នាយករដ្ឋមន្ត្រីថៃ ប្រាយុទ្ធ ចន្ទអូចា បានបញ្ជាឲ្យបើកការស៊ើបអង្កេតលើការសម្រេចចិត្តរបស់រាជអាជ្ញាថៃដែលទម្លាក់បទចោទក្នុងករណីគ្រោះថ្នាក់ចរាចរណ៍បុកប៉ូលិសស្លាប់របស់ចៅប្រុសថៅកែភេសជ្ជៈ Red Bull ថៃ។ បញ្ជានេះធ្វើឡើងក្រោយសាធារណជនថៃក្តៅក្រហាយចំពោះការទម្លាក់បទចោទ ដែលបង្ហាញពីនិទណ្ឌភាពក្នុងសង្គមថៃ ខណៈក៏មានចលនាធ្វើពហិការផលិតផលគោជល់ផង។ បើតាមឯកសារបែកធ្លាយ ហេតុផលនៅក្រោយការសម្រេចនេះ គឺផ្អែកលើការឆ្លើយបំភ្លឺរបស់សាក្សីថ្មី។
អ្នកនាំពាក្យរដ្ឋាភិបាលថៃ Narumon Pinyosinwat គូសបញ្ជាក់ថា លោកនាយករដ្ឋមន្ត្រី ប្រាយុទ្ធ ចន្ទអូចា កំពុងតាមដានរឿងនេះយ៉ាងដិតដល់ ហើយលោកបានបញ្ជាឲ្យអាជ្ញាធរប្រមែប្រមូលអង្គហេតុជុំវិញការស៊ើបអង្កេតឧក្រិដ្ឋកម្មរបស់រាជអាជ្ញាដែលទទួលបន្ទុករឿងគ្រោះថ្នាក់ដែលបង្កដោយ Vorayuth Yoovidhya ចៅប្រុសថៅកែ Red Bull ។ នេះបើតាមការចុះផ្សាយរបស់កាសែត បាងកកប៉ុស្តិ៍ នៅថ្ងៃទី ២៧ ខែកក្កដា។
បើតាមអ្នកស្រី Narumon លោក ប្រាយុទ្ធ ក៏បានសុំចិត្តអ្នករិះគន់និងប្រព័ន្ធផ្សព្វផ្សាយកុំកេងចំណេញពីរឿងចម្រូងចម្រាស ហើយនិយាយពង្វាងការពិត ឬបង្កការយល់ច្រឡំក្នុងចំណោមមតិសាធារណៈជាដើម។ ម្យ៉ាងវិញទៀត លោកនាយករដ្ឋមន្ត្រី អះអាងថា លោកមិនបានលូកដៃក្នុងដំណើរការគ្រប់គ្រងយុត្តិធម៌ ហើយរាជអាជ្ញាថៃបំពេញការងារពួកគេដោយគ្មានសម្ពាធនយោបាយណាមួយឡើយ។
លោក Vorayuth ដែលជាចៅប្រុសមហាសេដ្ឋី Chaleo Yoovidhya ដែលបានបង្កើតប្រេន ( Brand) ភេសជ្ជប៉ូវកម្លាំង Red Bull ត្រូវបានចោទប្រកាន់ក្នុងគ្រោះថ្នាក់ចរាចរណ៍ ដោយបើករថយាន្ត Ferrari ពណ៌ខ្មៅបុកប៉ូលិសម្នាក់រហូតដល់ស្លាប់កាលពីឆ្នាំ២០១២ ហើយអូសសពជាច្រើនម៉ែត្រ មុនពេលបើករត់គេចពីកន្លែងកើតហេតុ។
យ៉ាងណា នៅថ្ងៃទី២៤ ខែកក្កដា បទចោទប្រឆាំងលោក Vorayuth ចំនួន៣ រួមមាន បើកបរលើសល្បឿនកំណត់ បុកហើយរត់ និងបើកបរខ្វះធ្វេសប្រហែសរហូតដល់មានករណីស្លាប់ ត្រូវបានរាជអាជ្ញាថៃទម្លាក់ចោល។ ចំណែកប៉ូលិសថៃ ក៏បានទទួលការសម្រេចចិត្តនេះ ដោយមិនតវ៉ា។ ប្រជាជនថៃក៏នាំគ្នារិះគន់ស្ថាប័នប៉ូលិសថៃមួយជាន់ទៀត ព្រោះមិនអើពើរកយុត្តិធម៌ឲ្យសមាជិករបស់ខ្លួន។
ការសម្រេចចិត្តនេះ រងការរិះគន់យ៉ាងចាស់ដៃពីសំណាក់ប្រជាជនថៃទូទៅ ដែលចាត់ទុករឿងនេះជាឧទាហរណ៍មួយនៃវប្បធម៌អភ័យឯកសិទ្ធិរបស់ពួកអ្នកមាន ហើយពួកគេក៏ទាមទារឲ្យការិយាល័យអគ្គរាជអាជ្ញាថៃចេញបកស្រាយហេតុផលពីក្រោយការសម្រេចចិត្តនេះផងដែរ។ បើតាមបាងកកប៉ុស្តិ៍ អ្នកលេងបណ្ដាញសង្គមថៃ ភ្លាមៗ នាំគ្នានិយាយដល់រឿងដែលត្រកូលសេដ្ឋីថៃ Yoovidhya បានបរិច្ចាគលុយ ៣០០លានបាត (៩,៥លានដុល្លារ) ឲ្យរដ្ឋាភិបាលទប់ទល់ COVID-19 កាលពីខែមេសា។
