ជាតិ
សង្គមជាតិ
ព្យួរការងារស្នងការរងព្រៃវែង និងនគរបាល៦នាក់ដែលទារលុយពីឪពុកម្តាយរបស់អ្នកសេពគ្រឿងញៀន
លោក ព្រុំ សន្ធរ ស្នងការខេត្តព្រៃវែង (អង្គុយនៅក្បាលតុ) ពេលដឹកនាំមន្រ្តី ចុះទៅជួបឪពុកម្តាយរបស់អ្នកសេពគ្រឿងញៀន នៅសាលាឃុំមេសរប្រចាន់ ដើម្បីសុំទោសឪពុកម្តាយទាំងនោះ ចំពោះទង្វើរបស់មន្រ្តីនគរបាល ដែលទារលុយពីពួកគាត់ ជាថ្នូរនឹងការដោះលែងកូនៗរបស់ពួកគាត់
×![]()
ដោយ: ម៉ៅ សុផា
ស្នងការរងម្នាក់នៃស្នងការដ្ឋាននគរបាលខេត្តព្រៃវែង រួមទាំងប្រធាន អនុប្រធាន និង នគរបាល៤នាក់ទៀត ក្នុងការិយាល័យគ្រឿងញៀននៃស្នងការដ្ឋាននគរបាលខេត្តព្រៃវែង ត្រូវព្យួរការងារបណ្តោះអាសន្ន ក្រោយពួកគេ សហការគ្នាទារលុយពីបណ្តាអាណាព្យាបាលរបស់អ្នកសេពគ្រឿងញៀន៦នាក់ ជាខ្មែរ-អ៊ិស្លាម ហើយក៏ដោះលែងអ្នកសេពគ្រឿងញៀនទាំង៦នាក់នោះវិញ។ 
លោក ព្រុំ សន្ធរ ស្នងការខេត្តព្រៃវែង ប្រាប់សារព័ត៌មានថ្មីៗ តាមទូរស័ព្ទ នៅព្រឹកថ្ងៃទី២៨ ខែកក្កដា ឆ្នាំ២០២០ ថា ក្រៅពីព្យួរការងារ នគរបាលទាំង៧នាក់នោះ នឹងត្រូវរងពិន័យផ្សេងទៀត។ លោក មានប្រសាសន៍ថា៖«អ្នកសេពគ្រឿងញៀន យើងចាត់ទុកជាជនរងគ្រោះ ដែលត្រូវយកទៅអប់រំ ហើយដោះលែងវិញ [ពេលបន្សាបគ្រឿងញៀនរួច]។ យើង មិនត្រូវទារលុយពីឪពុកម្តាយរបស់ពួកគេទេ»។
យ៉ាងណាក៏ដោយ លោកស្នងការ មិនបញ្ចេញឈ្មោះរបស់ស្នងការរង និងនគរបាលទទួលបន្ទុកផ្នែកគ្រឿងញៀនទាំង៦នាក់ទៀតនោះទេ។ ចំណែក ចំនួនថវិកា ដែលនគរបាលទាំង៧នាក់ ទារពីឪពុកម្តាយរបស់អ្នកសេពគ្រឿងញៀន លោកស្នងការ អះអាងថា មិនបានចាំឡើយ ទាល់តែមើលរបាយការណ៍។
មន្ត្រីនគរបាលទាំង៧នាក់ បានចុះទៅបង្ក្រាបបទល្មើសគ្រឿងញៀន ហើយក៏ចាប់បានមនុស្ស៦នាក់ជាខ្មែរ-អ៊ិស្លាម ដែលជាអ្នកប្រើប្រាស់គ្រឿងញៀន។ គេហទំព័ររបស់អគ្គស្នងការដ្ឋាននគរបាលជាតិ សរសេរថា ក្រោយចាប់បាន មន្ត្រីនគរបាលទាំង៧នាក់ បានដោះលែងអ្នកប្រើប្រាស់គ្រឿងញៀនទាំង៦នាក់នោះ ឲ្យត្រឡប់ទៅផ្ទះវិញ ជាថ្នូរនឹងការទទួលប្រាក់ពីឪពុកម្តាយរបស់ពួកគេ។
លោក នេត សាវឿន អគ្គស្នងការនគរបាលជាតិ ជាអ្នកបញ្ជាផ្ទាល់ ឲ្យចាត់វិធានការលើមន្ត្រីនគរបាលទាំង៧នាក់នោះ។ លើសពីនេះ លោកអគ្គស្នងការ បញ្ជាស្នងការខេត្តព្រៃវែង ឲ្យធ្វើជាតំណាងរបស់លោក ចុះទៅសុំទោសអាណាព្យាបាលឬឪពុកម្តាយទាំង៦គ្រួសារនោះ ចំពោះទង្វើខុសវិជ្ជាជីវៈរបស់មន្ត្រីនគរបាលទាំង៧នាក់។
គេហទំព័ររបស់អគ្គស្នងការដ្ឋាននគរបាលជាតិ ផ្សាយថា ពេលចុះទៅសុំទោស លោកស្នងការ ក៏នាំយកថវិកាខ្លះ ប្រគល់ជូនក្រុមគ្រួសារទាំង៦នោះដែរ ដែលស្ថិតនៅភូមិអណ្តូង ឃុំមេសរប្រចាន់ ស្រុកពារាំង ខេត្តព្រៃវែង។ ជាមួយគ្នានេះ លោកស្នងការ ស្នើឲ្យមេឃុំ មេភូមិ និងតំណាងក្រុមគ្រួសារ បន្តអប់រំដល់ប្រជាពលរដ្ឋ និង សមាជិកគ្រួសារទាំងអស់ ឲ្យបញ្ឈប់ការសេពគ្រឿងញៀន។
លោកស្នងការខេត្តព្រៃវែង ថ្លែងក្នុងឱកាសនោះថា នគរបាលទាំង៧នាក់ ដែលបានប្រព្រឹត្តខុសវិជ្ជាជីវៈ នឹងត្រូវក្រសួងមហាផ្ទៃ មានវិធានការនិងដាក់វិន័យ តាមវិន័យកងកម្លាំងយ៉ាងតឹងរឹងបំផុត៕
Tag:
គ្រឿងញៀន
© រក្សាសិទ្ធិដោយ thmeythmey.com
