COVID-19
អន្តរជាតិ
ទីក្រុងហាណូយ មានករណីឆ្លង COVID-19 ជាថ្មីដែលទាក់ទងករណីនៅដាណាង មន្រ្តីសុខាភិបាលវៀតណាម បាញ់ថ្នាំសម្លាប់វីរុសនៅក្នុងតំបន់មួយ ក្នុងទីក្រុងដាណាង នៅថ្ងៃទី២៥ ខែកក្កដា ឆ្នាំ២០២០។ រូបភាព៖ Vietnasm Express
× វៀតណាម បានរាយការណ៍ពីករណីឆ្លង COVID-19 ថ្មីចំនួន១៣ករណីទៀតនៅថ្ងៃទី២៩ និងទី៣០ ខែកក្កដា។ ក្នុងចំណោម១៣ករណីនេះ ទីក្រុងដាណាងមាន ១១ករណី និងហាណូយមានពីរករណី។ ការណ៍នេះ បានធ្វើឲ្យទីក្រុងហាណូយមានករណីឆ្លងជាថ្មី បន្ទាប់ពីស្ងប់ស្ងាត់មួយរយៈ។
តាមរយៈសេចក្តីប្រកាសរបស់ក្រសួងសុខាភិបាល វៀតណាមនៅល្ងាចថ្ងៃទី២៩ ខែកក្កដា បានរកឃើញករណីឆ្លងកូរ៉ូណាវីរុសចំនួន ៤ករណី។ ក្នុងចំនួននេះ ៣ករណីគឺនៅទីក្រុងដាណាង និង១ករណីនៅទីក្រុងហាណូយ។ នៅព្រឹកថ្ងៃទី៣០ ខែកក្កដា វៀតណាម បានរកឃើញករណីឆ្លងCOVID-19 ថ្មីចំនួន ៩ករណីបន្ថែមទៀត។ ក្នុងនោះ ៨ករណី គឺនៅទីក្រុងដាណាង និង១ករណីនៅទីក្រុងហាណូយ។
ករណីឆ្លងនៅក្នុងទីក្រុងហាណូយទាំងពីរករណីនេះ គឺមានទាក់ទងនឹងករណីឆ្លងនៅទីក្រុងដាណាងទាំងអស់ ព្រោះអ្នកជំងឺទាំងពីរនាក់នេះ ទើបតែត្រលប់មកពីក្រុងទេសចរណ៍មួយនេះ។ តួលេខ COVID-19 សរុបរបស់វៀតណាម បានកើនដល់ចំនួន ៤៥៩ករណី និងមិនមានករណីស្លាប់។ ចំណែកអ្នកជាសះស្បើយវិញមានចំនួន ៣៦៩នាក់។
បន្ទាប់ពីមានករណីឆ្លងនៅក្នុងទីក្រុងជាថ្មីបែបនេះ អាជ្ញាធរ បានអំពាវនាវឲ្យប្រជាជននៅក្នុងទីក្រុងហាណូយចេញទៅក្រៅពាក់ម៉ាស់ រក្សាគម្លាតសុវត្ថិភាព រក្សាអនាម័យជាដើម។ គិតត្រឹមថ្ងៃទី២៩ ខែកក្កដា ទីក្រុងហាណូយគ្មានករណីឆ្លង COVID-19 ជាសហគមន៍ចំនួន ១០៧ថ្ងៃមកហើយ។
ពេលនេះ ទីក្រុងហាណូយរបស់វៀតណាម កំពុងប្រឈមនឹងការឆ្លង COVID-19 ខ្ពស់ជាងគេ។ បើតាមការបញ្ជាក់របស់លោក Nguyen Duc Chung ប្រធានគណៈកម្មាធិការប្រជាជនក្រុងហាណូយ នាពេលកន្លងមក ទីក្រុងហាណូយបានទទួលប្រជាជនដែលត្រលប់មកពីដាណាងវិញចន្លោះពី១៥០០០នាក់ ទៅ ២០០០០នាក់។ នេះបើតាមការចុះផ្សាយរបស់សារព័ត៌មាន Vietnam Express។
សូមបញ្ជាក់ថា បន្ទាប់ពីមានករណីឆ្លងនៅក្នុងទីក្រុងដាណាង វៀតណាម បានចាត់វិធានការយ៉ាងខ្លាំង ដើម្បីទប់ស្កាត់ការរាតត្បាតនៅក្នុងប្រទេស។ រដ្ឋាភិបាលវៀតណាម បានបញ្ជាឲ្យបិទការហោះហើរចេញចូលពីក្រុងដាណាងទាំងអស់ ចំណែកការធ្វើដំណើរនៅក្នុងទីក្រុងនេះ ក៏មិនអនុញ្ញាតដែរ លើកលែងតែករណីចាំបាច់។ ក្រៅពីនេះ រដ្ឋាភិបាល ក៏បានពង្រឹងការត្រួតពិនិត្យតាមព្រំដែនផងដែរ ដោយសារបារម្ភពីការធ្វើអន្តោប្រវេសន៍ខុសច្បាប់ ដែលអាចចម្លង COVID-19 កាន់តែខ្លាំងថែមទៀតនៅវៀតណាម៕
© រក្សាសិទ្ធិដោយ thmeythmey.com