អន្តរជាតិ
រដ្ឋមន្រ្តីការបរទេសអង់គ្លេស Dominic Raab ចាប់ដៃសមភាគីចិន វ៉ាង យី នាជំនួបនៅថៃ។ រូបភាព Xinhua
×![]()
ដោយ: តន ចាន់រិទ្ធារ៉ា
ប្រមុខការទូតចិន វ៉ាង យី បានប្រាប់សមភាគីចក្រភពអង់គ្លេស Dominic Raab នៅថ្ងៃទី២៨ ខែកក្កដា ថា ចិន ជាឱកាសរបស់អង់គ្លេស មិនមែនការគំរាមអ្វីឡើយ។ លោក វ៉ាង និយាយបែបនេះ ស្របពេលដែលទំនាក់ទំនងចិន និងអង់គ្លេសដែលកន្លងមកឡើងដល់យុគមាសនោះ បែរជាថមថយទៅវិញ។ បញ្ហាច្បាប់សន្តិសុខជាតិនៅហុងកុង និងការហាមប្រាមក្រមហ៊ុន Huawei ជាមូលចម្បងនៃការធ្លាក់ចុះទំនាក់ទំនងនេះ។
រដ្ឋមន្ត្រីការបរទេសចិន វ៉ាង យី បានជជែកតាមទូរសព្ទជាមួយរដ្ឋមន្ត្រីការបរទេសអង់គ្លេស Dominic Raab នៅថ្ងៃទី២៨ ខែកក្កដា ដោយផ្ដោតលើទំនាក់ទំនងទ្វេភាគីដែលកំពុងល្អក់កករដោយសារការអនុវត្តច្បាប់សន្តិសុខជាតិនៅហុងកុង និងការបិទផ្លូវការប្រើប្រាស់បច្ចេកវិទ្យាអ៊ីនធឺណិតជំនាន់ទី៥ (5G) របស់ក្រុមហ៊ុន Huawei ពីសំណាក់រដ្ឋាភិបាលចិន។ លោក វ៉ាង និយាយក្នុងជំនួបតាមទូរសព្ទនេះ ភាគីទាំងពីរគួរមានហេតុផល ចាស់ទុំ ហើយគោរពបញ្ញតិ្តអន្តរជាតិ។
បើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua លោក វ៉ាង ប្រាប់លោក Raab ត្រង់ៗថា សម្រាប់ចក្រភពអង់គ្លេស ចិនគឺជាឱកាស មិនមែនការគំរាម ជាការបំពេញបន្ថែម មិនមែនការធ្វើឲ្យធ្លាក់ចុះ និងជាដំណោះស្រាយ ជាជាងហានិភ័យ។ លោកបញ្ជាក់ថា៖ «ចិន និងចក្រភពអង់គ្លេស ជាសមាជិកអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិដូចគ្នា ជាប្រទេសមានឥទ្ធិពល ហើយមានវិស័យជាច្រើនដើម្បីកិច្ចសហប្រតិបត្តិការអន្តរជាតិ។»
ទំនងចង់សំដៅអាមេរិក ប្រមុខការទូតចិនរូបនេះប្រាប់សមភាគីអង់គ្លេសទៀតថា ទំនាក់ទំនងទ្វេភាគីសព្វថ្ងៃជួបបញ្ហា និងការលូកលាន់ ខណៈមនុស្សខ្លះនៅអង់គ្លេសចង់កែប្រែទំនាក់ទំនងឡើងវិញទៀតផង។ ត្រង់ចំណុចនេះ លោក វ៉ាង អះអាងថា ចិន និងអង់គ្លេសត្រូវតែធ្វើអ្វីតាមហេតុផល មានគំនិតចាស់ទុំ គោរពច្បាប់អន្តរជាតិ និងប្រយោជន៍៍គ្នាទៅមក។
ទាក់ទងរឿងហុងកុងវិញ លោក វ៉ាង ប្រាប់លោក Raab ថា នេះជាកិច្ចការផ្ទៃក្នុងរបស់ចិន ហើយទង្វើរបស់អង់គ្លេសកន្លងមកលើបញ្ហានេះ បានបំពានគោលការណ៍នៃទំនាក់ទំនងអន្តរជាតិ។ ដោយឡែកក្នុងសេចក្ដីប្រកាសរបស់ក្រសួងការបរទេសអង់គ្លេស លោក Raab លើកឡើងថា អង់គ្លេសនឹងតាមការបោះឆ្នោតសភាហុងកុងយ៉ាងដិតដល់បំផុត ហើយស្នើឲ្យចិនគោរពតាមកាត្វកិច្ចអន្តរជាតិរបស់ខ្លួនលើបញ្ហាសិទ្ធិមនុស្សនៅតំបន់ស៊ីនជាំង។
ចំណែករឿង 5G វិញ អ្នកការទូតចិន ក៏និយាយដោយឥតលាក់លៀមថា ក្រោមសម្ពាធប្រទេសខាងក្រៅ អង់គ្លេសយកការរកស៊ីធ្វើជានយោបាយ និងចាត់វិធានការរើសអើងក្រុមហ៊ុនចិន។ កន្លងទៅ រដ្ឋាភិបាលអង់គ្លេស ប្រកាសហាមប្រាមក្រុមហ៊ុនប្រើប្រាស់បច្ចេកវិទ្យាអ៊ីនធឺណិតរបស់ Huawei ដោយសំអាងថា ដើម្បីការពារសន្តិសុខជាតិ។ លោក វ៉ាង ស្នើឲ្យអង់គ្លេសបើកចំហបរិយាកាសរកស៊ីរបស់ខ្លួនសម្រាប់ក្រុមហ៊ុនទាំងអស់ រាប់ទាំងក្រុមហ៊ុនចិនផង៕
Tag:
ចិន
អង់គ្លេស
វ៉ាង យី
Dominic Raab
© រក្សាសិទ្ធិដោយ thmeythmey.com
