ស្ត្រីខ្មែរអាមេរិក ដែលលួចរត់ពីបន្ទប់ចត្តាឡីស័ក គ្មានជំងឺកូវីដនោះទេ

COVID-19

ជាតិ

ស្ត្រីខ្មែរអាមេរិក ដែលលួចរត់ពីបន្ទប់ចត្តាឡីស័ក គ្មានជំងឺកូវីដនោះទេ

30, Jul 2020 , 5:30 pm

រូបភាព

រូបពី BTV

ដោយ: សារព័ត៌មានថ្មីៗ

ស្ត្រីខ្មែរសញ្ជាតិអាមេរិកម្នាក់ ដែលលួចចេញពីបន្ទប់ចត្តាឡីស័ក ក្នុងរាជធានីភ្នំពេញ ធ្វើដំណើរទៅដល់ខេត្តកំពង់ចាម ហើយត្រូវបានចាប់យកទៅធ្វើចត្តាឡីស័កឡើងវិញ នៅខេត្តកំពង់ចាម ត្រូវបានអនុញ្ញាតឲ្យចេញពីបន្ទប់ចត្តាឡីស័កហើយ នៅថ្ងៃទី៣០ ខែកក្កដា ឆ្នាំ២០២០នេះ។ នេះបើតាមលោក អ៊ុន ចាត់ដា អភិបាលខេត្តកំពង់ចាម។

លោក អ៊ុន ចាន់ដា ប្រាប់សារព័ត៌មានថ្មីៗ តាមទូរស័ព្ទថា ស្ត្រីខ្មែរអាមេរិករូបនោះ បានឆ្លងកាត់ការធ្វើចត្តាឡីស័ករយៈពេល១៤ថ្ងៃរួចហើយ ហើយក៏បានឆ្លងកាត់ការធ្វើតេស្តរកមេរោគកូវីដ-១៩ ចំនួន២លើក ដោយលទ្ធផលដែលបង្ហាញ គឺអវិជ្ជមានទាំង២លើក។ លោក អះអាងថា ក្នុងអំឡុងធ្វើចត្តាឡីស័ក១៤ថ្ងៃមកនេះ ក្រុមគ្រូពេទ្យ បានតាមដានពិនិត្យសុខភាពរបស់ស្ត្រីរូបនោះយ៉ាងយកចិត្តទុកដាក់។

ស្ត្រីខ្មែរអាមេរិករូបនោះ ត្រូវបានផាកពិន័យប្រាក់១លានរៀល ចំពោះកំហុស ក្នុងការរត់គេចពីបន្ទប់ចត្តាឡីស័ក។

គិតត្រឹមថ្ងៃទី៣០ ខែកក្កដា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ ២៣៤នាក់ហើយ ដោយក្នុងនោះ បានជាសះស្បើយវិញ១៦២នាក់ និង កំពុងសម្រាកព្យាបាល៧២នាក់៕