ជាតិ
អ្នកស្រុកស្វាយលើ និងបន្ទាយស្រី កំពុងមមាញឹកប្រមូលផលផ្សិតក្ងោក និងផ្សិតទន្សោង រូបភាពពីAKP
× សៀមរាប៖ ប្រជាពលរដ្ឋនៅស្រុកស្វាយលើ និងស្រុកបន្ទាយស្រី ខេត្តសៀមរាប ចាប់ផ្ដើមប្រមូលផលផ្សិតក្ងោក និងផ្សិតទន្សោង នៅក្នុងតំបន់អភិរក្សព្រៃឈើ ដែលស្ថិតនៅក្រោមការគ្រប់គ្រងដោយសង្កាត់រដ្ឋបាលព្រៃឈើកន្ទួតខ្នារក្រៅ។ ពលរដ្ឋនៅតំបន់នេះ តែងតែប្រមូលផលផ្សិត និងទិន្នផលព្រៃឈើផ្សេងទៀត ចាប់ពីខែកក្កដា ដល់ចុងខែសីហា ជារៀងរាល់ឆ្នាំ។ នេះបើតាមទីភ្នាក់ងារព័ត៌មានកម្ពុជា(AKP)។
AKP បានស្រង់សម្តីលោក សេង លន នាយកសង្កាត់រដ្ឋបាលព្រៃឈើកន្ទួតខ្នារក្រៅ បានបញ្ជាក់ថា ប្រជាពលរដ្ឋតត្រូវបានតម្រូវឲ្យសុំការអនុញ្ញាត មុននឹងអាចចូលប្រមូលអនុផលធម្មជាតិ នៅក្នុងតំបន់អភិរក្សនេះ។ បើតាមលោក សេង លន កាលពីពេលធ្លាក់ភ្លៀងដំបូង ក្នុងខែមេសាកន្លងមក ប្រជាពលរដ្ឋទទួលបានផលផ្សិតប៉ក់ និងប្រភេទបន្លែព្រៃ ហើយដល់ខែកក្កដានេះ ពលរដ្ឋចាប់ផ្ដើមប្រមូលផលផ្សិតក្ងោក និងផ្សិតទន្សោង។
ប្រជាពលរដ្ឋដែលមកដកផ្សិតនៅក្នុងតំបន់នេះ ក៏ត្រូវបានស្រង់សម្តីដោយ AKP ដែរ។ ទីភ្នាក់ងារមួយនេះ ពលរដ្ឋអាចដកផ្សិតបានពី៥ ទៅ១០គីឡូក្រាម ក្នុងមួយថ្ងៃ និងអាចលក់បានតម្លៃ២ម៉ឺនរៀលក្នុងមួយគីឡូក្រាម។ សល់ពីលក់ ពួកគាត់ទុកបរិភោគ៕
© រក្សាសិទ្ធិដោយ thmeythmey.com