ជាតិ
សង្គមជាតិ
ស្ថាប័នពាក់ព័ន្ធ រួមគ្នាលុបបំបាត់សំឡេងចេញពីវិទ្យុ ឆ្លងចូលទៅរំខានដល់អ្នកបើកយន្តហោះ
រូបពី Cambodia Angkor Air
×![]()
ដោយ: សារព័ត៌មានថ្មីៗ
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និង លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នាថ្ងៃទី២៧ ខែកក្កដា ឆ្នាំ២០២០ បានចុះហត្ថលេខាលើសេចក្តីប្រកាសរួមគ្នាស្តីពី « វិធានការទប់ស្កាត់ និងលុបបំបាត់ការឆ្លងរំខានចូលហ្វ្រេកង់ប្រព័ន្ធឧបករណ៍វិទ្យុនាំផ្លូវ អាកាសនៅក្នុងដែនអាកាសកម្ពុជា»។ 
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ប្រាប់សារព័ត៌មានថ្មីៗ តាមទូរស័ព្ទថា សំឡេង ដែលរំខានដល់ហ្វ្រេកង់យន្តហោះ គឺចេញពីវិទ្យុ FM នានាក្នុងប្រទេសកម្ពុជា ហើយសំឡេង ដែលចេញពីប្រព័ន្ធផ្សព្វផ្សាយផ្សេងទៀត ដូចជា ទូរទស្សន៍ ជាដើម មិនបានរំខានទៅដល់ហ្វ្រេកង់យន្តហោះឡើយ។
លោក លើកឡើងថា យន្តហោះ ទទួលបានហ្វ្រេកង់ពី១១៨ MHz ទៅ ១៣៦.៩៧៥ MHz រីឯ វិទ្យុវិញ ទទួលបានហ្វ្រេកង់តែ៨៥ MHz ទៅ ១០៨ MHz ប៉ុណ្ណោះ។ លោក បន្តថា បើប្រៀបធៀប គឺមានគម្លាតពីគ្នាឆ្ងាយណាស់ ដូច្នេះ ហ្វ្រេកង់វិទ្យុ មិនគួរឆ្លងទៅប៉ះហ្វ្រេកង់យន្តហោះនោះទេ។
លោក បកស្រាយ មូលហេតុ ដែលនាំឲ្យហ្វ្រេកង់វិទ្យុ ឆ្លងប៉ះទៅដល់ហ្វ្រេកង់យន្តហោះ គឺដោយសារតែស្ថានីយវិទ្យុខ្លះ រៀបចំនិងដាក់ឧបករណ៍ មិនត្រឹមត្រូវតាមស្តង់ដានិងតាមបច្ចេកទេស។ លោក បន្ថែមថា នៅពេលសំឡេងចេញពីហ្វ្រេកង់វិទ្យុ ឆ្លងចូលទៅក្នុងហ្វ្រេកង់យន្តហោះ គឺវា រំខាន់ដល់អ្នកបើកយន្តហោះ (Pilot) ហើយធ្វើឲ្យអ្នកបើកយន្តហោះ ស្តាប់សំឡេងឆ្លើយឆ្លងគ្នាមិនបានច្បាស់។
ប្រសាសន៍របស់អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល៖«វា បង្កឲ្យមានបញ្ហាដល់គ្រោះថ្នាក់ បើអ្នកបើកយន្តហោះ ស្តាប់អត់ច្បាស់....។ អ៊ីចឹង ដល់យើងបញ្ជាការហោះហើរទៅ វា ចេះតែមានសំឡេងរំខានពីវិទ្យុ... វា មានហានិភ័យដល់ការបញ្ជាការហោះហើរ»។
អ្នកនាំពាក្យរូបនេះ បន្ថែមថា កន្លងមក ធ្លាប់មានកិច្ចសហការជាមួយក្រសួងពាក់ព័ន្ធម្តងរួចមកហើយ ក្នុងការទប់ស្កាត់និងការលុបបំបាត់សំឡេងវិទ្យុ ដែលឆ្លងទៅរំខានដល់ហ្វ្រេកង់យន្តហោះ។ លោក បញ្ជាក់ថា ដោយសារតែសំឡេងរំខាន នៅតែបន្តកើតមាន ទើបរដ្ឋលេខាធិការដ្ឋានអាកាសចរណ៍ស៊ីវិល ចុះហត្ថលេខាជាមួយក្រសួងពាក់ព័ន្ធជាថ្មី ដើម្បីទប់ស្កាត់កុំឲ្យមានសំឡេងចេញពីវិទ្យុ ទៅរំខានដល់ហ្វ្រេកង់យន្តហោះតទៅទៀត៕
Tag:
ហ្វ្រេកង់យន្តហោះ
ហ្វ្រេកង់វិទ្យុ
ផ្លូវអាកាស
© រក្សាសិទ្ធិដោយ thmeythmey.com
