​សំណង់​អគារ និង​វត្ត​បុរាណ មាន​ចំណែក​ទាក់ទាញ​ទេសចរ​ទៅកាន់​ក្រុង​បាត់ដំបង​
ជាតិ
​សំណង់​អគារ និង​វត្ត​បុរាណ មាន​ចំណែក​ទាក់ទាញ​ទេសចរ​ទៅកាន់​ក្រុង​បាត់ដំបង​
02, Aug 2020 , 10:59 pm        
រូបភាព
​បាត់ដំបង​៖ ស្ថាបត្យកម្ម​សំណង់​អគារ​សល់​ពី​សម័យ​បារាំង និង​វត្ត​អារាម​ចំណាស់ៗ​ជាច្រើន គឺជា​ផ្នែក​ធំ​មួយ ទាក់ទាញ​ភ្ញៀវទេសចរ​ជាតិ និង​អន្តរជាតិ ឱ្យមក​កម្សាន្ត​ខេត្តបាត់ដំបង​។ នេះ​បើតាម​មន្ទីរ​ទេសចរណ៍​ខេត្តបាត់ដំបង​។​

 
​បើតាម​មន្ទីរ​ទេសចរណ៍​ខេត្ត សំណង់​ល្បីៗ​ដែល​សេសសល់​រហូតមកដល់​សព្វថ្ងៃ​មាន អតីត​អគារ​សាលាខេត្ត​បាត់ដំបង សាងសង់​ក្នុង​ឆ្នាំ​១៩០៥ និង​ស្ពាន​ចំណាស់​មូ​យ​កន្លែង​ដែល​ត្រូវបាន​សាងសង់​កាត់​ស្ទឹង​សង្កែ​នៅ​ឆ្នាំ​១៩១៧​។ ក្រៅពីនេះ​មាន​ផ្សារណាត់ ផ្ទះ​លក់ទំនិញ​ជាច្រើន​ត្រូវបាន​សាងសង់​ជា​ល្វែង​ខណ្ឌ ផ្ដាច់​ពីគ្នា​ដោយ​ផ្លូវ​កាត់​ទទឹង និង​វត្ត​អារាម​ដទៃ​ជាច្រើន​ទៀត​។​


 
​ក្រៅតែពី​សំណង់​បេតិកភណ្ឌ​ទាំងនេះ ក្រុង​បាត់ដំបង មាន​សារមន្ទីរ ដែល​ដាក់តាំង​បង្ហាញ​វត្ថុ​សិល្បៈ សិលា​ចារិក ព្រះ​បដិមាករ និង​បំណែក​ថ្ម​ផ្សេងៗ ដែល​សេសស់​តាំងពី​សម័យ​បុរេប្រវត្តិ​រហូតដល់​សម័យអង្គ​រ និង​បើក​ឱ្យ​សាធារណជន​ចូល​ទស្សនា​ដោយ​ឥតគិតថ្លៃ​។ នេះ​បើតាម មន្ទីរ​ទេសចរណ៍​។ 


 
​ទោះបី​សម្បូរ​ដោយ​ទីតាំង​ទេសចរណ៍វប្បធម៌ និង​បេតិកភណ្ឌ​ក៏ដោយ វិបត្តិ​កូ​វីដ​-១៩ បាន​រំខាន​ដំណើរ​កម្សាន្ត​របស់​អ្នកទេសចរ​ទៅកាន់​ខេត្ត​មួយ​នេះ​។ លោកស្រី ចឹក សុ​ភ័​ក្រ ប្រធានការិយាល័យ​រម​ណី​យ​ដ្ឋា​ន​ទេសចរណ៍​ប្រចាំខេត្ត​បាត់ដំបង បាន​ប្រាប់​សារព័ត៌មាន​ថ្មីៗ ២៥​តាម​ទូរ​សព្ទ​ថា ការធ្លាក់ចុះ​ភ្ញៀវទេសចរ​យ៉ាងគំហុក ធ្វើ​ឲ្យ​ប៉ះពាល់​ដល់​ពលរដ្ឋ​មួយចំនួន​ដែល​ពឹងផ្អែក​ទាំងស្រុង​លើ​វិស័យ​ទេសចរណ៍​ដែរ​។  


 
​គួរបញ្ជាក់​ផងដែរ​ថា ខេត្តបាត់ដំបង គឺជា​ខេត្ត​សក្ដានុពល​ទេសចរណ៍​មួយ ក្នុងចំណោម​ខេត្ត​ជាច្រើន​ទៀត​ដូចជា​សៀមរាប ព្រះសីហនុ កំពត​ជាដើម​។ ខេត្ត​នេះ មាន​តំបន់​ទេសចរណ៍​សរុប​៥២​កន្លែង បែង​ចែកចេញជា​តំបន់​ទេសចរណ៍ធម្មជាតិ តំបន់​ទេសចរណ៍​បែប​កែឆ្នៃ និង​តំបន់​ទេសចរណ៍​បែប​ប្រវត្តិសាស្ត្រ​៕





Tag:
 ទេសចរណ៍ បាត់ដំបង​
© រក្សាសិទ្ធិដោយ thmeythmey.com