ជាតិ
អ្នកអង្គម្ចាស់ ស៊ីសុវត្ថិ សាមីល មុនីពង្ស អតីតអាកាសយាននិកខ្មែរ ចូលទិវង្គតក្នុងជន្មាយុ៧៩ព្រះវស្សា
×![]()
ព្រះករុណា ព្រះមហាក្សត្រ ព្រះបាទ សម្តេចព្រះបរមនាថ នរោត្តម សីហមុនី ស្តេចសព្វព្រះរាជហឫទ័យប្រោសព្រះរាជទានព្រះរាជសាររំលែកទុក្ខជូនអ្នកអង្គម្ចាស់ ស៊ីសុវត្ថិ រ៉ាវីវឌ្ឍនា មុនីពង្ស ចំពោះមរណភាពនៃបិតាព្រះអង្គ គឺអ្នកអង្គម្ចាស់ ស៊ីសុវត្ថិ សាមីល មុនីពង្ស កាលពីវេលាម៉ោង៤ និង៤៥នាទី ព្រឹកថ្ងៃទី២៥ខែកក្កដា ឆ្នាំ២០២០ នៅមន្ទីរពេទ្យ Pasteur ក្រុង Colmar រដ្ឋអាល់សាស់ ប្រទេសបារាំង ក្នុងព្រះជន្មាយុ៧៩ព្រះវស្សា។
ប្រសូតនៅថ្ងៃទី១១ ខែមេសា ឆ្នាំ១៩៤១ អ្នកអង្គធ្លាប់បានទៅសិក្សា នៅសាលារាជបណ្ឌិតសភាអាកាសចរណ៍ ( Royal Air academy ) ឯប្រទេសបារាំង ហើយនៅក្នុងសម័យសង្គមរាស្ត្រនិយម ទ្រង់បានចូលបម្រើកងទ័ពភូមិន្ទអាកាសចរណ៍ខ្មែរ (AVRK) ក្នុងឆ្នាំ១៩៦០ បន្ទាប់មកនៅឆ្នាំ១៩៦២ ជាអ្នករុករកនាវាមុជទឹករង និងនៅក្នុងឆ្នាំ១៩៧១ ទ្រង់បានទទួលតំណែងជាវរសេនីយ៍ទោ កងវរសេនាធំ ក្នុងទ័ពអាកាសខ្មែរ (KAF) ។
នៅឆ្នាំ១៩៧៣ ជាអនុព័ន្ធការពារជាតិនៅទីក្រុងប៉ារីស ក្រោយមកចន្លោះឆ្នាំ១៩៧៤-១៩៧៥ ទ្រង់ជាទីប្រឹក្សាបច្ចេកទេសនៃគណៈប្រតិភូកម្ពុជាប្រចាំអង្គការយូណេស្កូ ហើយឆ្នាំ ១៩៧៥ ជាប្រធានបេសកកម្មអង្គការ យូណេស្កូនៅទីក្រុង ហ្សឺណែវ ។ នៅថ្ងៃទី១៦ ខែកក្កដា ឆ្នាំ២០១៣ ទ្រង់ត្រូវបាន ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ស្តេចសព្វព្រះរាជហឫទ័យប្រោសព្រះរាជទានត្រាស់បង្គាប់ជាទីប្រឹក្សាអមព្រះមហាក្សត្រ ឋានៈស្មើរដ្ឋលេខាធិការ ។
អ្នកអង្គម្ចាស់ ស៊ីសុវត្ថិ សាមីល មុនីពង្ស ចូលថ្វាយបង្គំគាល់ព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី កាលពីឆ្នាំ២០១៤។ រូបថត Norodomsihanouk.info
យោងតាមឯកសារដែលចុះផ្សាយនៅលើ http://www.khmerairforce.com/ អ្នកអង្គម្ចាស់ ស៊ីសុវត្ថិ សាមីល មុនីពង្ស បានរងរបួសយ៉ាងធ្ងន់ធ្ងរដោយការបាញ់ប្រហារទៅលើយន្តហោះ C-47 នៅពេលព្រះអង្គទម្លាក់ម្ហូបអាហារ និងសម្ភារសឹកជូនដល់កងទ័ពដែលនៅលើកោះ ខាងមុខខេត្តក្រចេះ កាលពីអំឡុងឆ្នាំ១៩៧១។
