អភិបាលខេត្តព្រះសីហនុ អំពាវនាវឲ្យពលរដ្ឋជៀសវាងការធ្វើដំណើរតាមផ្លូវទឹក

ជាតិ

អភិបាលខេត្តព្រះសីហនុ អំពាវនាវឲ្យពលរដ្ឋជៀសវាងការធ្វើដំណើរតាមផ្លូវទឹក

03, Aug 2020 , 3:12 pm

រូបភាព

សកម្មភាពលោក គួច ចំរើន ចុះពិនិត្យស្ថានភាពទឹកក្នុងក្រុងព្រះសីហនុថ្ងៃទី៣ សីហា ២០២០។ (រូបពីទំព័រហ្វេសប៊ុករបស់លោក គួច ចំរើន)

ដោយ: ឡាយ សុភាវតី

ភ្នំពេញ៖ លោក គួច ចំរើន អភិបាលខេត្តព្រះសីហនុ អំពាវនាវឲ្យពលរដ្ឋប្រុងប្រយ័ត្ននិងជៀសវាងការធ្វើដំណើរតាមផ្លូវទឹក ខណៈដែលភ្លៀងនៅតែបន្តធ្លាក់។ ការអំពាវនាវនេះ ធ្វើឡើងក្រោយពីមានករណីទូកទេសចរណ៍មួយគ្រឿងបានលិចកាលពីរសៀលថ្ងៃទី១សីហា នៅក្រុងកោះរ៉ុង ខេត្តព្រះសីហនុ។

នៅព្រឹកថ្ងៃទី៣ សីហា អភិបាលខេត្តព្រះសីហនុបានសរសេរលើទំព័រហ្វេសប៊ុកថា៖ «ព្យុះ ភ្លៀង ខ្យល់ រលក នៅបន្តគ្រោះថ្នាក់ធ្ងន់ធ្ងរនៅឡើយ ។ សូមប្រជាជនយើង និងភ្ញៀវទេសចរ មេត្តាចូលរួមប្រងប្រយ័ត្ន និងកុំធ្វើដំណើរ តាមទូកកាណូត ឬផ្លូវទឹក ព្រោះខ្លាចមានគ្រោះថ្នាក់»។

ការអំពាវនាវដល់ពលរដ្ឋបែបនេះ គឺធ្វើឡើងក្រោយពីទូកទេសចរណ៍មួយគ្រឿងបានលិចនៅកោះរ៉ុង ដោយសារបញ្ហាអាកាសធាតុ ធ្វើឲ្យមានរលកបោកខ្លាំងទើបបណ្ដាលឲ្យបែកក្ដារទូក។ ប៉ុន្តែអាជ្ញាធរខេត្តព្រះសីហនុនិងខេត្តកោះកុងបានសហការគ្នា ជួយសង្គ្រោះទាន់ពេល ពុំមានអ្នករងរបួសនិងបាត់បង់ជីវិតឡើយ។ នេះបើតាមការបញ្ជាក់របស់លោក ឃាង ភារម្យថ្លែងប្រាប់សារព័ត៌មានថ្មីៗ។

ករណីលិចទូកនោះស្ថិតនៅចំណុចក្បែរច្រាំងភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ កាលពីថ្ងៃទី១ ខែសីហា ឆ្នាំ២០២០ ដោយជនរងគ្រោះចំនួន១៥នាក់ ក្នុងនោះមានស្រីចំនួន៨នាក់ និងបុរស៧នាក់ ត្រូវបានជួយសង្គ្រោះដោយទូកនេសាទត្រី ហើយបានដឹកទៅកាន់មន្ទីរពេទ្យខេត្តព្រះសីហនុ ដើម្បីតាមដានសុខភាព។

បើតាមក្រសួងធនធានទឹក និងឧតុនិយម ព្យុះទីបីឈ្មោះស៊ីនឡាគូ មានប្រភពមកពីសមុទ្រចិនខាងត្បូងនឹងបោកបក់កាត់ប្រទេសកម្ពុជា ដែលនឹងធ្វើឱ្យមានភ្លៀងធ្លាក់ច្រើន និងខ្យល់បោកបក់ខ្លាំង។

ជាមួយគ្នានេះដែរ រដ្ឋបាលខេត្តព្រះសីហនុក៏បានចេញសេចក្ដីជូនដំណឹងដែរថា ស្ថានភាពអាកាសធាតុនៅខេត្តព្រះសីហនុ ចាប់ពីថ្ងៃទីថ្ងៃទី១ ដល់ថ្ងៃទី៥ ខែសីហា ឆ្នាំ២០២០នេះ នឹងមានភ្លៀងធ្លាក់ច្រើនហើយអាចប្រឈមខ្ពស់នឹងជំនន់ទឹកភ្លៀង រួមជាមួយនឹងខ្យល់បក់បោកខ្លាំង និងរលកសមុទ្រខ្ពស់។

អាជ្ញាធរខេត្តបានអំពាវនាវដល់ម្ចាស់ក្រុមហ៊ុនដឹកជញ្ជូនដោយជលយាន ភ្ញៀវទេសចរ ប្រជាពលរដ្ឋ និងប្រជានេសាទទាំងអស់ សូមមានការប្រុងប្រយ័ត្នខ្ពស់ ហើយផ្អាកធ្វើដំណើរតាមសមុទ្រប្រសិនបើគ្មានការចាំបាច់៕

ចាប់ពីថ្ងៃទី១ ដល់ថ្ងៃទី៥ ខែសីហានេះ កម្ពុជាកំពុងរងឥទ្ធិពលព្យុះស៊ីនឡាគូ ដែលមានប្រភពមកពីសមុទ្រចិនខាងត្បូង។ ព្យុះនេះនឹងបោកបក់មកលើប្រទេសកម្ពុជា ធ្វើឱ្យស្ថានភាពអាកាសធាតុនៅទូទាំងប្រទេស មានភ្លៀងធ្លាក់ខ្លាំង និងអាចមានជំនន់ទឹកភ្លៀងផងដែរ។ នេះបើតាមសេចក្ដីប្រកាសព័ត៌មាន របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី១ ខែសីហា ឆ្នាំ ២០២០៕