ផ្សារបន្លែសុវត្ថិភាពចុងសប្ដាហ៍ជំរុញឱ្យតម្លៃ និងផលិតផលកសិករមាននិរន្តរភាព

ជាតិ

ផ្សារបន្លែសុវត្ថិភាពចុងសប្ដាហ៍ជំរុញឱ្យតម្លៃ និងផលិតផលកសិករមាននិរន្តរភាព

30, Jul 2020 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ នៅចុងសប្ដាហ៍កន្លងទៅ អាជ្ញាធរខេត្តសៀមរាបបានដាក់សម្ពោធជាផ្លូវការនូវផ្សារបន្លែសុវត្ថិភាពចុងសប្ដាហ៍ ក្រោយការលក់នេះបានដំណើរការមួយឆ្នាំរួចមក។ ក្រោយមានការគាំទ្រកាន់តែច្រើនពីប្រជាពលរដ្ឋ អាជ្ញាធរសម្រេចពង្រីកស្ដង់ ហើយទៅអនាគតអាជ្ញាធរខេត្តនឹងរៀបចំឱ្យមានកន្លែងលក់ជាអចិន្រៃយ៍ ដែលជាផ្នែកមួយបង្កើនផលិតផលកសិកម្ម ដើម្បីបំពេញតម្រូវការទីផ្សារក្នុងខេត្តទេសចរណ៍មួយនេះ។ កសិករបានសម្ដែងការគាំទ្រចំពោះគម្រោងនេះ ព្រោះថាផ្សារនេះជាផ្នែកមួយសំខាន់ក្នុងការជំរុញឱ្យតម្លៃ និងផលិតផលកសិកម្ម មាននិរន្តរភាព។

ព័ត៌មានពិស្ដារ សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ

ទំនោរនៃការនិយមហូបបន្លែសុវត្ថិភាពក្នុងខេត្តសៀមរាប ចាប់ផ្តើមមានច្រើននៅពេលដែលប្រជាពលរដ្ឋមានជីវភាពសមរម្យ យល់ពីតម្លៃសុខភាព។ អាជ្ញាធរបានកំណត់ការលក់បន្លែសុវត្ថិភាពនៅតាមស្ដង់ដែលបានរៀបចំនៅសួនច្បារខាងកើតមហាសណ្ឋាគារអង្គរ ឬហ្គ្រង់អូតែល ដែលជ្រើសរើសសហគមន៍កសិករ ស្ថិតក្រោមគម្រោងដែលជួយដាំដុះលើបន្លែសុវត្ថិភាព។

ប្រធានមន្ទីរពាណិជ្ជកម្មខេត្តសៀមរាប លោក ភឿន គឹមលី ឱ្យដឹងថា ស្ដង់លក់បន្លែសុវត្ថិភាពចុងសប្ដាហ៍ គឺជាផ្នែកមួយនៃគម្រោងជំរុញទីផ្សារសម្រាប់កសិកម្មខ្នាតតូច ហៅកាត់ថា AIMS។ គម្រោងនេះកកើតឡើងនៅឆ្នាំ២០១៨ ដែលមានកសិករជាង១ពាន់គ្រួសារចូលរួម។ លោកបន្ថែមថា ការរៀបចំស្ដង់ឱ្យកសិករដាក់លក់នៅទីសាធារណដែលគាំទ្រដោយរដ្ឋបាលខេត្តសៀមរាប បំណងសំខាន់ក្នុងការធ្វើឱ្យមាននិរន្តរភាពនៃការផ្គត់ផ្គង់ទីផ្សារបន្លែក្នុងខេត្តសៀមរាប។

