លោក ផន រស្មីពេជ្រ បន្តដឹកនាំត្បូងឃ្មុំ លេងក្នុងពានសម្តេច ហ៊ុន សែន ថ្នាក់ជាតិ

កីឡាជាតិ

ជាតិ

លោក ផន រស្មីពេជ្រ បន្តដឹកនាំត្បូងឃ្មុំ លេងក្នុងពានសម្តេច ហ៊ុន សែន ថ្នាក់ជាតិ

31, Jul 2020 , 8:59 am

រូបភាព

លោក ផន រស្មីពេជ្រ ពេលដឹកនាំត្បូងឃ្មុំប្រកួតជាមួយព្រៃវែងក្នុងវគ្គផ្តាច់ព្រ័ត្រពានសម្តេច ហ៊ុន សែន ថ្នាក់ខេត្តនៅពហុកីឡដ្ឋានជាតិ,រូបភាពពី CNCC

ដោយ:

គ្រូបង្វឹកក្រុមត្បូងឃ្មុំ លោក ផន រស្មីពេជ្រ បានសម្រេចលាលែងពីតំណែងគ្រូបង្វឹក ក្រោយដឹកនាំក្រុមបានត្រឹមជើងឯករងពានសម្តេច ហ៊ុន សែន ថ្នាក់ខេត្តឆ្នាំ២០២០។ តែយ៉ាងណាគ្រូបង្វឹករូបនេះមិនទាន់ចាកឆ្ងាយពីក្រុមត្បូងឃ្មុំឡើយ ពោលគឺលោកនឹងដឹកនាំក្រុមនេះលេងក្នុងពានសម្តេច ហ៊ុន សែន ថ្នាក់ជាតិជាបន្តទៀត។

អត្ថបទទាក់ទង

ពានរង្វាន់សម្តេច ហ៊ុន សែន ថ្នាក់ខេត្ត៖ ព្រៃវែងជើងឯក ត្បូងឃ្មុំលេខ២ កែបលេខ៣ និងសៀមរាបលេខ៤

លោក ផន រស្មីពេជ្រ គ្រូបង្វឹកក្រុមត្បូងឃ្មុំនៅព្រឹកថ្ងៃទី៣០ ខែកក្កដា ឆ្នាំ២០២០ បានបង្ហោះសារលើទំព័រហ្វេសប៊ុកបង្ហាញពីការលាលែងពីតំណែងគ្រូបង្វឹក។ ការលាលែងនេះ ធ្វើឡើង១ថ្ងៃបន្ទាប់ ក្រោយលោកដឹកនាំក្រុមត្បូងឃ្មុំប្រកួតចាញ់ក្រុមព្រៃវែង ១-០ នៅវគ្គផ្តាច់ព្រ័ត្រពានរង្វាន់សម្តេច ហ៊ុន សែន ថ្នាក់ខេត្តនៅល្ងាចថ្ងៃទី២៩ កក្កដា ឆ្នាំ២០២០ នាពហុកីឡីដ្ឋានជាតិ។

ប៉ុន្តែនៅក្នុងសារនោះ គ្រូបង្វឹកដែលដឹកនាំត្បូងឃ្មុំឲ្យឈ្នះជើងឯកពានសម្តេច ហ៊ុន សែន ថ្នាក់ខេត្តឆ្នាំ២០១៩ រូបនេះ មិនបានបញ្ជាក់ពីមូលហេតុនៃការលាលែងនេះឡើយ។ គ្រាន់តែអះអាងថា ការធ្វើបែបនេះ គឺដើម្បីបង្ហាញពីទំនួលខុសត្រូវរបស់លោក។ ក្រោយលាលែងពីតំណែងគ្រូបង្វឹកក្រុមត្បូងឃ្មុំ លោក រស្មីពេជ្រ ទំនងជាទៅដឹកនាំក្រុមក្នុងក្របខណ្ឌលីគលំដាប់ទីពីរកម្ពុជា។

