អន្តរជាតិ
ម៉ាឡេស៊ី ប្រាប់ប្រមុខ UN ពីអនីត្យានុកូលភាពរបស់ចិនក្នុងសមុទ្រចិនខាងត្បូង
×![]()
រដ្ឋាភិបាលម៉ាឡេស៊ី បានធ្វើកំណត់ទូតផ្លូវការមួយទៅកាន់អគ្គលេខាធិការដ្ឋានអង្គការសហប្រជាជាតិ (UN) ពីជំហររបស់ម៉ាឡេស៊ីលើតំបន់មានវិវាទសមុទ្រចិនខាងត្បូង។ ម៉ាឡេស៊ី បានប្រាប់អង្គការសហប្រជាជាតិអំពីសកម្មភាពខុសច្បាប់ (អនីត្យានុកូលភាព) របស់ចិន នៅក្នុងតំបន់សមុទ្រចិនខាងត្បូង ដែលម៉ាឡេស៊ី និងបណ្តាសមាជិកអាស៊ានផ្សេងទៀត មានសិទ្ធិគ្រប់គ្រង តែត្រូវបានចិនបំពាន។
រដ្ឋាភិបាលរបស់លោកនាយករដ្ឋមន្ត្រី Muhyiddin Yassin នៅថ្ងៃទី២៩ ខែកក្កដាកន្លងទៅ បានធ្វើកំណត់ទូតមួយ ទៅកាន់អគ្គលេខាធិការអង្គការសហប្រជាជាតិ លោក Antonio Guterres ដោយបានជំទាស់ការទាមទាររបស់រដ្ឋាភិបាលចិនលើតំបន់ស្ទើរតែទាំងស្រុងនៃសមុទ្រចិនខាងត្បូងតាមសិទ្ធិប្រវត្តិសាស្ត្រ ឬសិទ្ធិអធិបតេយ្យរបស់ខ្លួន។ នេះបើយោងតាមការចុះផ្សាយរបស់សារព័ត៌មាន South China Morning Post។
តាមរយៈកំណត់ទូតនោះ ម៉ាឡេស៊ី បានកត់សម្គាល់ថា ការទាមទាររបស់ចិនបានផ្ទុយទៅនឹងអនុសញ្ញាស្តីពីច្បាប់សមុទ្ររបស់អង្គការសហប្រជាជាតិ ហើយក្នុងជំហររដ្ឋាភិបាលម៉ាឡេស៊ី ការទាមទារលើតំបន់ពាក់ព័ន្ធក្នុងសមុទ្រចិនខាងត្បូងរបស់ចិន យោងតាមច្បាប់អន្តរជាតិ មិនមាននីត្យានុកូលភាពនោះទេ។ នេះតាមប្រភពព័ត៌មានដដែលខាងលើ។
ទោះបីជាជំហរនេះ មិនមែនជារឿងថ្មីរបស់ម៉ាឡេស៊ី និងសម្រាប់បញ្ហាសមុទ្រចិនខាងត្បូងក៏ដោយ នេះ គឺជាកំណត់ទូតដែលផ្ញើទៅកាន់អគ្គលេខាធិការអង្គការសហប្រជាជាតិ។ ពោលគឺ នេះ គឺជាលិខិតផ្លូវការមួយ ដែលអាចជាផ្នែកមួយសម្រាប់ដាក់សម្ពាធ និងទម្លាក់មុខមាត់រដ្ឋាភិបាលចិន ក្នុងវេទិកាអន្តរជាតិ ជាពិសេសនៅក្នុងវេទិកាអង្គការសហប្រជាជាតិ ដែលចិន គឺជាសមាជិកដ៏មានឥទ្ធិពលមួយស្រាប់នៅទីនោះ។
អ្វីដែលគួរកត់សម្គាល់នោះ នៅខែចុងខែឧសភាកន្លងទៅ ឥណ្ឌូណេស៊ី បានធ្វើកំណត់ទូតស្រដៀងគ្នានេះ ទៅកាន់អគ្គលេខាធិការអង្គការសហប្រជាជាតិផងដែរ។ ពេលនោះ ឥណ្ឌូណេស៊ី បានប្រកាសខ្លួនថាមិនមែនជាភាគីជម្លោះសមុទ្រចិនខាងត្បូងនោះទេ តែឥណ្ឌូណេស៊ី បានប្រាប់ភាគីចិនកុំឲ្យលូកលាន់ក្នុងអធិបតេយ្យខ្លួន ដែលជាផ្នែកមួយនៃសមុទ្រចិនខាងត្បូងរបស់ឥណ្ឌូណេស៊ី។ ឥណ្ឌូណេស៊ី ក៏បានទទូចឲ្យចិនគោរពច្បាប់អន្តរជាតិ និងសាលក្រមសមុទ្រចិនខាងត្បូងឆ្នាំ២០១៦ផងដែរ។
គួរជម្រាបផងដែរថា សមុទ្រចិនខាងត្បូង គឺជាដែនសមុទ្រមួយដែលមានជាប់វិវាទរវាងរដ្ឋអាស៊ាន និងចិន។ រដ្ឋអាស៊ាន ដែលរួមមានព្រុយណេ ម៉ាឡេស៊ី ហ្វីលីពីន និងវៀតណាម បានទាមទារគ្រប់គ្រងតំបន់មួយចំនួនក្នុងសមុទ្រចិនខាងត្បូងតាមច្បាប់អន្តរជាតិ ខណៈ បានទាមទារស្ទើរតែទាំងស្រុងនៃតំបន់វិវាទនេះ ច្បាប់អន្តរជាតិ។
តាមការទាមទារតំបន់ត្រួតលើគ្នា ហើយប្រើប្រាស់ប្រភពភ័ស្តុតាងផ្ទុយគ្នានេះ ធ្វើឲ្យវិវាទអធិបតេយ្យ នៅតែបន្តគ្មានយន្តការដោះស្រាយមួយជាក់លាក់ និងជាញឹកញាប់មានការប្រឈមមុខផ្នែកការទូតដាក់គ្នា៕
Tag:
ចិន
ម៉ាឡេស៊ី
សមុទ្រចិនខាងត្បូង
© រក្សាសិទ្ធិដោយ thmeythmey.com
