ជប៉ុន នឹងអនុញ្ញាតឲ្យជនបរទេសមានលិខិតបញ្ជាក់ការស្នាក់នៅចូលប្រទេសវិញ

COVID-19

អន្តរជាតិ

ជប៉ុន នឹងអនុញ្ញាតឲ្យជនបរទេសមានលិខិតបញ្ជាក់ការស្នាក់នៅចូលប្រទេសវិញ

30, Jul 2020 , 9:29 pm

រូបភាព

ប្រភពរូប៖ Kyodo

ដោយ:

ចាប់ពីសប្តាហ៍ក្រោយទៅ រដ្ឋាភិបាលជប៉ុន នឹងអនុញ្ញាតឲ្យជនបរទេសដែលមានលិខិតបញ្ជាក់ការស្នាក់នៅចូលមកវិញ។ ក្រសួងការបរទេសជប៉ុន បានប្រកាសបែបនេះ នៅថ្ងៃទី ២៩ ខែកក្កដា។ កន្លងមក ជប៉ុនបានចេញបម្រាមការធ្វើដំណើរចូលប្រទេស ដើម្បីទប់ស្កាក់ការរាលដាល COVID-19 ។

ជនបរទេសដែលមានកាន់លិខិតបញ្ជាក់ការស្នាក់នៅ រហូតដល់ ៩ ម៉ឺននាក់ រួមមាន និស្សិត អ្នកជំនួញ និងអ្នកហាត់ការ ជាដើម កំពុងជាប់គាំងនៅក្រៅប្រទេសជប៉ុន ក្រោយអាជ្ញាធរបានហាមឃាត់ការចូលមកដល់នៃជនបរទេសពីជាង១០០ប្រទេស ក្នុងគោលដៅឆ្លើយតបជំងឺរាតត្បាតសកល COVID-19 ។

ក្នុងសេចក្តីប្រកាសព័ត៌មាន នៅថ្ងៃទី ២៩ ខែកក្កដា ក្រសួងការបរទេសជប៉ុន អះអាងថា អ្នកដែលបានពីចាកចេញពីប្រទេសជប៉ុន មុនពេលប្រទេសទិសដៅពួកគេត្រូវបានដាក់ចូលទៅក្នុងបញ្ជីបម្រាមនោះ នឹងមានសិទ្ធិដាក់ពាក្យសុំត្រលប់មកវិញបាន។

ការអនុវត្តវិធានការនេះ នឹងរាប់ចាប់ពីថ្ងៃទី ៥ ខែសីហា តទៅ។ សម្រាប់អ្នកដែលមានសិទ្ធិ ស្ថានបេសកកម្មការទូតជប៉ុន នឹងចេញលិខិតបញ្ជាក់ឲ្យ ហើយពួកគេនឹងបង្ហាញឲ្យផ្ញើភស្តុតាងថាគ្មានជំងឺ COVID-19 ក្នុងពេល៧២ម៉ោងមុនការហោះហើរ។

ជប៉ុន បានដាក់បម្រាមលើការអ្នកដំណើរពីតំបន់និងប្រទេសជាង១៤០ ក៏ប៉ុន្តែរដ្ឋាភិបាលអះអាងខ្លួននឹងបន្ធូរបន្ថយជាបន្តបន្ទាប់។ តួយ៉ាង កាលពីសប្តាហ៍មុន លោកនាយករដ្ឋមន្ត្រី ស៊ិនហ្សូ អាបេ និយាយថា ជប៉ុននឹងបើកកិច្ចពិភាក្សាជាមួយប្រទេសសេដ្ឋកិច្ចអាស៊ីទាំង១២ រួមមាន ចិន កូរ៉េខាងត្បូង សិង្ហបុរី ម៉ាឡេស៊ី និងកម្ពុជា ជាដើម ដើម្បីបើកការធ្វើដំណើរទៅមកឡើងវិញ។

គិតមកត្រឹមថ្ងៃទី ៣០ ខែកក្កដា ជប៉ុន បានរាយការណ៍ករណីឆ្លង COVID-19 ៣៣ ៣៦២ករណី ក្នុងនោះជាសះស្បើយមាន ២៣ ៥០៧ ករណី ហើយស្លាប់មាន១០០១នាក់៕