COVID-19
អន្តរជាតិ
អ្នកជំងឺ COVID-19 ជួបប្អូនស្រីដែលជាគ្រូពេទ្យ ក្រោយបែកគ្នាជាង៥០ឆ្នាំ អ្នកស្រី Bev Boro អាយុ៥៣ឆ្នាំ និងបងស្រី Doris Crippen អាយុ៧៣ឆ្នាំ បានបែកគ្នាតាំងពីឆ្នាំ១៩៦៧។ រូបថត KETV
× COVID-19 បានបង្កឲ្យមនុស្សព្រាត់ប្រាស់គ្នាអស់ជាច្រើនគ្រួសារ ប៉ុន្តែករណីបងប្អូនស្រីអាមេរិក២នាក់នៅរដ្ឋ Nebraska ជារឿងដាច់ដោយឡែកមួយ។ ក្រោយបែកគ្នាតាំងពីឆ្នាំ១៩៦៧មក ពួកគាត់បានជួបជុំដោយមិននឹកស្មានដល់នៅមន្ទីរពេទ្យ។
យោងតាមការផ្សាយរបស់ KMTV អ្នកស្រី Doris Crippen បានសម្រាកព្យាបាល COVID-19 អស់រយៈពេល៣០ថ្ងៃ មុននឹងទទួលបានការអនុញ្ញាតឲ្យត្រឡប់ទៅផ្ទះវិញ។ ប៉ុន្តែសុខភាពរបស់ស្ត្រីវ័យ៧៣ឆ្នាំរូបនេះ នៅតែខ្សោយ បន្ទាប់ពីគាត់បានដួល និងរបួសដៃ។ គាត់ក៏បានទៅមន្ទីរពេទ្យសារជាថ្មី។
រឿងមិននឹកស្មានដល់បានកើតឡើង។ អ្នកគ្រូពេទ្យវ័យ៥៣ឆ្នាំ ឈ្មោះ Bev Boro បានមើលបញ្ជីឈ្មោះអ្នកជំងឺ ហើយភ្ញាក់ផ្អើលពេលឃើញឈ្មោះដែលជានាមត្រកូលឪពុករបស់ខ្លួន។ «ខ្ញុំបានឃើញឈ្មោះគាត់នៅក្នុងបញ្ជី ខ្ញុំស្ទើរតែមិនជឿថា ឱព្រះជាម្ចាស់ គាត់ជាបងស្រីបង្កើតរបស់ខ្ញុំយ៉ាងពិតប្រាកដ»។
អ្នកស្រី Boro បានធ្វើការនៅមន្ទីរពេទ្យ Fremont Methodist Health អស់រយៈពេល២២ឆ្នាំហើយ។ ដោយដឹងថា អ្នកស្រី Crippen ថ្លង់ស្តាប់មិនបាន គាត់ក៏បានសរសេរឈ្មោះឪពុក Wendall Huffman នៅលើក្តារឈ្នួន ហើយអ្នកជំងឺក៏បានឆ្លើយភ្លាមៗថា ជាឈ្មោះរបស់ឪពុកខ្លួនផងដែរ។
ក្នុងបទសម្ភាសជាមួយ KMTV អ្នកស្រី Crippen បានរៀបរាប់ថា អស់រយៈពេល៥៣ឆ្នាំហើយ ដែលគាត់បានបែកគ្នាពីបងប្អូន៥នាក់ទៀត ដោយសារតែឪពុកបានទុកគាត់ចោលតែម្នាក់ឯងនាឆ្នាំ១៩៦៧។ អ្នកស្រីមិនបានបញ្ជាក់ពីរឿងរ៉ាវអតីតលំអិតឡើយ តែគាត់បានសំដែងក្តីរំភើបថា៖ «៥៣ឆ្នាំហើយ ខ្ញុំមិនបានឃើញប្អូនតាំងពីគេនៅជាទារិកាមកម្ល៉េះ។ ពិតជាអស្ចារ្យណាស់ ខ្ញុំមិនដែលគិតថា យើងបានជួបគ្នាវិញនោះឡើយ»។
អ្នកស្រី Crippen បានជាសះស្បើយពី COVID-19 ហើយ ដូច្នេះ គាត់អាចឱបប្អូនស្រីដោយរំភើបរីករាយលាយឡំជាមួយនឹងទឹកភ្នែក។ គាត់់នៅតែមិនជឿថា ខ្លួនស្ទើរតែស្លាប់ដោយសារជំងឺរាលត្បាតសាកលនេះទៅហើយ ប៉ុន្តែព្រះជាម្ចាស់បានជួយឲ្យគាត់បានជួបប្អូនស្រី ក្រោយវិលទៅកាន់មន្ទីរពេទ្យសារជាថ្មី។
អ្នកស្រី Crippen បានទៅផ្ទះអ្នកស្រី Boro និងជួបជុំសាច់ញាតិផ្សេងទៀត ហើយគ្រោងរៀបចំពិធីដើម្បីអបអរការជួបជុំគ្នានៅពេលវេលាសមស្របណាមួយនាពេលខាងមុខ៕
© រក្សាសិទ្ធិដោយ thmeythmey.com