អន្តរជាតិ
ហ្វីលីពីន ជាប្រទេសគ្រោះថ្នាក់បំផុតនៅអាស៊ីសម្រាប់សកម្មជនដីធ្លីនិងបរិស្ថាន
សកម្មជនបរិស្ថានហ្វីលីពីន (Reuters)
×![]()
ហ្វីលីពីន គឺជាប្រទេសដែលគ្រោះថ្នាក់បំផុតក្នុងតំបន់អាស៊ីសម្រាប់អ្នកការពារដីធ្លី និងសកម្មជនបរិស្ថាន ខណៈសកម្មជនសរុប៤៣នាក់ត្រូវបានសម្លាប់ក្នុងប្រទេសនេះ កាលពីឆ្នាំ២០១៩។ នេះបើតាមរបាយការណ៍របស់អង្គការ Global Witness នៅថ្ងៃទី ២៩ ខែកក្កដា។ 
ជនរងគ្រោះ ភាគច្រើន គឺជា មេដឹកនាំជនជាតិភាគតិច ប្រជាកសិករ និងបុគ្គលិករដ្ឋ ដែលទទួលបន្ទុកការពារបរិស្ថាន ។ បើតាមរបាយការណ៍ដដែល ជាងពាក់កណ្ដាលនៃអ្នកបាត់បង់ជីវិត គឺជាប់ពាក់ព័ន្ធនឹងកសិវប្បកម្ម ហើយការសម្លាប់១៦ករណីទៀតគឺទាក់ទងនឹងអាជីវកម្មជីករ៉ែ។ នេះជាតួលេខខ្ពស់បំផុតលើពិភពលោក។
របាយការណ៍របស់ Global Witness សរសេរទៀតថា ជិត៥០ភាគរយនៃអ្នកដែលត្រូវបានគេសម្លាប់ ជាប្រជាជនរស់នៅក្នុងកោះ Mindanao ទីកន្លែងដែលកងទ័ពហ្វីលីពីនមានវត្តមានជាយូរមកហើយដើម្បីប្រយុទ្ធប្រឆាំងនឹងក្រុមឧទ្ទាមឥស្លាម និងពួកកុម្មុយនីស្ត។ ម្យ៉ាង កោះនេះ បានស្ថិតក្រោមច្បាប់អាជ្ញាសឹក រហូតដល់ចុងឆ្នាំ២០១៩។
ចំណែក ក្រុមអ្នកការពារបរិស្ថានមួយចំនួនធំទៀត ក៏ត្រូវបានសម្លាប់ក្នុងកោះ Negros ដែលជាកោះផលិតស្ករសធំបំផុតនៅហ្វីលីពីន។ ទីតាំងនេះ ក៏ហ៊ុមព័ទ្ធដោយកងទ័ព ហើយក៏ជាទីដែលពួកសកម្មជនតវ៉ាដើម្បីឈានទៅកាន់កំណែទម្រង់ដីធ្លី ដើម្បីកាត់បន្ថយភាពក្រីក្រ និងវិសមភាព។
«ក្រុមសកម្មជនរស់នៅក្នុងកោះ Mindanao និង Negro បូកបញ្ចូលគ្នាស្មើនឹងជិត ៩០ភាគរយនៃសកម្មជនដីធ្លី និងបរិស្ថាន ដែលត្រូវបានសម្លាប់ក្នុងប្រទេសហ្វីលីពីន កាលពីឆ្នាំ២០១៩»។ របាយការណ៍ដដែល សរសេរបែបនេះ។
ក្នុងចំណោមនោះ ក៏មានមេដឹកនាំកុលសម័ន្ធជនជាតិភាគតិច Manobo លើកោះ Mindanao ឈ្មោះថា Kaylo Bontolan ដែលត្រូវបានសម្លាប់ក្នុងការវាយប្រហារពីទ័ពអាកាសហ្វីលីពីន ក្នុងខែមេសា ឆ្នាំ២០១៩។ ពោលគឺនៅពេលលោកបានត្រលប់មកផ្ទះលើភ្នំលោកវិញ ដើម្បីជួយប្រមែប្រមូលឯកសារដែលពួកយោធាប្រើអំពើហិង្សាដាក់សមាជិកកុលសម្ព័ន្ធលោក។
សូមបញ្ជាក់ថា របាយការណ៍របស់អង្គការ Global Witness ដដែល រកឃើញទៀតថា សកម្មជនសរុប ១១៩នាក់ ត្រូវបានសម្លាប់ អំឡុងពេល៣ឆ្នាំក្រោយលោក រ៉ូឌ្រីហ្គោ ឌូទើតេ ឡើងកាន់អំណាច ។ តួលេខនេះ គឺកើនជិត២ដង បើធៀបនឹង៣ឆ្នាំមុនពេលលោកកាន់អំណាច៕
Tag:
ហ្វីលីពីន
Global Witness
ព្រៃឈើ
© រក្សាសិទ្ធិដោយ thmeythmey.com
