ជាតិ
ពលរដ្ឋម្នាក់ភូមិភាគឦសានចិញ្ចឹមឃ្មុំ រហូតដល់រកបានទីផ្សារនៅជប៉ុន
× លោក ធូ តាំងហេង ជាកសិដ្ឋានទឹកឃ្មុំភូមិភាគឦសាន ដែលមានទីតាំងស្ថិតនៅស្រុកបរកែវ ខេត្តរតនគិរី។ រយៈពេល៦ឆ្នាំហើយ ដែលលោក តាំងហេង ចាប់ផ្តើមចិញ្ចឹមឃ្មុំ។ ម្ចាស់កសិដ្ឋានរូបនេះ បានប្រាប់សារព័ត៌មានThmeyThmey25 តាមទូរសព្ទថា នៅក្នុងរយៈពេល៣ឆ្នាំដំបូង លោកមិនបានជោគជ័យលើរបរនេះឡើយ ដោយសារតែលោកមិនទាន់យល់អស់ពីបច្ចេកទេសចិញ្ចឹម។ ទោះជាបរាជ័យច្រើនដង ប៉ុន្តែលោក តាំងហេង មិនបានបោះបង់របរដែលខ្លួនស្រឡាញ់នេះឡើយ។--
ធ្វើបណ្តើរ រៀនបណ្តើរ ទោះបរាជ័យ ក៏លោកចាត់ទុកវាជាពិសោន៍។ នេះបើតាមលោក តាំងហេង ដែលបានបន្តប្រាប់ Thmeythmey 25 ថាលោកបានបន្ថែមពីបច្ចេកទេសចិញ្ចឹមឃ្មុំនេះ តាមរយៈសារព័ត៌មាន និងបង្រៀនពីបច្ចេកទេសក្នុងការចិញ្ចឹមឃ្មុំពីក្រសួងកសិកម្ម រហូតធ្វើឲ្យលោកយល់ដឹងពីបច្ចេកទេសចិញ្ចឹមច្បាស់ និងទទួលបានលទ្ធផលល្អក្នុងការចិញ្ចឹមដូចបច្ចុប្បន្ន។
លោក ធូ តាំងហេង ម្ចាស់កសិដ្ឋានទឹកឃ្មុំភូមិភាគឦសាន
ជាទូទៅ លោកប្រមូលផលឃ្មុំនៅរដូវប្រាំង នៅខែមេសា និងខែឧសភា ដែលជាពេលទឹកឃ្មុំគុណភាពល្អ ហើយក៏មានតម្លៃខ្ពស់ផងដែរ។ នេះបើតាម លោក ធូ តាំងហេងដែលបានបន្តថា ក្នុងមួយឆ្នាំ កសិដ្ឋានចិញ្ចឹមឃ្មុំរបស់លោក អាចផលិតទឹកឃ្មុំបានពី ៥០ ទៅ ១០០តោន ហើយផ្គត់ផ្គង់នៅលើទីផ្សារស្រុក និងភាគច្រើននាំចេញទៅប្រទេសជប៉ុន ដែលលោកមានកុងត្រាជាមួយក្រុមហ៊ុនឯកជននៅទីនោះ។
ទឹកឃ្មុំរបស់កសិដ្ឋានទឹកឃ្មុំភូមិភាគឦសាន
ប៉ុន្តែនៅក្នុងឆ្នាំ២០២០នេះ វិបត្តិកូវីដ-១៩ ធ្វើឲ្យក្រុមហ៊ុននៅជប៉ុន បានផ្អាកទិញទឹកឃ្មុំ ពីកសិដ្ឋានលោកបណ្តោះអាសន្ន ដូច្នេះលោកផលិតសម្រាប់តែការផ្គត់ផ្គង់នៅក្នុងស្រុកតែប៉ុណ្ណោះ។ លោក ធូ តាំងហេង បញ្ជាក់ដូច្នេះ៖«ក្នុងអំឡុងពេលវិបត្តិកូវីដ-១៩ នេះបានធ្វើឲ្យក្រុមហ៊ុនជប៉ុនបានឲ្យកសិដ្ឋានលោក ផ្អាកបណ្ដោះអាសន្នក្នុងការផលិតទឹកឃ្មុំដើម្បីនាំចេញទៅជប៉ុនក៏ពិតមែន ប៉ុន្តែប្រជាជនកម្ពុជា ក៏ងាកមកប្រើផលិតផលក្នុងស្រុកច្រើនដែរ»។
រូបភាពពីកសិដ្ឋានទឹកឃ្មុំភូមិភាគឦសាន
ដ្បិតមិនបញ្ជាក់ពីចំណូលជាក់លាក់ដែលទទួលបានពីការចិញ្ចឹមឃ្មុំនេះ ប៉ុន្តែលោក ធូ តាំងហេង ថាទឹកឃ្មុំមានទីផ្សារល្អ ទោះចង្អៀតបន្តិច ខណៈដែលពលរដ្ឋខ្មែរ កាន់តែច្រើនងាកមកប្រើប្រាស់ ទឹកឃ្មុំដែលផលិតក្នុងស្រុក។ លោក ធូ តាំងហេង រំពឹងថា ទឹកឃ្មុំនៅកសិដ្ឋានរបស់លោក នឹងទទួលបានការបញ្ជាទិញកាន់តែច្រើន ហើយពេលនោះមកដល់ លោកនឹងពង្រីកការចិញ្ចឹមដែរ ដើម្បីផ្គត់ផ្គង់ឲ្យគ្រប់តម្រូវការ៕
© រក្សាសិទ្ធិដោយ thmeythmey.com