COVID-19
អន្តរជាតិ
WHO សរសើរកម្ពុជានិងប្រទេស៤ទៀតលើការទប់ស្កាត់ការរាលដាល COVID-19 ទ្រង់ទ្រាយធំ
WHO សរសើរកម្ពុជានិងប្រទេស៤ទៀតលើការទប់ស្កាត់ការរាលដាល COVID-19 ទ្រង់ទ្រាយធំ។
×![]()
ដោយ: តន ចាន់រិទ្ធារ៉ា
អង្គការសុខភាពពិភពលោក បានកោតសរសើរកម្ពុជា និងប្រទេសចំនួន៤ទៀតដែលអាចទប់ស្កាត់ការរាលដាលជំងឺ COVID-19 ទ្រង់ទ្រាយធំក្នុងប្រទេសរៀងៗខ្លួន។ ការអនុវត្តវិធានការសុខាភិបាលមានប្រសិទ្ធភាព ជាមូលហេតុនាំឲ្យស្ថានភាពជំងឺផ្លូវដង្ហើមមួយនេះប្រទេសទាំង៥ មិនមានលក្ខណៈធ្ងន់ធ្ងរដូចប្រទេសផ្សេង។
ក្នុងសន្និសីទសារព័ត៌មានតាមប្រព័ន្ធអនឡាញនៅថ្ងៃទី២៧ ខែកក្កដា អគ្គនាយកអង្គការសុខភាពពិភពលោក លោក Tedros Adhanom Ghebreyesus បានរៀបរាប់ឈ្មោះប្រទេស៥ ដែលអនុវត្តការណែនាំបានត្រឹមត្រូវដែលឈានដល់ការទប់ស្កាត់យ៉ាងមានប្រសិទ្ធភាពការផ្ទុះជំងឺ COVID-19 ក្នុងប្រទេសពួកគេ ស្របពេលប្រទេសខ្លះទៀតអាចគ្រប់គ្រងជំងឺបានទៀតផង។
លោក Tedros បានលើកឡើងជាថ្មីវិធានការដែលត្រូវអនុវត្តដើម្បីប្រយុទ្ធជំងឺនេះរួមមានរក្សាគម្លាត លាងដៃ ជៀសវាងកន្លែងមានមនុស្សកកកុញ និងពាក់ម៉ាស់ពេលចាំបាច់។ បើអនុវត្តតាមវិធានការទាំងនេះ លោក Tedros អះអាងថា ករណីឆ្លងធ្លាក់ចុះ ហើយបើមិនធ្វើតាមទេ គឺករណីឆ្លងកើនឡើង។ មកដល់ត្រង់នេះ អគ្គនាយក WHO ក៏បានចុចឈ្មោះប្រទេសដែលធ្វើបានល្អ។
«ប្រទេស និងសហគមន៍ ដែលអនុវត្តតាមការណែនាំនេះដោយប្រយ័ត្ន និងជាប្រចាំ មានលទ្ធផលល្អ មិនថាក្នុងការទប់ស្កាត់ការរាលដាលទ្រង់ទ្រាយធំដូចជាកម្ពុជា នូវែលសេឡង់ រវ៉ាន់ដា ថៃ វៀតណាម និងកោះនៅតំបន់ការ៉ាអ៊ីប ឬក៏ការគ្រប់គ្រងបានផ្ទុះរាលដាលដូចជានៅកាណាដា ចិន អាល្លឺម៉ង់ និងកូរ៉េខាងត្បូង។» លោក Tedros និយាយបែបនេះ ហើយបន្ថែមទៀតថា មានប្រទេសជាច្រើនទៀតក៏ធ្វើបានល្អផងដែរ។
គិតត្រឹមថ្ងៃទី២៩ ខែកក្កដា កម្ពុជា មានករណីឆ្លង COVID-19 ចំនួន ២៣៣នាក់ រីឯករណីសះស្បើយឡើងដល់១៥៤នាក់ ដែលស្មើនឹង៦៦.០៩ភាគរយ ហើយមិនមានករណីស្លាប់ឡើយ។ នៅកម្រិតពិភពលោកវិញ ករណីឆ្លងជំងឺនេះមានច្រើនជាង១៦លាននាក់ និងស្លាប់ជាង៦៦ម៉ឺននាក់៕
Tag:
កម្ពុជា
WHO
COVID-19
© រក្សាសិទ្ធិដោយ thmeythmey.com
