ដោយ៖ ប៉ូ សុភា
ភ្នំពេញ៖ ការអប់រំតាមអនឡាញ គឺជាជំហានថ្មីមួយ ដែលស្របតាមយុវសម័យបច្ចេកវិទ្យា ៤.0 ។ វាត្រូវបានគេរំពឹងថា នឹងជួយឱ្យកុមារ និងយុវជន អាចទទួលបានការអប់រំបែបទំនើប និងដើរទាន់ការវិវត្តនៃបច្ចេកវិទ្យា។ ប៉ុន្តែដំណើរការអប់រំតាមអនឡាញនេះ ក៏កំពុងជួបឧបសគ្គដែរ។ នោះគឺការហូរចូលហ្គេមអនឡាញគ្រប់ប្រភេទ ដែលអាចអូសទាញកុមារ និងយុវជន ងាកចេញពីការសិក្សា។
រយៈ៥ខែហើយ ដែលនិស្សិត សិស្សានុសិស្ស ត្រូវអង្គុយរៀននៅមុខកុំព្យូទ័រ ឬរៀនតាមទូរសព្ទស្មាតហ្វូន ដើម្បីទទួលបានចំណេះដឹង ក្រោយពីក្រសួងអប់រំប្រកាសបិទសាលារៀនបណ្ដោះអាសន្ន កាលពីថ្ងៃទី១៣ មីនា កន្លងមក។ កុមារ និងយុវជនមួយចំនួន កំពុងអនុវត្តបានយ៉ាងល្អ តាមគោលការណ៍ក្រសួងអប់រំ ដោយពួកគេប្រឹងរៀនស្វយ័តដោយខ្លួនឯង តាមអនឡាញនេះ។ ប៉ុន្តែខ្លះទៀត ប្រហែលជាកំពុងសម្ងំលេងហ្គេមអនឡាញ ដោយជ្រកក្រោមឈ្មោះ «រៀនតាមអនឡាញ»ទៅវិញទេ។
អ្នកស្រី ប៉ុក វណ្ណា ដែលមានកូនប្រុសម្នាក់ រៀននៅថ្នាក់ទី៧នោះ កំពុងព្រួយបារម្ភយ៉ាងខ្លាំង ដោយសារកូនខ្លួន វក់នឹងការលេងហ្គេមអនឡាញ។ អ្នកស្រី វណ្ណា បានទិញស្មាតហ្វូនមួយគ្រឿងឱ្យកូនគាត់ សម្រាប់យកមកប្រើប្រាស់ក្នុងសិក្សាតាមអនឡាញនេះ ប៉ុន្តែកូនរបស់គាត់ បែរជាលួចលេងហ្គេមទៅវិញ។ ស្ត្រីវ័យ៣៤ឆ្នាំ ដែលដឹងពីបញ្ហាកូនរបស់ខ្លួននេះ បាននិយាយដូច្នេះថា៖«ចាប់តាំងពីបានទូរស័ព្ទ យកទៅរៀន onlineមក កូនខ្ញុំលែងរៀនសុទ្ធតែម្ដង ។ មួយថ្ងៃៗគិតតែសម្ងំនៅតែក្នុងបន្ទប់លេងហ្គេម ជាមួយទូរស័ព្ទដៃ ហើយភ្នែកឡើង ក្រហមអស់ហើយ»។
អ្នកស្រី វណ្ណា ក៏បានព្យាយាមអប់រំ ណែនាំ និងលួងលោមកូនរបស់ខ្លួន ឱ្យប្រឹងសិក្សាតាមអនឡាញដែរ។ ប៉ុន្តែការយកចិត្តទុកដាក់លើការសិក្សាកូននេះ វាមិនបានដិតដល់ឡើយ ព្រោះតែអ្នកស្រី ក៏រវល់ធ្វើការងារខ្លួនដែរ។
« ខ្ញុំធ្វើការមួយអាទិត្យ មានពេលនៅផ្ទះត្រឹមតែ ៣ថ្ងៃប៉ុណ្ណោះ ។ អ៊ីចឹងហើយមិនដឹងថា កូនលេងហ្គេមតាំងពីពេលណាមក។ កត្តាសំខាន់មួយទៀត ខ្ញុំដើរមិនទាន់សម័យកាលបច្ចេកវិទ្យាទំនើបទេ។ នេះជាហេតុធ្វើឱ្យកូនមិនស្ដាប់ ព្រោះគាត់ចេះជាងខ្ញុំ»។ នេះជាការបញ្ជាក់របស់អ្នកស្រី ប៉ុក វណ្ណា។
