Juventus និង Bayern Munich រក្សា​តំណែង​ជើងឯក​ជាប់​គ្នា​ជិត​១០​ឆ្នាំ​
កីឡាអន្តរជាតិ
អន្តរជាតិ
Juventus និង Bayern Munich រក្សា​តំណែង​ជើងឯក​ជាប់​គ្នា​ជិត​១០​ឆ្នាំ​
27, Jul 2020 , 3:08 pm        
រូបភាព
​ភ្នំពេញ​៖ គិត​ត្រឹម​ថ្ងៃទី​២៧ កក្កដា​នេះ ការប្រកួត​បាល់ទាត់​ក្នុង​ក្របខណ្ឌ​លី​គ​នីមួយៗ នៅ​តំបន់​អឺរ៉ុប បាន​បិទ​បញ្ចប់​រដូវ​កាល ២០១៩-២០២០ បណ្ដើរៗ​ហើយ ក្រោមរូបភាព​នៃ​ការ​រាតត្បាត​នៃ​ជំងឺ​កូ​វីដ​-១៩​។ ក្រោយ​បញ្ចប់​រដូវ​កាល គេ​ឃើញ​មាន​ក្លិប​ធំៗ​ចំនួន​ពីរ គឺ Juventus និង Bayern Munich នៅ​បន្ត​រក្សា​គ្រង​តំណែង​ជើងឯក​ជាប់​គ្នា​ជិត​១០​ឆ្នាំ​។​



​ដោយ​មិន​និយាយ​ពី​ក្លិប​ផ្សេងៗ​នៅក្នុង​លី​គ​តូចៗ ក្រៅពី​តំបន់​លី​គ​ធំ​នៅ​តំបន់​អឺរ៉ុប​នោះ ក្លិប​យក្ស​នៅ​អ៊ីតាលី Juventus ដែលមាន​រហស្សនាម សេះបង្កង បាន​លើក​ពាន​ក្របខណ្ឌ Lega Serie A ចំនួន​៩​ឆ្នាំ​ជាប់​គ្នា​ហើយ បើ​គិត​ចាប់ពី​រដូវ​កាល​ឆ្នាំ​២០១១​ដល់​២០២០​។ រដូវ​កាល​ឆ្នាំ​២០១៩-២០២០​នេះ Juventus ដែល​បានប្រកាស​អបអរ​ការ​លើក​ពាន​របស់ខ្លួន នៅក្នុង​រដូវ​កាល​នេះ ក្រោយ​យកឈ្នះ​២​ទល់​០ លើ​ក្លិប Samdoria នា​ថ្ងៃទី​២៧ កក្កដា​។ បច្ចុប្បន្ននេះ គិត​ត្រឹម​សប្ដាហ៍​ទី​៣៦ Juventus កំពុងមាន​៨៣​ពិន្ទុ​ក្នុង​ដៃ ខណៈ​ក្លិប Inter Milan តាម​ពីក្រោយ​មាន​៧៦​ពិន្ទុ​។ ក្លិប​ទាំងពីរ​នៅសល់​២​ប្រកួត​ក្នុង​ដៃ​ដូចគ្នា​។ ដូច្នេះ​Juventus នៅតែ មានប្រៀប​លើ​គូប្រកួត​ប្រជែង​ខ្លួន​ដដែល​។​
 
​ត្រង់ចំណុច​នេះ មានន័យថា ទោះបីជា​ក្លិប Juventus ឈ្នះ ឬក៏​ចាញ់​ទាំងពីរ​ប្រកួត​ចុងក្រោយ​ក្តី ក៏​ក្លិប​សេះបង្កង​មួយ​នេះ នៅតែ​លើក​ពាន​ដែរ ព្រោះ​គេ​នាំមុខ​គូប្រកួត​ខ្លួន​៧​ពិន្ទុ ពោល​បើ​Inter ឈ្នះ​ទាំងពីរ​ប្រកួត​ចុងក្រោយ គឺ​ឡើង​៨២​ពិន្ទុ ចាញ់ Juventus ១​ពិន្ទុ​។ ជ័យជម្នះ​៩​ឆ្នាំ​ជាប់​គ្នា​នៃ​ពាន Serie A នេះ ក៏​ជា​ពាន​លើក​ទី​៣៦ របស់​Juventus ដែរ បើ​គិត​ចាប់ពី​ឆ្នាំ​១៩០៥ មក​។ គួរ​បញ្ជាក់ថា ពាន​ក្របខណ្ឌ​អ៊ីតាលី​ដំបូង​បង្កើតឡើង​នៅ​ឆ្នាំ​១៨៩៨ ដែលមាន​ឈ្មោះ​ដើម​ថា Campionato Italiano di Football មុននឹង​ប្ដូរ​ឈ្មោះ​ជា​បន្ត​បន្ទាប់មក Serie A Football league​។​
 
