្រតីភាពវិញ ទោះជាស្ថានការណ៍ជាក់ស្ដែងខុសពីការចង់បានរបស់លោកក្ដី។
គិតត្រឹមថ្ងៃទី២៤ ខែកក្កដា អាមេរិកមានករណីឆ្លងសរុបជាង៤លាន២សែននាក់ និងស្លាប់ជិត១៥ម៉ឺននាក់៕
Tag:
អាមេរិក
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
