ប្រយុទ្ធវ័យក្មេងរបស់បឹងកេត ម៉ាត់ នូរុណ បង្ហាញភាពលេចធ្លោគួរឲ្យចាប់អារម្មណ៍ តាមរយៈការរកគ្រាប់បាល់បានជាបន្តបន្ទាប់សម្រាប់ការបង្ហាញខ្លួនប៉ុន្មានប្រកួតចុងក្រោយនេះ។ ជាក់ស្តែងនាជំនួបក្របខណ្ឌមិត្តហ្វូនខេមបូឌានលីគជាមួយក្រុមអគ្គិសនីកម្ពុជា រូបគេ សម្រេចបាន៣គ្រាប់ម្នាក់ឯង(Hat-Trick)ក្នុងជ័យជម្នះ ៤-២ របស់បឹងកេត។ ក្រុមព្រះខ័នរាជស្វាយរៀងបន្តគ្រងកំពូលតារាងប្រចាំសប្តាហ៍ទី១០ ជាមួយកំណត់ត្រាមិនទាន់ស្គាល់ចាញ់។
ខ្សែប្រយុទ្ធ ម៉ាត់ នូរុណ រកបាន៣គ្រាប់ម្នាក់ឯង ជួយឲ្យបឹងកេតយកឈ្នះអគ្គិសនីកម្ពុជា ៤-២ នាជំនួបសប្តាហ៍ទី១០ពានរង្វាន់ក្របខណ្ឌមិត្តហ្វូនខេមបូឌានលីគ។ ជ័យជម្នះនេះ ជួយឲ្យបឹងកេតបន្តឈរលេខរៀងទី២មាន២៣ពិន្ទុ ពោលគឺចាញ់ក្រុមកំពូលតារាងព្រះខ័នរាជស្វាយរៀងតែពីរពិន្ទុប៉ុណ្ណោះ។
នាការប្រកួតនៅកីឡដ្ឋានអគ្គិសនីកម្ពុជាកាលពីថ្ងៃអាទិត្យ ទី២ សីហា ឆ្នាំ២០២០ ខ្សែប្រយុទ្ធ ម៉ាត់ នូរុណ បានរកគ្រាប់បាល់នាំមុខ ១-០ ឲ្យភ្ញៀវបឹងកេតនៅ១៥នាទីដំបូងក្នុងតង់ទី១។ ការប្រកួតដំណើរការបានជាង១០នាទីកីឡាករ ចន្ថា ចន្ធាកា បានសម្រេចគ្រាប់បាល់តាមស្មើ ១-១ ឲ្យម្ចាស់ផ្ទះអគ្គិសនីកម្ពុជា ដែលធ្វើឲ្យការប្រកួតកាន់តែមានភាពទាក់ទាញ។
ឈានដល់នាទី៣៥កីឡាករ សៀន សុភក្ត្រា បន្ថែម១គ្រាប់ទៀត ដើម្បីបង្កើនការនាំមុខ ២-១ សម្រាប់ក្រុមម្ចាស់ផ្ទះ។ លទ្ធផលនេះបានរក្សារហូតចប់ការប្រកួតតង់ទី១។ ការប្រកួតតង់ទីពីរដំណើរការមិនបាន១នាទីស្រួលបួលផងខ្សែប្រយុទ្ធវ័យក្មេង សៀង ចន្ធា សម្រេចបានគ្រាប់បាល់តាមស្មើ ២-២ ឲ្យភ្ញៀវបឹងកេត។ បន្ទាប់មកខ្សែប្រយុទ្ធ ម៉ាត់ នូរុណ បន្ថែមពីរគ្រាប់ជាបន្តបន្ទាប់នៅនាទី៥៦ និង៦៦ ដើម្បីបង្កើនការនាំមុខ ៤-២ សម្រាប់បឹងកេត។ ក្រុមទាំងពីរបានរក្សាលទ្ធផលនេះរហូតចប់ការប្រកួត។
ដោយឡែក ក្រុមព្រះខ័នរាជស្វាយរៀងបានបន្តបង្ហាញភាពខ្លាំងរបស់ខ្លួន តាមរយៈការបន្តគ្រងកំពូលតារាងប្រចាំសប្តាហ៍ទី១០ជាមួយកំណត់ត្រាមិនទាន់ស្គាល់ចាញ់៩ប្រកួតជាប់គ្នា។ ការបន្តឈរកំពូលតារាងរបស់ក្រុមមានមូលដ្ឋាននៅខេត្តស្វាយរៀង ធ្វើឡើងក្រោយពួកគេយកឈ្នះក្រុមវិសាខា ៣-២ នៅលើទឹកដីខ្លួនកាលពីថ្ងៃអាទិត្យ ទី២ សីហា ឆ្នាំ២០២០។
