COVID-19
ជាតិ
បារាំងផ្ដល់ហិរញ្ញប្បទានឥតសំណង១.៥លានអឺរ៉ូ ដើម្បីចូលរួមស្ដារវិស័យទេសចរណ៍កម្ពុជា រូបភាពជំនួបរវាងទីភ្នាក់ងារអភិវឌ្ឍន៍បារាំង(AFD) និងក្រសួងទេសចរណ៍ នៅថ្ងៃទី២៣ ខែកក្កដា ឆ្នាំ២០២០
× ភ្នំពេញ៖ រដ្ឋាភិបាលបារាំង តាមរយៈទីភ្នាក់ងារអភិវឌ្ឍន៍បានរាំង (AFD) បានផ្ដល់ហិរញ្ញប្បទានឥតសំណងចំនួន ១.៥លានអឺរ៉ូ (ប្រមាណ១.៧លានដុល្លារ) ដើម្បីចូលរួមស្ដារឡើងវិញនូវវិស័យទេសចរណ៍កម្ពុជា ក្រោយវិបត្តិកូវីដ-១៩។ បើតាមទំព័រហ្វេសប៊ុកផ្លូវការ របស់ក្រសួងទេសចរណ៍។
ក្នុងជំនួបរវាងក្រសួងទេសចរណ៍ និងទីភ្នាក់ងារអភិវឌ្ឍន៍បារាំង(AFD) នៅថ្ងៃទី២៣ ខែកក្កដាកន្លងទៅ លោក ណេប សាមុត អគ្គនាយកគ្រប់គ្រងឧស្សាហកម្មទេសចរណ៍ និងជាអគ្គលេខាធិការនៃគណៈកម្មាធិការជាតិ វាយតម្លៃទីក្រុងស្អាត នៃក្រសួងទេសចរណ៍ បានបញ្ជាក់ហិរញ្ញប្បទាន ១.៥លានអឺរ៉ូ នឹងប្រើប្រាស់លើគម្រោងសកម្មភាពចំនួន២៤សម្រាប់ចូលរួមផែនការស្ដារឡើងវិញវិស័យទេសចរណ៍ កម្ពុជាក្រោយវិបត្តិនៃជំងឺកូវីដ-១៩ក្នុងពេល និងក្រោយវិបត្តិកូវីដ-១៩។
លោក ណេប សាមុត ក្នុងជំនួបរវាងទីភ្នាក់ងារអភិវឌ្ឍន៍បារាំង(AFD) និងក្រសួងទេសចរណ៍ នៅថ្ងៃទី២៣ ខែកក្កដា ឆ្នាំ២០២០
ក្នុងអំឡុងពេលការរីករាលដាល និងទប់ស្កាត់ការរាលដាលនៃជំងឺកូវីដ-១៩ វិស័យទេសចរណ៍ក្នុងប្រទេសកម្ពុជា បានទទួលការប៉ះពាល់យ៉ាងធ្ងន់ធ្ងរ ដោយសារបាត់បង់ភ្ញៀវទេសចរអន្តជាតិ បណ្តាលមកពីការបិទជើងហោះហើរ ពីបណ្តាប្រទេសមួយចំនួន។
ក្នុងជំនួបនេះ ភាគីទាំងពី ក៏បានផ្លាស់ប្ដូយោបល់គ្នាជុំវិញ ការដាក់ចេញវិធានគាំទ្រវិស័យទេសចរណ៍កម្ពុជា ក្នុងដំណាក់កាលជំងឺកូវីដ១៩ និងចាប់ផ្ដើមអនុវត្តន៍ វិធានសុវត្តិភាពទេសចរណ៍ ការជំរុញចលនាទេសចរណ៍ក្នុងស្រុក ដើម្បីធានាថាកម្ពុជាជាគោលដៅទេសចរណ៍គុណភាព និងផ្តល់ភាពកក់ក្ដៅដល់ភ្ញៀវទេសចរ ព្រមទាំងបានពិភាក្សាបន្ថែមអំពីធាតុចូល (Inputs)សម្រាប់ការរៀបចំផែនទីចង្អុលផ្លូវ សម្រាប់ត្រៀមស្ដារឡើងវិញ នៃកំណើនទេសចរណ៍ ឆ្នាំ២០២០-២០២៣។
សូមបញ្ជាក់ថា គម្រោងអភិវឌ្ឍន៍ទាំង២៤នេះ មានធាតុចូលសំខាន់ៗចំនួន៣ ដែលមានដូចជាការជួយពង្រឹងអភិបាលកិច្ចក្នុងវិស័យទេសចរណ៍ ដែលមានការជួយពង្រឹងសមត្ថភាព ពង្រឹងរចនាសម្ព័ន្ធវិស័យឯកជន នៅក្នុងឧស្សាហកម្មទេសចរណ៍។ ការជួយពង្រឹងសមត្ថភាពស្ថាប័ន និងភាពជាដៃគូរដ្ឋនិងឯកជន។ ការជួយរៀបចំគម្រោងចាំបាច់ ដើម្បីជួយរៀបចំវិស័យទេសចរណ៍គម្រោងជួយគាំទ្រផ្នែកសិក្សាទីផ្សារ និងផ្សព្វផ្សាយគម្រោង ជួយអេកូទេសចរណ៍ ទេសចរណ៍ម្ហូបអាហារ ទេសចរណ៍ទីក្រុង៕
លោកស្រី Ophelie BOURHIS ក្នុងជំនួបរវាងទីភ្នាក់ងារអភិវឌ្ឍន៍បារាំង(AFD) និងក្រសួងទេសចរណ៍ នៅថ្ងៃទី២៣ ខែកក្កដា ឆ្នាំ២០២០
© រក្សាសិទ្ធិដោយ thmeythmey.com