កញ្ញា សួន សុភ័ណ្ឌ ដែលមានក្មួយរៀនថ្នាក់ទី៧ ក៏ជួបបញ្ហាក្មួយលេងហ្គេមច្រើនជាងរៀនដែរ។ មានស្រុកកំណើតនៅខេត្តកណ្ដាល អាណាព្យាបាលរបស់សិស្សរូបនេះ បានបញ្ជាក់ថា ក្មួយប្រុសរបស់ខ្លួន តែងតែបន្លំលេងហ្គេម ជាមួយការសិក្សាតាមអនឡាញនេះ ខណៈខ្លួនមិនសូវមានពេលតាមដានការសិក្សាដិតដល់។
« ចាប់តាំងពីក្រសួងអប់រំ បើកឲ្យមានការសិក្សាតាមអនឡាញ មកក្មួយរបស់ខ្ញុំ មានឱកាសបាននៅជិតទូរស័ព្ទច្រើនជាងមុន ដែលធ្វើឲ្យគាត់មានឱកាសក្នុងការឆ្លៀតលេងហ្គេម នៅក្នុងពេលកំពុងរៀន ដោយសារថា គាត់ត្រូវតែមានទូរស័ព្ទទើបអាចរៀនបាន។ អ៊ីចឹងពេលម៉ោងរៀនមិនដឹងថា គាត់មើលអ្វីខ្លះទេ ព្រោះខ្ញុំមិនបាននៅជិតគាត់រហូតនោះទេ ហើយតាមខ្ញុំបានសួរគេ បញ្ហានេះមិនមែនកើតឡើងតែចំពោះក្មួយរបស់ខ្ញុំទេ កូនៗរបស់អ្នកជិតខាង និងមិត្តភក្តិរបស់ខ្ញុំមួយចំនួនក៏ប្រឈមនឹងបញ្ហានេះដែរ »។ នេះជាការបញ្ជាក់របស់កញ្ញា សួន សុភ័ណ្ឌ។
យុវសិស្ស ស៊ឹង សុវណ្ណកិត្យា ដែលត្រូវជាកូនរបស់អ្នកស្រី ប៉ុក វណ្ណា បានទទួលស្គាល់ថា ខ្លួនពិតជាបានលួចលេងហ្គេម នៅអំឡុងពេលសិក្សាតាមអនឡាញមែន។ សុវណ្ណកិត្យា បែជាអះអាងថា ខ្លួនយកពេលលេងហ្គេមច្រើនជាងម៉ោងរៀន ដោយសារខ្លួនរៀនតាមអនឡាញនេះ ចាប់អ្វីដែលគ្រូបង្រៀនមិនទាន់ ដែលធ្វើឱ្យខ្លួនមានអារម្មណ៍ធុញទ្រាន់។
យុវសិស្សថ្នាក់ទី៧រូបនេះ និយាយដោយក្លាហានដូច្នេះថា៖ « តាមពិតទៅការលេងហ្គេមហ្នឹង ខ្ញុំចង់លេងដោយខ្លួនឯង ខ្ញុំអត់ខ្វល់រឿងរៀនទេ ព្រោះមិនចូលចិត្តរៀនទេតាមអនឡាញ។ រៀនតាមប្រព័ន្ធនេះ ខ្ញុំរៀនអត់ទាន់ទេ គ្រូពន្យល់លឿនពេក ហើយពេលខ្ញុំឆ្ងល់ឆាតទៅសួរ(គ្រូបង្រៀន) មួយថ្ងៃ ឬពីថ្ងៃ បាន(គ្រូ)ឆ្លើយ។ អ៊ីចឹងខ្ញុំគ្មានអារម្មណ៍រៀនទេ ចេះតែយកម៉ោងរៀនលេងហ្គេមជាមួយមិត្តភក្តិទៅសប្បាយជាង តែពេលខ្លះក៏លេងម្នាក់ឯងដែរ»។
