លីហៀង និងមិត្តភក្តិ៣នាក់ទៀតដែលមានជំនាញទីផ្សារ ទេសចរណ៍ និងគ្រប់គ្រង នាំគ្នាចិញ្ចឹមពពែ

ជាតិ

លីហៀង និងមិត្តភក្តិ៣នាក់ទៀតដែលមានជំនាញទីផ្សារ ទេសចរណ៍ និងគ្រប់គ្រង នាំគ្នាចិញ្ចឹមពពែ

29, Jul 2020 , 2:55 pm

រូបភាព

ដោយ:

លោក ហ៊ិម លីហៀង ជាម្ចាស់កសិដ្ឋានចិញ្ចឹមពពែលក្ខណៈគ្រួសារមួយកន្លែង ដែលមានទីតាំងស្ថិតនៅ ឃុំសំរោង ស្រុកសូទ្រនិគម ខេត្តសៀមរាប។ លោក ហ៊ិម លីហៀង បានប្រាប់សារព័ត៌មានThmeyThmey25 តាមទូរសព្ទ លោក និងមិត្តភក្តិ៣នាក់ទៀត ដែលមានជំនាញខុសៗគ្នាគឺជំនាញទីផ្សារ, ទេសចរណ៍ និងជំនាញគ្រប់គ្រង បានងាកមកចិញ្ចឹមពពែវិញ នៅឆ្នាំ២០១៨ ក្រោយការចិញ្ចឹមគោរបស់ខ្លួន មិនសូវកាក់កបនោះ។

យុវជន លីហៀង ដែលមានបញ្ចប់បរិញ្ញាបត្រផ្នែកទីផ្សារ នៅឆ្នាំ២០១៦ បានអះអាងប្រាប់ ThmeyThmey25 ថារបរចិញ្ចឹមពពែនេះ បានផ្តល់ចំណូលពី ៨ពាន់ដុល្លារ ទៅ ១ម៉ឺនដុល្លារក្នុងមួយឆ្នាំ ដល់ក្រុមរបស់ខ្លួន។

យុវជន លីហៀងរៀបរាប់ដូច្នេះ៖«ចាប់ផ្ដើមចិញ្ចឹមដំបូងពពែមេចំនួន ៣០ក្បាល និងពពែឈ្មោល ៤ក្បាល ។ បច្ចុប្បន្នមានពពែចំនួន ១៥០ក្បាល ក្នុងមួយឆ្នាំលក់បានពពែ ៥០ក្បាល (ក្នុងមួយគីឡូលក់បាន ២០ ០០០រៀលទៅ ៣២ ០០០រៀល) បើគិតជាប្រាក់ពី ៨ពាន់ដុល្លារទៅ ១ម៉ឺនដុល្លារ»។

លោកបានបន្តថា មុននឹងចាប់ផ្ដើមចិញ្ចឹមពពែ លោកបានចិញ្ចឹមគោ ប៉ុន្តែដោយសារការចិញ្ចឹមគោត្រូវប្រើរយៈពេលយូរ ទើបលោកងាកមកចិញ្ចឹមពពែវិញ។ ដោយស្រួលចិញ្ចឹម ហើយមេពពែ ១ក្បាល អាចផ្ដល់កូនពពែពី ៣ក្បាល ទៅ ៤ក្បាលក្នុងមួយឆ្នាំ ដោយការពពោះម្ដងរបស់មេពពែអាចផ្ដល់ កូនពពែ យ៉ាងហោច២ក្បាល។ នេះបើតាមលោក ហ៊ិម លីហៀង ជាអ្នកចិញ្ចឹមពពែ។

លោក ក៏គ្រោងពង្រីកការចិញ្ចឹមពពែបន្ថែមទៀត ដើម្បីឲ្យស្របនឹងតម្រូវការទីផ្សារ ខណៈកំពុងមានតម្រូវការខ្បស់ និងទីផ្សារទូលាយផង។ យុវជន លីហៀង ក៏រីករាយសហការជាមួយកសិករដែលមានបំណងចិញ្ចឹមពពែ ដោយផ្ដល់មេពូជដល់អ្នកចិញ្ចឹម និងជួយរកទីផ្សារឲ្យពួកគាត់ផងដែរ

សព្វថ្ងៃទីផ្សារពពែរបស់លោកអាចផ្គត់ផ្គង់ក្នុងខេត្តសៀមរាប និងនាំចេញទៅកាន់ខេត្តមួយចំនួនក្នុងប្រទេសកម្ពុជា៕