លោក ភឿន គឹមលី បន្តទៀតថា ការដាក់លក់នៅទីតាំងដែលរៀបចំនេះ គឺមានការណែនាំត្រឹមត្រូវដោយតម្រូវឱ្យកសិករលក់ផលិតផលដែលមានប្រភពត្រឹមត្រូវ សុវត្ថិភាព ពិសេសជាបន្លែ និងផ្លែឈើដែលដាំដុះដោយសហគមន៍កសិករដែលមានការត្រួតពិនិត្យត្រឹមត្រូវពីអ្នកជំនាញ។ ចំណែកតម្លៃវិញ ដ្បិតថាខាងមន្ទីរមិនបានកំណត់ជាគោលការណ៍ច្បាស់លាស់ពិតមែន តែស្ថិតក្នុងគោលការណ៍មួយដែលប្រហាក់ប្រហែលគ្នា គឺកសិករក៏ទទួលយកបាន ហើយអ្នកទិញក៏ទទួលយកបាន។

ប្រធានមន្ទីរកសិកម្ម រុក្ខាប្រមាញ់ និងនេសាទ លោក ទា គឹមសុទ្ធ ឱ្យដឹងដែរថា មន្ទីរកសិកម្មសហការជាមួយមន្ទីរពាណិជ្ជកម្ម ក្នុងការជួយកសិករឱ្យមានស្ថេរភាពលើតម្លៃ និងជំរុញឱ្យមានផែនការផលិត ដើម្បីឱ្យការលក់មានស្ថេរភាព។ បន្ថែមពីនេះ ខាងមន្ទីរកសិកម្មក៏បានជួយពង្រឹងគុណភាព សុវត្ថិភាពបន្លែឱ្យអតិថិជនមានទំនុកចិត្ត។ លោកបន្ថែមថា៖«...ឃើញថា ក្រោយមានពិព័រណ៍ផ្សារបន្លែនេះ ពីមុនមានតែ៤,៥ស្ដង់ទេ តែបច្ចុប្បន្នមានខ្ទង់២០ ហើយឥឡូវរដ្ឋាភិបាលបង្វែរគោលដៅផ្តោតលើវិស័យកសិកម្មកំឡុងកូវីដ ដើម្បីស្ដារសេដ្ឋកិច្ច ការដាំបន្លែ និងចិញ្ចឹមសត្វ ហើយយើងខិតខំចងក្រងឱ្យបង្កើតជាសហគមន៍ដើម្បីឱ្យការដាំដុះរបស់គាត់មានការផ្លាស់ប្ដូរ មានបន្លែគ្រប់មុខលក់នៅលើទីផ្សារ...»។

បើតាមការអះអាងរបស់ប្រធានមន្ទីរកសិកម្ម ដ្បិតជួបវិបត្តិជំងឺកូវីដ១៩ តែកសិផលនៅក្នុងខេត្តសៀមរាប មិនមានបញ្ហាផ្នែកតម្លៃទីផ្សារនោះទេ តែជួបបញ្ហាអាកាសធាតុក្ដៅខ្លាំងធ្វើឱ្យការដាំដុះបន្លែរបស់កសិករមិនសូវល្អ។ លោកប្រធានមន្ទីរពន្យល់ថា៖« កសិករជួបបញ្ហាអាកាសធាតុ ដោយសារកង្វះខាតទឹក ទឹកអណ្ដូងរីង ការផលិតបន្លែមានការលំបាកបន្ដិច ជាក់ស្ដែងសព្វថ្ងៃទឹកភ្លៀងមិនទាន់ដល់កម្រិត នៅខ្វះខាត ចឹងត្រូវប្រើទឹកអណ្ដូងដើម្បីស្រោចស្រពបន្លែ ចឹងគុណភាពមិនសូវល្អទេ...»។

កសិករ លោក ឡុង បូរី ដែលនាំយកបន្លែ និងផ្លែឈើមកលក់នៅផ្សារចុងសប្ដាហ៍ បានបង្ហាញអារម្មណ៍រីករាយជាខ្លាំង ជាមួយការលក់នៅស្ដង់ដែលគាំទ្រដោយអាជ្ញាធរខេត្ត។ កសិកររូបនេះបានប្រមូលកសិផលពីសហគមន៍កសិករនៅភូមិព្រះអង្គទ្រង់ ស្រុកពួក ដែលការងារនេះលោក បូរី ប្រាប់ថា ជាចំណែកជួយកសិករក្រីក្រ ដែលពេលខ្លះពួកគេពិបាករកទីផ្សារ ឬមានតម្លៃថោកជាដើម។

