ទូត​ចិន​ថា អាមេរិក​បញ្ឆេះ​សង្គ្រាមត្រជាក់​ថ្មី​ដើម្បី​រក​ការគាំទ្រ​ក្នុងការ​បោះឆ្នោត​ប្រធានាធិបតី​
អន្តរជាតិ
ទូត​ចិន​ថា អាមេរិក​បញ្ឆេះ​សង្គ្រាមត្រជាក់​ថ្មី​ដើម្បី​រក​ការគាំទ្រ​ក្នុងការ​បោះឆ្នោត​ប្រធានាធិបតី​
31, Jul 2020 , 7:29 pm        
រូបភាព
លោក Liu Xiaoming ឯកអគ្គរដ្ឋទូតចិនប្រចាំប្រទេសអង់គ្លេស។ រូបភាព AFP
លោក Liu Xiaoming ឯកអគ្គរដ្ឋទូតចិនប្រចាំប្រទេសអង់គ្លេស។ រូបភាព AFP
​ឯកអគ្គរដ្ឋទូត​ចិន​ប្រចាំ​អង់គ្លេស Liu Xiaoming នៅ​ថ្ងៃទី​៣០ ខែកក្កដា បាន​ចោទប្រកាន់​អាមេរិក​ថា កំពុង​បង្កើត​សង្គ្រាមត្រជាក់​ថ្មី ព្រោះ​អ្នកនយោបាយ​អាមេរិក​មួយចំនួន​ចង់រក​អ្នកទទួលខុសត្រូវ​ជំនួស​ពួកគេ​សម្រាប់​បញ្ហា​ដែល​កើតឡើង​នៅ​អាមេរិក​។ គោលដៅ​បង្កើន​ប្រជាប្រិយភាព​មុន​ការបោះឆ្នោត​ប្រធានាធិបតី​នៅ​ខែវិច្ឆិកា ជាហេតុ​ផល​ដែល​លោក Liu អះអាងថា នាំ​ឲ្យ​ទំនាក់ទំនង​ចិន និង​អាមេរិក​ឡើងក​ម្ដៅ​។

 
​បើតាម​ទីភ្នាក់ងារ​ព័ត៌មាន Reuters លោក Liu Xiaoming ឯកអគ្គរដ្ឋទូត​ចិន​ប្រចាំ​ប្រទេស​អង់គ្លេស បាន​លើកឡើងថា ចិន​មិនបាន​ក្អេងក្អាង​នោះទេ ប៉ុន្តែ​គឺ​អាមេរិក​ទេ​ដែលជា​អ្នក​ចង់​បង្កើត​សង្គ្រាមត្រជាក់​ថ្មី ដែល​បង្ខំ​ឲ្យ​ចិន​ត្រូវតែ​តបត​។ មន្ត្រីការទូត​ចិន អះអាងថា ចិន​មិន​ចាប់អារម្មណ៍​សង្គ្រាមត្រជាក់​អ្វី​ឡើយ ហើយក៏​មិន​ចាប់អារម្មណ៍​នឹង​ការធ្វើ​សង្គ្រាម​អ្វី​នោះដែរ​។​
 
«​យើង​បានឃើញ​ហើយ​អំពី​អ្វីដែល​បាន​កំពុង​កើតឡើង​នៅ​អាមេរិក​។ ពួកគេ​ចង់​បន្ទោស​ចិន ចំពោះ​បញ្ហា​ដែល​គេ​មាន ហើយ​យើង​ក៏​ដឹងផង​ដែរ​ថា ឆ្នាំនេះ ជា​ឆ្នាំ​បោះឆ្នោត​ប្រធានាធិបតី​។​» លោក Liu បន្ថែម​បែបនេះ​។ 
 
​លោក​ឯកអគ្គរដ្ឋទូត មិនបាន​បញ្ចេញ​ឈ្មោះ​អ្នកនយោបាយ​អាមេរិក​រូប​ណា​ឡើយ ប៉ុន្តែ​បាន​និយាយថា​មាន​អ្នកនយោបាយ​ខ្លះ​នឹងធ្វើ​គ្រប់បែបយ៉ាង​ដើម្បី​បាន​ជាប់ឆ្នោត​។ លោក​បញ្ជាក់ថា អ្នកនយោបាយ​នោះ​នឹងធ្វើ​គ្រប់បែបយ៉ាង រួមទាំង​ចាត់ទុក​ចិន​ជាស​ត្រូវ​ផងដែរ​។ ទោះជា​យ៉ាងណា អ្នកការទូត​រូបនេះ​ផ្ញើ​សារ​ទៅ​អាមេរិក​វិញ​ថា ចិន​មិនមែនជា​សត្រូវ​អាមេរិក​ឡើយ តែ​ចិន​ជា​មិត្ត និង​ជា​ដៃគូ​។​
 
​ការលើកឡើង​របស់​ទូ​ត​ចិន​នេះ ធ្វើឡើង​ក្នុង​កាលៈទេសៈ​ដែល​ទំនាក់ទំនង​រវាង​ប្រទេស​ទាំង​២ មាន​កាន់តែ​ធ្លាក់​ដុនដាប​ទៅ បន្ទាប់ពី​អាមេរិក​បាន​បញ្ជា​ឲ្យ​ចិន​បិទ​ស្ថាន​កុងស៊ុល​នៅ​ហ៊ូ​ស្តុ​ន និង​ជាការ​តប​ចិន​បាន​បញ្ជា​ឲ្យ​អាមេរិក​បិទ​ស្ថាន​កុងស៊ុល​នៅ​ឆឹង​ទូ​។​
 
​ប្រភពព័ត៌មាន​ខាងលើ​ផ្សាយ​ថា ទោះជា​យ៉ាងណា លោក Liu ជឿថា ទំនាក់ទំនង​របស់​ប្រទេស​ទាំង​២ មិនទាន់​ដល់​កម្រិត​ដែល​មិនអាច​ត្រឡប់​រក​សភាព​ដើម​បានឡើយ​៕
 
 

© រក្សាសិទ្ធិដោយ thmeythmey.com