ជាតិ
«បាភ្នំ» ជារមណីយដ្ឋានធម្មជាតិ និងជាទីគោរពសក្ការរបស់អ្នកស្រុកបាភ្នំ
×![]()
«បាភ្នំ» ជារមណីយដ្ឋានធម្មជាតិមិនទាន់កែច្នៃ និងជាគោលដៅទេសចរណ៍មួយកន្លែងដែលស្ថិតនៅឃុំឈើកាច់ ស្រុកបាភ្នំ ក្នុងខេត្តព្រៃវែង ដែលមានសម្រស់ស្រស់ស្អាត និងជាទីកន្លែងសក្ការរបស់អ្នកស្រុកនៅទីនោះ។ នៅលើទំព័រហ្វេសប៊ុករបស់ក្រសួងបរិស្ថានបានបញ្ជាក់ថា បាភ្នំត្រូវបានចុះនៅក្នុងបញ្ជីសារពើភណ្ឌសម្បត្តិបេតិកភណ្ឌជាតិ កាលពីថ្ងៃទី២០ ខែវិច្ឆិកា ឆ្នាំ២០១៨។
បើតាមក្រសួងបរិស្ថានដដែល នៅខាងលើភ្នំនេះ មានចេតិយ ខ្ទមអ្នកតា ទួលភ្នៀស និងល្អាង តជាប់គ្នាជាជួរ ដែលអ្នកស្រុកនៅទីនោះមានជំនឿថា គឺជាទីកន្លែងដែលមានបារមី ស័ក្ដសិទ្ធិសម្រាប់ការបន់ផ្សងផ្សេងៗ។ លើសពីនេះ នៅក្បែរបាភ្នំ មានទួលមួយកន្លែងដែលមានរឿងព្រេងដំណាលថា ជាកន្លែងដែលនេនទុំលាចាកសិក្ខាបទ ដែលមានទីតាំងស្ថិតនៅក្នុងបរិវេណវត្តវិហារធំ។ ក្រៅពីនេះក៏មានទួលអ្នកតា និងព្រះវិហារមួយចំនួនទៀតដែលអ្នកស្រុកមានជំនឿ និងគោរពបូជា។
នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅបន្តរបស់ខេត្ត កាលពីថ្ងៃទី៩ ខែកក្កដា ឆ្នាំ២០២០កន្លងទៅ លោក ជា សុមេធី អភិបាលខេត្តព្រៃវែង លើកឡើងថា៖ «នៅក្នុងខេត្តព្រៃវែងមានតំបន់ទេសចរណ៍ចំនួន៧កន្លែង ដែលក្នុងនោះរមណីយដ្ឋានប្រវត្តិសាស្ត្រមាន១កន្លែង រមណីយដ្ឋានវប្បធម៌ចំនួន៣កន្លែង និងរមណីយដ្ឋានធម្មជាតិមាន៣កន្លែង។»
លោក ជា សុមេធី បានបញ្ជាក់ទៀតថា កាលពីឆ្នាំ២០១៩កន្លងមក ខេត្តនេះទទួលបានភ្ញៀវទេសចរសរុប ៥២ម៉ឺន៧ពាន់៩១៦នាក់ ដែលក្នុងនោះភ្ញៀវទេសចរជាតិមានចំនួន៥២ម៉ឺន៤ពាន់២៣៤នាក់ និងភ្ញៀវទេសចរអន្តរជាតិមានតែ៣,៦៨២នាក់ទេ៕
លោក ជា សុមេធី បានបញ្ជាក់ទៀតថា កាលពីឆ្នាំ២០១៩កន្លងមក ខេត្តនេះទទួលបានភ្ញៀវទេសចរសរុប ៥២ម៉ឺន៧ពាន់៩១៦នាក់ ដែលក្នុងនោះភ្ញៀវទេសចរជាតិមានចំនួន៥២ម៉ឺន៤ពាន់២៣៤នាក់ និងភ្ញៀវទេសចរអន្តរជាតិមានតែ៣,៦៨២នាក់ទេ៕
© រក្សាសិទ្ធិដោយ thmeythmey.com
