កីឡាជាតិ
ជាតិ
ពានសម្តេច ហ៊ុន សែន ថ្នាក់ខេត្ត៖ កែបទទួលបានលេខ៣ក្រោយយកឈ្នះសៀមរាប ៣-០ កីឡាករ លី ស៊ុបយ៉ានី របស់កែប ជាប់ជាកីឡាករល្អជាងគេប្រចាំការប្រកួត, រូបភាពពី CNCC
× ក្រុមបាល់ទាត់ជម្រើសខេត្តកែបទទួលបានចំណាត់លេខ៣ក្នុងពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០ ក្រោយយកឈ្នះសៀមរាបក្នុងលទ្ធផល ៣-០ នាជំនួបវគ្គផ្តាច់ព្រ័ត្រនៅរសៀលថ្ងៃទី២៩ កក្កដានេះ។
នាជំនួបដណ្តើមចំណាត់ថ្នាក់លេខ៣រវាងក្រុមកែប ជាមួយសៀមរាប នៅពហុកីឡដ្ឋានជាតិ ដែលបានចាប់ផ្តើមប្រកួតនៅម៉ោង៣:៣០នាទីរសៀល ក្រុមទាំងពីរបានបញ្ចប់ដោយគ្មានការស៊ុតបញ្ចូលទីគ្នានៅតង់ទី១។ ឈានដល់តង់ទីពីរ ការប្រកួតដំណើរការបាន៦នាទី គ្រាប់បាល់នាំមុខ ១-០ សម្រាប់ក្រុមកែបក៏បានកើតឡើង ដែលរកបានដោយកីឡាករ លី ស៊ុបយ៉ានី។
ជាង១០នាទីក្រោយមកខ្សែប្រយុទ្ធ ជឿន ណាចារ បន្ថែម១គ្រាប់ទៀត ដើម្បីបង្កើតការនាំមុខ ២-០ ឲ្យក្រុមកែប។ យើងសង្កេតឃើញថា ក្រុមសៀមរាបក៏មានឱកាសក្នុងការបំប៉ោងសំណាញ់ទីរបស់កែបផងដែរ តែធ្វើមិនបានសម្រេច។ ឈានដល់ចុងតង់ទីពីរកីឡាករ ជឿន ណាចារ សម្រេចគ្រាប់ទីពីររបស់ខ្លួន ដែលជាគ្រាប់ជ័យជម្នះ ៣-០ សម្រាប់ក្រុមកែបលើក្រុមសៀមរាប។
ជ័យជម្នះនេះ ជួយឲ្យកែបទទួលបានចំណាត់ថ្នាក់លេខ៣ក្នុងការប្រកួតដណ្តើមពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០។ នៅពហុកីឡដ្ឋានជាតិម៉ោង៦ល្ងាចនេះ ក្រុមត្បូងឃ្មុំត្រូវប្រកួតការពារតំណែងជើងឯកជាមួយក្រុមព្រៃវែង ដែលសមាជិតភាគច្រើនជាយុវជនថ្នាលរបស់ក្លិបវិសាខា៕
Tag:
បាល់ទាត់
Hun Sen Cup 2020
© រក្សាសិទ្ធិដោយ thmeythmey.com