«បាយៗធីមត្បូងឃ្មុំ នេះជាកាទទួលខុសត្រូវរបស់ខ្ញុំ ជួបគ្នាលីក២»។ នេះជាការរៀបរាប់របស់លោក ផន រស្មីពេជ្រ ដែលអះអាងថា បច្ចុប្បន្នមានក្លិបចំនួនពីរ ដែលត្រៀមលេងក្នុងលីគលំដាប់ទី២ឆ្នាំនេះ បានទាក់ទងលោកឲ្យចូលរួមជាមួយពួកគេ តែលោកមិនទាន់សម្រេចយ៉ាងណានោះទេ។

ទោះបីគ្រូបង្វឹករូបនេះបានលាលែងពីតំណែងគ្រូបង្វឹកក៏ដោយ លោកនឹងបន្តដឹកនាំក្រុមត្បូងឃ្មុំលេងក្នុងពានសម្តេច ហ៊ុន សែន ថ្នាក់ជាតិជាបន្តទៀត ក្រោយមានការស្នើសុំពីថ្នាក់ដឹកនាំខេត្តត្បូងឃ្មុំ។ គ្រូបង្វឹករូបនេះអះអាងថា លោក មិនចង់ចាកចេញពីក្រុមត្បូងឃ្មុំនោះទេ ហើយបើថ្នាក់ដឹកនាំក្រុមនេះហ៊ានផ្តល់តាមការទាមទាររបស់ខ្លួន លោក នឹងបន្តរួមរស់ជាមួយត្បូងឃ្មុំ។

លោក ស សុខា បំពាក់មេដាយជូនកីឡាករត្បូងឃ្មុំ

ជ័យជម្នះ ១-០ ជួយឲ្យក្រុមព្រៃវែង ដែលសមាជិកភាគច្រើនជាយុវជនថ្នាលរបស់ក្លិបវិសាខាក្លាយជាម្ចាស់ជើងឯកពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០។ កីឡាករ វុធ តុលា ជាអ្នកសម្រេចគ្រាប់បាល់ជ័យជម្នះឲ្យក្រុមព្រៃវែង។ សម្រាប់តំណែងជើងឯកនេះ ព្រែវែងទទួលបានថវិកាលើកទឹកចិត្តចំនួន១៥លានរៀល។

ចំណែកក្រុមជើងឯករងត្បូងឃ្មុំ ទទួលបានថវិកាលើកទឹកចិត្តចំនួន៧,៥លានរៀល និងក្រុមលេខ៣កែបទទួលបានថវិកាលើកទឹកចិត្តចំនួន៥លានរៀល។ ក្រៅពីនេះ ក៏មានពានរង្វាន់លក្ខណៈឯកជនជាច្រើនទៀងផងដែររួមមានអ្នកចាំទីល្អជាងគេ គ្រូបង្វឹកល្អជាងគេ និងកីឡាកររកគ្រាប់បាល់បានច្រើនជាងគេ ដោយម្នាក់ៗទទួលបានថវិកាលើកទឹកចិត្តចំនួន១,៥លានរៀល។

នៅក្នុងពិធីប្រគល់ និងទទួលពានរង្វាន់សម្តេច ហ៊ុន សែន ថ្នាក់ខេត្តនោះដែរ ធ្វើឡើងក្រោមវត្តមានរបស់លោក សៅ សុខា ប្រធានសហព័ន្ធកីឡាបាល់ទាត់កម្ពុជា, លោក ស សុខា រដ្ឋលេខាធិការក្រសួងអប់រំយុវជននិងកីឡា, លោក ឌី វិជ្ជា ប្រធានគណៈកម្មប្រកួតបាល់ទាត់ជាតិកម្ពុជា និងលោក នួន ផារ័ត្ន អភិបាលរងរាជធានីភ្នំពេញ៕