ជាមួយនឹងការគាំទ្រទាំងអាជ្ញាធរខេត្ត និងប្រជាពលរដ្ឋ ធ្វើឱ្យលោក បូរី ដែលជាកសិករមានទឹកចិត្តដាំដុះ និងសប្បាយក្នុងការលក់នៅផ្សារចុងសប្ដាហ៍នេះ។ លោកថា ការគាំទ្រនេះជួយផ្ទាល់ដល់កសិករក្រីក្រ ឱ្យមានកម្លាំងផលិតបន្លែសុវត្ថិភាព រីឯអ្នកហូបក៏ទទួលបានផលិតផលដែលទទួលបានការធានាសុខភាពផងដែរ។

ចំណែកកសិករនៅស្រុកសូទ្រនិគម លោក ឃឹម ជ័យ ក៏បង្ហាញអារម្មណ៍រីករាយចំពោះការគាំទ្ររបស់អតិថិជនលើផ្សារបន្លែសុវត្ថិភាពចុងសប្ដាហ៍នេះដែរ។ កសិកររូបនេះចង់ឱ្យពលរដ្ឋបន្តគាំទ្រការលក់បន្លែសុវត្ថិភាព និងចង់ឱ្យសកម្មភាពនេះរីកសាយភាយទៅបណ្ដាខេត្តដទៃ ព្រោះថាការហូបបន្លែសុវត្ថិភាព ស្មើនឹងយើងស្រឡាញ់សុខភាពខ្លួនឯងយ៉ាងដូច្នោះដែរ។

កសិករមួយរូបទៀតដែលលក់នៅក្នុងស្ដង់បន្លែដែលរៀបចំតាំងពីដើមទីមក លោកស្រី ណង ង៉ា ក៏រីករាយចំពោះការលក់ដូរលោកស្រីដែរ។ ងាកមកដាំបន្លែសុវត្ថិភាពរយៈពេលជាង២ឆ្នាំមកហើយ ដោយសារមានការណែនាំពីអង្គការកសិកម្ម និងក្រោយយល់ពីតម្លៃសុខភាព។ កសិករនៅភូមិគោកដូង សង្កាត់ក្របីរៀល លោកស្រី ណង ង៉ា យល់ថា ការដាំបន្លែដែលប្រើសារធាតុគីមីហួសហេតុ មិនប៉ះពាល់តែសម្រាប់អ្នកហូបទេ អ្នកប៉ះពាល់ខ្លាំងគឺអ្នកដាំតែម្ដង។

លោក ភឿន គឹមលី ក៏សប្បាយរីករាយពេលដែលពលរដ្ឋកាន់តែច្រើនបង្ហាញការគាំទ្របន្លែក្នុងស្រុក បន្លែដែលមានសុវត្ថិភាព ដែលដាំដោយកសិករ។ លោកយល់យ៉ាងដូច្នេះថា៖« យើងចាំថា ការរស់ឬស្លាប់អាស្រ័យលើទីផ្សារ មានន័យថា គាត់ធ្វើមិនមែនគាត់ទុកហូបទេ គាត់ធ្វើទុកលក់មកឱ្យយើង ចឹងប្រជាជនទូទៅគាត់ជាអ្នកគាំទ្រ គឺសំខាន់បំផុត មានន័យថាបើយើងអនុវត្តន៍តាមសុភាសិតមួយ មុនជួយគេជួយខ្លួនឯង ចង់និយាយថា មុនចង់ទិញផលិតផលផ្សេងក៏គួរសម្លឹងមើលផលិតផលក្នុងស្រុកមុន ព្រោះយើងធ្វើបានល្អ ហើយបន្លែទាំងអស់សុទ្ធតែឆ្លងការពិនិត្យត្រឹមត្រូវ ក្រុមបន្លែដែលយកមកលក់ គឺសម្រាំងណាស់»៕