អន្តរជាតិ
លោកស្រី យីងឡាក់ ស្នើឲ្យអង្គភាពប្រឆាំងពុករលួយថៃផ្តោតការងាររដ្ឋាភិបាលបច្ចុប្បន្ន ជាងសើរើសំណុំរឿងលោកស្រី
×![]()
អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ បានទទូចឲ្យអង្គភាពប្រឆាំងអំពើពុករលួយថៃផ្តោតការយកចិត្តទុកដាក់ និងតាមដានការបំពេញមុខងារ និងភារកិច្ចរបស់រដ្ឋាភិបាលថៃបច្ចុប្បន្ន ដែលមានលោកនាយករដ្ឋមន្ត្រី ប្រាយុទ្ធ ចន្ទអូចា ជាប្រមុខ ជាជាងសើរើសំណុំរឿងរបស់រដ្ឋាភិបាលលោកស្រី។ លោកស្រី មិនចង់ឃើញអង្គភាពមួយនេះ ដាក់មុខសញ្ញាតែលើអ្នកប្រឆាំងរដ្ឋាភិបាលនោះទេ។
ទំនងជាទ្រាំលែងបាននឹងទង្វើដដែលៗរបស់រដ្ឋាភិបាលថៃ ដែលពីមុនជារដ្ឋាភិបាលយោធានោះ លោកស្រី យីងឡាក់ ស៊ីណាវ៉ាត់ នៅថ្ងៃទី២៣ ខែកក្កដា កន្លងទៅ បានចេញប្រតិកម្មមួយតបទៅនឹងគណៈកម្មការជាតិប្រឆាំងអំពើពុករលួយ ដែលបានចោទប្រកាន់លោកស្រី និងមន្ត្រីក្រោមឱវាទរបស់លោកស្រីពីបទរំលោភអំណាចមុខងារសាធារណៈ។
តាមការចុះផ្សាយរបស់សារព័ត៌មាន Bangkok Post អតីតនាយករដ្ឋមន្ត្រីស្ត្រីដំបូង និងតែមួយរបស់ថៃរូបនេះ តាមរយៈគណនីហ្វេសប៊ុករបស់លោកស្រី បានចោទជាសំណួរថាតើហេតុអ្វីគណៈកម្មាធិការជាតិប្រឆាំងអំពើពុករលួយ អនុវត្តនីតិវិធីយ៉ាងឆាប់រហ័សក្នុងបទចោទប្រកាន់លោកស្រីដល់ពីរសំណុររឿង ទាំងចំពោះមុខគណៈកម្មាធិការនេះ មានរឿងច្រើនលើសកម្មភាពរដ្ឋាភិបាលបច្ចុប្បន្ននោះ។
លោកស្រី យីងឡាក់ ដែលបច្ចុប្បន្នហ៊ុមព័ទ្ធទៅដោយការចោទប្រកាន់ពីតុលាការថៃច្រើនស្រាប់ហើយនោះ បានកត់សម្គាល់ថា អ្នកនយោបាយ ឬអតីតអ្នកនយោបាយ ដែលប្រឆាំងនឹងរដ្ឋាភិបាល តែងត្រូវបានស្ថិតក្នុងការចោទប្រកាន់ ឬការសង្ស័យប្រព្រឹត្តបទល្មើសៗ ខណៈដែលក្រុមអ្នកដែលនៅកាន់អំណាច តែងតែត្រូវជានិច្ច។
សូមជម្រាបបន្តិចថា នៅថ្ងៃ២២ កក្កដាកន្លងទៅ គណៈកម្មាធិការជាតិប្រឆាំងអំពើពុករលួយថៃ បានអះអាងថា បានរកឃើញភស្តុតាងមួយចំនួនដែលបង្ហាញថា លោកស្រី យីងឡាក់ និងអគ្គលេខាធិការរបស់លោកស្រី រួមទាំងឧបនាយករដ្ឋមន្ត្រីមួយរូប បានរំលោភច្បាប់ក្នុងការដាក់ដេញថ្លៃគម្រោងអភិវឌ្ឍន៍ជាតិ ដែលមានទំហំទឹកប្រាក់រាប់លានដុល្លារ។
គិតចាប់ពីលោកស្រី យីងឡាក់ ស៊ីណាវ៉ាត់ ត្រូវបានទម្លាក់ចេញពីមុខតំណែងតាមរយៈរដ្ឋប្រហារយោធាមក លោកស្រី ត្រូវបានតុលាការថៃចោទប្រកាន់ពីបទល្មើសជាបន្តបន្ទាប់ ហើយលោកស្រី ក៏ត្រូវបានតុលាការហាមមិនឲ្យធ្វើនយោបាយទៀតផង៕
Tag:
ថៃ
អាស៊ាន
© រក្សាសិទ្ធិដោយ thmeythmey.com