សម្រាប់យុវសិស្សរូបនេះ ការរៀននៅសាលា អាចឱ្យខ្លួនយកចិត្តទុកដាក់រៀន ជាងតាមអនឡាញ។«ខ្ញុំចង់សំណូមពរឱ្យក្រសួងអប់រំឆាប់បើកសាលាវិញ ខ្ញុំចង់ទៅរៀននៅសាលាជាងរៀនតាមអនឡាញ ។ពេលរៀននៅសាលាមានគ្រូ ចាំពន្យល់ ពេលឆ្ងល់អាចសួរបានភ្លាមៗ ឆាប់ចេះ រៀនងាយស្រួលជាងរៀនតាម អនឡាញ ឆ្ងាយណាស់ »។ នេះជាការអះអាងរបស់ ស៊ឹង សុវណ្ណកិត្យា ដែលកំពុងសិក្សាថ្នាក់ទី៧។
តាមពិតទៅការរៀននិងបង្រៀនអនឡាញជាផ្នែកមួយនៃចក្ខុវិស័យការអប់រំតាមបែបឌីជីថលរបស់ក្រសួងអប់រំ យុវជន និងកីឡា ដែលបានចងក្រងក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣។ នេះជាការបញ្ជាក់របស់អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ដែលបានបន្ថែមថា ក្រសួងបានបង្វែបញ្ហាប្រឈមលើការរៀនអនឡាញឱ្យទៅជាឱកាសពង្រឹងការអប់រំបែបឌីជីថល។
នៅពេលសួរថា ក្រោយពីក្រសួងដាក់ចេញកម្មវិធីរៀនតាមអនឡាញនេះ តើមានប្រសិទ្ធភាពកម្រិតណា? លោក សុវាចា មិនបានបកស្រាយអ្វីច្រើនឡើយ ដោយលោកគ្រាន់តែបញ្ជាក់ថា ទទួលបានការគាំទ្រច្រើនពីសំណាក់អាណាព្យាបាលសិស្ស។
ថ្លែងប្រាប់សារព័ត៌មានThmeyThmey តាមបណ្ដាញតេឡេក្រាម អ្នកនាំពាក្យក្រសួងអប់រំរូបនេះ បាននិយាយដូច្នេះថា៖ «ជាទូទៅ មាតាបិតា សិស្សានុសិស្ស និងគ្រប់ភាគីពាក់ព័ន្ធមានការស្វាគមន៍ និងគាំទ្រសេវាសិក្សាតាមអនឡាញ របស់ក្រសួងអប់រំ យុវជន និងកីឡា ជាពិសេសជាមួយនឹងការផ្សាយតាមរយ:ទទក២ ដែលអាចបន្តឲ្យមានការរៀន និងបង្រៀននៅទីក្រុង និងជនបទទូទាំង២៥ខេត្ត រាជធានី ស្របនឹងការចូលរួមទប់ស្កាត់ការរីករាលដាលជម្ងឺកូវីដ-១៩។ គ្រួសារដែលមិនទាន់មានទូរទស្សន៍អាចរៀនតាមទូរទស្សន៍ជាមួយអ្នកជិតខាងមិនឲ្យលើសពី១០នាក់ ដោយតម្រូវឱ្យគ្រប់ភាគីពាក់ព័ន្ធរក្សាគម្លាតសុវត្ថិភាព និងអនុវត្តន៍វិធានការតាមការណែនាំរបស់ក្រសួងសុខាភិបាល»។
ផ្ទុយពីការយល់ឃើញរបស់ក្រសួងអប់រំ , អ្នកសិក្សាស្រាវជ្រាវផ្នែកទស្សនវិជ្ជា និងការអភិវឌ្ឍសង្គម មើលឃើញថា ការអនុវត្តកម្មវិធីសិក្សាតាមអនឡាញ មិនទាន់មានប្រសិទ្ធភាពនៅឡើយទេ។ លោក ប៉ា ចាន់រឿន បានសង្កត់ធ្ងន់ថា សិស្សមួយចំនួន បានលួចយកម៉ោងរៀនតាមអនឡាញនេះ ទៅលេងហ្គេម ឬមើលអ្វីផ្សេងទៀត ដែលខុសគោលដៅសិក្សា ពោលគឺពួកគេ មិនទាន់យល់ច្បាស់អត្ថន័យនៃការសិក្សាតាមអនឡាញឡើយ។