នាការប្រកួតដែលធ្វើឡើងនៅកីឡដ្ឋានខេត្តស្វាយរៀង កីឡាករ Mihaljevic Filip បានទាត់ប៉េណាល់ទីបានសម្រេចដើម្បីនាំមុខ ១-០ សម្រាប់ភ្ញៀវវិសាខានៅនាទី៣៨។ ក្រុមទាំងពីរបានរក្សាលទ្ធផលនេះ រហូតចប់តង់ទី១។ ឈានដល់តង់ទីពីរកីឡាករ Jean Marie Privat បានរកគ្រាប់បាល់តាមស្មើ ១-១ ឲ្យក្រុមម្ចាស់ផ្ទះនៅនាទី៧៤។ ៤នាទីក្រោយមកកីឡាករ Kobayashi Daisuke បន្ថែម១គ្រាប់ទៀតសម្រាប់ម្ចាស់ផ្ទះ។
នៅនាទីទី៨៣កីឡាករ Mihaljevic Filip សម្រេចបានគ្រាប់ទីពីររបស់ខ្លួន ដើម្បីតាមស្មើ ២-២ ឲ្យក្រុមភ្ញៀវវិសាខា។ ប៉ុន្តែ៥នាទីក្រោយមកខ្សែប្រយុទ្ធ Jean Marie Privat រកបានមួយទៀត ដើម្បីមុខ ៣-២ សាជាស្មីសម្រាប់ម្ចាស់ផ្ទះ។ ក្រុមទាំងពីរបានរក្សាលទ្ធផលនេះរហូតចប់ការប្រកួត។ បរាជ័យនេះ ធ្វើឲ្យវិសាខាធ្លាក់ពីលេខរៀងទី៣មកឈរលេខរៀងទី៤បណ្តោះអាសន្នដោយរក្សា១៩ពិន្ទុ។
ខ្សែប្រយុទ្ធ ម៉ាត់ នូរុណ (អាវស) ព្យាយាមគ្រប់គ្រងបាល់ពីការដណ្តើមរបស់កីឡាករអគ្គិសនីកម្ពុជា
សម្រាប់ការប្រកួតនៅថ្ងៃអាទិត្យនោះដែរ ក្រុមអគ្គស្នងការដ្ឋាននគរបាលជាតិចែកគ្នាម្នាក់១ពិន្ទុជាមួយយុវជនអាយុក្រោម១៨ឆ្នាំបាទី ក្រោយពួកគេរក្សាលទ្ធផលស្មើ ១-១ រហូតចប់ការប្រកួត។
ដោយឡែកការប្រកួតកាលពីថ្ងៃសៅរ៍ ទី១ ខែសីហា ឆ្នាំ២០២០ ក្រុមណាហ្គាវើលបានយកឈ្នះអាស៊ីអឺរ៉ុបក្នុងលទ្ធផល ៤-២។ ជ័យជម្នះនេះជួយឲ្យណាហ្គាវើលរំកិលចំណាត់ថ្នាក់ពីលេខរៀងទី៥ឡើងមកឈរលេខរៀងទី៣បណ្តោះអាសន្ន ដោយមាន២១ពិន្ទុ។ ចំណែកម្ចាស់ផ្ទះភ្នំពេញក្រោនបានចែកគ្នាម្នាក់១ពិន្ទុជាមួយសូលទីឡូអង្គរ ក្រោយពួកគេទាំងពីររក្សាលទ្ធផលស្មើ ២-២ នៅកីឡដ្ឋាន Smart R.S.N។ ចំណែកការប្រកួតនៅកីឡដ្ឋានគីរីវង់សុខសែនជ័យ ក្រុមកងយោធពលខេមរភូមិន្ទ បានយកឈ្នះម្ចាស់ផ្ទះគីរីវង់សុខសែនជ័យ ១-០។ ក្នុងការប្រកួតនោះដែរអ្នកចាំទី គង់ រ៉ាហ្វាត់ ត្រូវបានរថយន្តពេទ្យដឹកយកទៅសង្គ្រោះភ្លាមៗនៅមន្ទីរពេទ្យ ក្រោយត្រូវមួយកែងរបស់កីឡាករកងយោធពលខេមរភូមិន្ទ៕