​ដោយឡែក​ក្លិប Bayern Munich វិញ ក៏បាន​ឈ្នះ​ពានរង្វាន់​នៃ​ក្របខណ្ឌ Bundesliga របស់​អាល្លឺម៉ង់ ចំនួន​៨​ដង​ជាប់​គ្នា​ដែរ បើ​គិតពី​ឆ្នាំ​២០១២ ដល់​២០២០​នេះ​។ រដូវ​កាល​ឆ្នាំ​២០១៩-២០២០​នេះ Bayern Munich បានបញ្ចប់​ការប្រកួត​ទាំង​៣៤ ដោយ​ឈ្នះ​២៦ ប្រកួត ស្មើ​៤ និង​ចាញ់​៤ មាន​៨២​ពិន្ទុ តាម​ពីក្រោយ​ដោយ​ក្លិប Borussia Dortmund ដែលមាន​៦៩​ពិន្ទុ​ក្នុង​ដៃ​។ បើ​គិតពី​ឆ្នាំ​១៩៦៥​មក ក្លិប​Bayern Munich ក្លាយជា​ម្ចាស់​ជើងឯក​នៃ​ពានរង្វាន់​ក្របខណ្ឌ Bundesliga របស់​អាល្លឺម៉ង់​នេះ ចំនួន​២៩​លើក​ហើយ ។ ពាន​ក្របខណ្ឌ Bundesliga នេះ ត្រូវបាន​បាន​បង្កើតឡើង​តាំងពី​ឆ្នាំ​១៩៦៣ មក​។ 
 
​ចំណែក​ក្លិប​យក្ស​នៅ​បារាំង​វិញ គឺ Paris Saint-Germain ក៏បាន​ឈ្នះ​ពាន​ក្របខណ្ឌ League 1 របស់​បារាំង​៣​ឆ្នាំ​ជាប់​គ្នា​ដែរ បើ​គិតពី​រដូវ​កាលពី​២០១៧​ដល់​២០២០​នេះ​។ រដូវ​កាល​២០១៩-២០២០ នេះ Paris គ្រង​តំណែង​ជើងឯក ដោយ​ស្វ័យប្រវត្តិ ដែលជា​ការសម្រេច​ពី​សហព័ន្ធ និង​ក្រោយពី​រដ្ឋាភិបាល បានប្រកាស​បិទ​គ្រប់​កីឡាករ​ទាំងអស់​នៅ​ប្រទេស​បារាំង ដោយសារ​ការ​រាតត្បាត​នៃ​ជំងឺ​កូ​វីដ​-១៩​។​
 
​រីឯ​ក្លិប​អធិរាជ​យក្ស​«​ស​» ប្រចាំ​ប្រទេស​អេស្បាញ គឺ Real Madrid ក៏បាន​លើក​ពាន​ក្របខណ្ឌ La Liga Santander ដោយ​ពិន្ទុ​៨៧ នាំមុខគេ​នៅ​កំពូល​តារាង ក្នុងការ​ប្រកួត​ចំនួន​៣៨​លើក នា​រដូវ​កាល​២០១៩-២០២០​នេះដែរ ពោលគឺ​នាំមុខ​ម្ចាស់​ជើងឯក​ចាស់​ក្លិប​អ្នកបុណ្យ Barcelona ចំនួន​៥​ពិន្ទុ​។ ជ័យជម្នះ​លើក​ទី​៣៤ នៃ​ពានរង្វាន់ La Liga របស់ Real Madrid នេះ ក៏បាន​រារាំង​ដំណើរ​របស់​ក្លិប Barcelona មិនឱ្យ​ឈ្នះ​ពាន​៣​ឆ្នាំ​ជាប់​គ្នា​នោះទេ​(២០១៧​ដល់​២០១៩)​។ 
 
Liverpool ឯណោះ​វិញ ក៏បាន​រារាំង Manchester City មិនឱ្យ​លើក​ពាន​៣​ឆ្នាំ​ជាប់​គ្នា (២០១៧​ដល់​២០១៩)​ដែរ​។ Liverpool បាន​លើក​ពានរង្វាន់ Premier League ជា​លើកដំបូង​ក្នុង​រយៈពេល ៣០ ឆ្នាំ​នៅលើ​ទឹកដី Anfield កាលពី​ថ្ងៃទី​២២ កក្កដា ។ ជ័យជម្នះ Liverpool នៅ​រដូវ​កាល​នេះ ក្រោម​លទ្ធផល​៩៩​ពិន្ទុ ខណៈ​ក្រុម​មេឃ​ខៀវ Manchester City មានតែ​៨១​ពិន្ទុ ឈរ​លេខ​រៀង​ទី​២​។ 
 
​ក្លិប​បាល់ទាត់​Liverpool ត្រូវបាន​បង្កើតឡើង​នៅ​ឆ្នាំ​១៨៩២ ដោយ​លោក John Houlding អ្នកជំនួញ​ម្នា​ក់នៅ​អង់គ្លេស​។ គិត​ចាប់ពី​ឆ្នាំ​១៩០០​ដល់​ឆ្នាំ​១៩៩០ Liverpool បាន​លើក​ពានរង្វាន់ Football League First Division ចំនួន​១៨​លើក មុននឹង​គេ​ប្តូរ​ឈ្មោះ​មកជា​ពានរង្វាន់ England Premier League នៅ​ឆ្នាំ​១៩៩២​។ ចាប់តាំងពី​ការប្ដូរឈ្មោះ​ពាន​នេះ​មក Liverpool គ្មាន​សំណាង​បាន​លើក​ពាន​នេះឡើយ ទើបតែ​រដូវ​កាល​ឆ្នាំ​២០១៩-២០២០​នេះ​ទេ​៕
 

Tag:
 បាល់ទាត់​
  កីឡា
© រក្សាសិទ្ធិដោយ thmeythmey.com