លោក ប៉ា ចាន់រឿន ដែលបច្ចុប្បន្ន ជាប្រធានវិទ្យាស្ថានប្រជាធិបតេយ្យកម្ពុជា បានបញ្ជាក់ដូច្នេះ ៖ « ការពិតជាក់ស្ដែងការសិក្សាតាមប្រព័ន្ធអនឡាញនេះ មានប្រសិទ្ធភាពតែចំពោះសិស្ស ដែលមានការសិក្សាកម្រិតខ្ពស់ ចាប់ពីកម្រិតសកលវិទ្យាល័យឡើងទៅ ព្រោះពួកគាត់មានការគិត និងការពិចារណាបានដោយខ្លួនឯង ក្នុងការសម្រេចចិត្តលើអ្វីមួយ»។
ប៉ុន្តែដើម្បីធ្វើឱ្យការសិក្សាតាមអនឡាញ មានប្រសិទ្ធភាពនោះ លុះត្រាតែមានការចូលរួមពីអាណាព្យាបាលសិស្ស។ ត្រង់ចំណុចនេះ លោក ប៉ា ចាន់រឿន បានបន្ថែមថា អាណាព្យាបាលទាំងអស់ ត្រូវតាមដាន និងពិនិត្យមើលរាល់កម្មវិធីសិក្សាកូនជាប្រចាំ ទើបអាចជំរុញឱ្យពួកគេសិក្សាតាមអនឡាញ ប្រកបដោយគុណភាព។ «ប្រសិនបើមាតាបិតា មិនចង់ឱ្យមានករណីខាងលើកើតឡើងចំពោះកូនៗរបស់ខ្លួនទេ ។ ចំពោះមាតាបិតាគួរតែសង្កេតពិនិត្យឲ្យបានច្បាស់លាស់លើកម្មវិធីសិក្សារបស់កូន រួមទាំងការតាមដាននូវរាល់សកម្មភាពមិនប្រក្រតីរបស់កូន ខណៈពេលកំពុងសិក្សាតាមប្រព័ន្ធអនឡាញ។ ជៀសជាងទុកឱ្យគាត់នៅតែឯងៗជាមួយនឹងទូរស័ព្ទ»។ នេះបើតាមលោក ប៉ា ចាន់រឿន។
ចាប់តាំងពីផ្ទុះជំងឺឆ្លងសកលនេះមក ទិន្នន័យនៃការទាញយកកម្មវិធីហ្គេម និងកម្មវិធីមួយចំនួន នៅក្នុងប្រទេសកម្ពុជា ពិតជាមានការកើនឡើងមែន។ នេះជាការបញ្ជាក់របស់លោក មាស ប៉ូ អនុរដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ ។
«សព្វថ្ងៃក្រសួងមិនទាន់បានពិនិត្យទៅលើការទាញយកកម្មវិធីហ្គេម និងកម្មវិធីមួយចំនួន ដែលធ្វើឱ្យប៉ះ ពាល់ដល់យុវជនឬកុមានៅឡើយទេ។ តែក្រសួងនឹងលើកពីបញ្ហានេះ ទៅកាន់(ពិភាក្សា)មន្ត្រីជំនាញបច្ចេកទេស នៅក្នុងកិច្ចប្រជុំពេលក្រោយ ថាតើគួរធ្វើយ៉ាងណាសម្រាប់ករណីនេះ» ។ នេះជាការបញ្ជាក់របស់លោក មាស ប៉ូ ដែលមិនទាន់អាចបញ្ជាក់ពីទិន្នន័យកើនឡើងនៃការទាញកម្មវិធីហ្គេមនោះទេ៕