អ្នកអង្គម្ចាស់ ស៊ីសុវត្ថិ សាមីល មុនីពង្ស (Sisowath Samyl Monipong) ជាបុត្រានៃសម្តេចក្រុមហ្លួង ស៊ីសុវត្ថិ មុនីពង្ស និងអ្នកម្នាង Andree Lambert ដែលជាជនជាតិបារាំង។ ព្រះអង្គជាព្រះនត្តា (ចៅ) បង្កើតនៃអតីតព្រះមហាក្សត្រ ព្រះករុណា ព្រះបាទសម្តេចព្រះ ស៊ី សុវត្ថិ មុនីវង្ស។
សម្តេចក្រុមហ្លួង ស៊ីសុវត្ថិ មុនីពង្ស បានរៀបអភិសេកចំនួន៥លើក ដោយអ្នកអង្គម្ចាស់ ស៊ីសុវត្ថិ សាមីល មុនីពង្ស ជាបុត្រច្បងក្នុងចំណោមបុត្រាបុត្រីសរុប១៣នាក់របស់ព្រះអង្គ។
សម្តេចព្រះមហាក្សត្រី ព្រះកុសុមៈ យាងក្នុងព្រះពិធីអភិសេករបស់អ្នកអង្គម្ចាស់ ស៊ីសុវត្ថិ សាមីល មុនីពង្ស និងព្រះនាង នរោត្តម តារាវត្តី កាលពីថ្ងៃទី៨ ខែមករា ឆ្នាំ១៩៦៧។ រូបថត ឯកសារ
អ្នកអង្គម្ចាស់ សាមីល បានរៀបអភិសេកកាលពីថ្ងៃទី៨ ខែមករា ឆ្នាំ១៩៦៧ ជាមួយអ្នកអង្គម្ចាស់ក្សត្រីយ៍ នរោត្តម តារាវត្តី ហើយបុត្រពីរព្រះអង្គ គឺអ្នកអង្គម្ចាស់ ស៊ីសុវត្ថិ រ៉ាវីវឌ្ឍនា មុនីពង្ស (ប្រសូតឆ្នាំ១៩៧០) និងព្រះនាង ស៊ីសុវត្ថិ ឧបុលវត្តី នីលឡា (ប្រសូតនៅឆ្នាំ១៩៧៣)។
ព្រះអង្គ ស៊ីសុវត្ថិ សាមីល មុនីពង្ស ក៏ជាម្ចាស់ស្នាដៃសៀវភៅជាភាសាបារាំង « Le Royaume de la Panthère Longibande» និង «La Renaissance du Cambodge» ផងដែរ។
សកម្មជន ទាំងក្នុងអាជីព ទាំងក្នុងជីវិតឯកជនរបស់ព្រះអង្គ មានផ្សាយភាគច្រើនជាភាសាបារាំងនៅលើគេហទំព័រ http://www.khmerairforce.com/ ក៏ដូចជាក្នុងប្លក់ Samylmonipong និង Ravisisowath ជាដើម៕
អ្នកអង្គម្ចាស់ ស៊ីសុវត្ថិ សាមីល មុនីពង្ស ជាមួយឧត្តមសេនីយ៍បារាំង Maurin ។ រូបថត ឯកសារ
អ្នកអង្គម្ចាស់ ស៊ីសុវត្ថិ សាមីល មុនីពង្ស ជាមួយអ្នកអង្គម្ចាស់ ស៊ីសុវត្ថិ រ៉ាវីវឌ្ឍនា មុនីពង្ស ដែលបុត្រា ហើយបច្ចុប្បន្នគង់នៅក្រុងរ៉ូម ប្រទេសអ៊ីតាលី។ រូបថត ហ្វេសប៊ុក Ravivaddhana Monipong Sisowath
Tag:
ស៊ីសុវត្ថិ សាមីល មុនីពង្ស
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