ភស្តុតាងថ្មី ជាហេតុផលពីក្រោយការសម្រេចទម្លាក់បទចោលប្រឆាំង Vorayuth
បើតាមកាសែត បាងកកប៉ុស្តិ៍ មេធាវីថៃម្នាក់ដែលអះអាងថាបានឃើញឯកសារលម្អិតពីមូលហេតុរាជអាជ្ញាទម្លាក់ចោលបទចោទប្រឆាំងលោក Vorayuth និយាយថា ការសម្រេចចិត្តនេះ ធ្វើឡើងដោយផ្អែកលើលទ្ធផលនៃការឆ្លើយបំភ្លឺរបស់សាក្សីថ្មី រួមមាន អ្នកដំណើរតាមដងផ្លូវ និងមន្ត្រីបច្ចេកទេស។
ក្នុងឯកសារមួយដែលបានចែករំលែកយ៉ាងសុសសាយលើបណ្ដាញសង្គម ហើយត្រូវប្រព័ន្ធផ្សព្វផ្សាយថៃជាច្រើនបានចុះផ្សាយបន្ត ភស្តុតាងថ្មី បានបង្ហាញថា ប៉ូលិសដែលស្លាប់ក្នុងហេតុការណ៍គ្រោះថ្នាក់ចរាចរណ៍ បានជិះប្ដូរគន្លងផ្លូវភ្លាមកាត់កណ្ដាលមុខរថយន្តលោក Vorayuth ដែលកំពុងបើកបរលើគន្លងត្រឹមត្រូវហើយក្នុងកម្រិតល្បឿនកំណត់ (៨០គីឡូម៉ែត្រក្នុងមួយម៉ោង) ។
កន្លងទៅ បើតាមការសន្និដ្ឋានរបស់ប៉ូលិសចរាចរណ៍ថៃ លោក Vorayuth បានបើកបរក្នុងល្បឿន ១៧៧គីឡូម៉ែត្រក្នុងមួយម៉ោង នៅពេលរថយន្តស៊េរីទំនើប Ferrari លោកបានបុក និងសម្លាប់ប៉ូលិសថៃ លោក Wichian Klanprasert ដែលកំពុងជិះលើផ្លូវមួយក្នុងទីក្រុង បាងកក កាលពីថ្ងៃទី៣ ខែកញ្ញា ឆ្នាំ២០១២។
ចលនាធ្វើពហិការផលិតផល Red Bull
ខណៈមានចលនាធ្វើពហិការផលិតផលរបស់ Red Bull កើនឡើងក្នុងប្រទេសថៃ ក្រុមហ៊ុន TCP Group ដែលជាម្ចាស់ប្រេនភេសជ្ជៈប៉ូវកម្លាំង Red Bull ថៃ បានព្យាយាមទាញខ្លួនឯងចេញពីសំណុំរឿងគ្រោះថ្នាក់ចរាចរណ៍នេះ ដោយអះអាងថា ករណីនេះ គឺជារឿងឯកជនរបស់លោក Vorayuth។
ក្នុងសេចក្តីថ្លែងការណ៍ នៅថ្ងៃទី ២៦ ខែកក្កដា ក្រុមហ៊ុនផលិតភេសជ្ជៈឈានមុខមួយនេះ អះអាងថា ក្រុមហ៊ុន គ្មានទំនាក់ទំនងផ្ទាល់អ្វីជាមួយលោក Vorayuth ឡើយ។ ទោះជាម្ចាស់ភាគហ៊ុន៧នាក់នៃក្រុមហ៊ុន TCP Group គឺជាសមាជិកគ្រួសារ ត្រកូល Yoovidhya លោក Vorayuth គ្មានកាន់តំណែងអ្វីក្នុងក្រុមហ៊ុនដែលដឹកនាំដោយពូរបស់លោកឡើយ។
ជីតារបស់លោក Vorayuth គឺលោកមហាសេដ្ឋី Chaleo Yoovidhya ត្រូវបានជាប់ឈ្មោះជាមនុស្សមានទ្រព្យបំផុតលំដាប់ទី៣ ក្នុងប្រទេសថៃ នៅពេលលោកទទួលមរណភាពក្នុងឆ្នាំ២០១២ នៅអាយុ ៨៨ឆ្នាំ។ បើតាមការប៉ាន់ស្មានរបស់ទស្សនាវដ្តី Forbes លោកមានទ្រព្យសម្បត្តិប្រមាណ ៥ពាន់លានដុល្លារ៕