COVID-19
អន្តរជាតិ
ចិន រាយការណ៍ករណីឆ្លង COVID-19 ចំនួន៦១ ដែលជាតួលេខខ្ពស់បំផុតតាំងពីខែមេសា ក្រុមពេទ្យចិន ធ្វើតេស្តរកកូរ៉ូណាវីរុសលើប្រជាជនក្នុងក្រុង Urumqi ខេត្តស៊ីនជាំង នៅថ្ងៃទី២០ ខែកក្កដា ឆ្នាំ២០២០។ រូបភាព៖ Xinhua
× ចិន នៅថ្ងៃទី២៧ ខែកក្កដា បានរាយការណ៍ករណីឆ្លង COVID-19 ថ្មីចំនួន ៦១ករណី។ ចំនួននេះ គឺជាអត្រាឆ្លងច្រើនបំផុតក្នុងមួយថ្ងៃ បើគិតចាប់ពីពាក់កណ្តាលខែមេសាកន្លងមក។ ភាគច្រើននៃករណីឆ្លងថ្មីនេះ គឺនៅក្នុងខេត្តស៊ីនជាំង។
ករណីឆ្លង COVID-19 ក្នុងប្រទេសចិន បានកម្រើកឡើងជាថ្មី។ នៅថ្ងៃទី២៦ ខែកក្កដា ចិនបានរាយការណ៍ថា មានករណីឆ្លងCOVID-19 ចំនួន ៤៦ករណី។ នៅថ្ងៃទី២៧ ខែកក្កដា ករណីCOVID-19 នៅចិន បានកើនដល់ ៦១ករណី។ បើតាមសេចក្តីថ្លែងការណ៍របស់គណៈកម្មការសុខាភិបាលជាតិចិន ខេត្តស៊ីនជាំងមានករណីឆ្លងកូរ៉ូណាវីរុសចំនួន ៤១ករណី ខេត្តលាវនីងមានចំនួន ១៤ករណី ខេត្តជីលីនមានពីរករណី ហើយករណីនាំចូលមាន៤។
តួលេខ ៦១ករណីនេះ គឺជាចំនួនខ្ពស់បំផុត បើគិតចាប់ពីថ្ងៃទី១៤ ខែមេសាកន្លងមក ដែលមានករណីឆ្លងក្នុងថ្ងៃនោះរហូតដល់ ៨៩ករណី។ កាលនោះ ករណីភាគច្រើន គឺនាំចូលមកពីបរទេស។ ទន្ទឹមនេះ ចិនក៏មានអ្នកជំងឺ ដែលមិនចេញរោគសញ្ញាចំនួន ៤៤នាក់ថ្មីផងដែរ។
ដើម្បីបង្ការការរាតត្បាតនៃCOVID-19 ចិនបានបង្កើនការធ្វើតេស្តលើប្រជាជន។ តាមការចុះផ្សាយរបស់ទីភ្នាក់ងារព័ត៌មាន AFP ចិនបានធ្វើតេស្តរកកូរ៉ូណាវីរុសលើប្រជាជនក្នុងក្រុងតាលៀន ខេត្តលាវនីងជាច្រើនម៉ឺននាក់។ ចំណែកនៅក្នុងក្រុង Urumqi ខេត្តស៊ីនជាំងវិញ មន្ត្រីសុខាភិបាលចិន បានធ្វើតេស្តលើប្រជាជនប្រមាណ២,៣លាននាក់ ក្នុងចំណោមប្រជាជនសរុបក្នុងក្រុង ៣,៥លាន។
ករណីឆ្លងថ្មីនៅខេត្តជីលីន ត្រូវបានប្រកាសប៉ុន្មានថ្ងៃក្រោយប្រធានាធិបតី ស៊ី ជិនភីង ចុះត្រួតពិនិត្យក្នុងខេត្តមួយនេះ។
សូមបញ្ជាក់ថា នាពេលកន្លងមក អាជ្ញាធរចិន បានសម្រេចបិទក្រុង Dalian និងក្រុងUrumqi ដើម្បីទប់ស្កាត់ការរាតត្បាត COVID-19 ។ តួលេខសរុបCOVID-19 របស់ចិនមានចំនួន ៨៣៨៩១ករណី អ្នកស្លាប់មានចំនួន ៤៦៣៤នាក់ និងអ្នកជាសះស្បើយមានចំនួន ៧៨៩១៨នាក់៕
© រក្សាសិទ្ធិដោយ thmeythmey.com