អត្ថបទពាណិជ្ជកម្ម
ដាប់ប៊ែលយូប៊ី ហ្វាយនែន និង លី ហួរ ផេប្រ៉ូ ចុះអនុស្សរណៈយោគយល់នៃការសហការគ្នាជាផ្លូវការ លើសេវាហិរញ្ញវត្ថុទូទាត់កម្ចីសម្រាប់អតិថិជន
×![]()
ដោយ: សារព័ត៌មានថ្មីៗ
រាជធានីភ្នំពេញ ថ្ងៃទី៣ ខែសីហា ឆ្នាំ២០២០៖ ដាប់ប៊ែលយូប៊ី ហ្វាយនែន ដែលជាគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើឈានមុខគេមួយនៅកម្ពុជា និងក្រុមហ៊ុន លី ហួរ ផេប្រ៉ូ (លីហួរ វេរលុយ) ដែលជាក្រុមហ៊ុនផ្តល់សេវាទូទាត់ប្រាក់ ដ៏ធំមួយនៅកម្ពុជា បានចុះហត្ថលេខាលើអនុស្សរណៈយោគយល់ នៃការសហការគ្នាជាផ្លូវការ ដែលនឹងអនុញ្ញាតឱ្យអតិថិជនទាំងអស់របស់ ដាប់ប៊ែលយូប៊ី ហ្វាយនែន ទូទាត់ប្រាក់កម្ចីប្រកបដោយភាពងាយស្រួល តាមរយៈភ្នាក់ងារ លីហួរ វេរលុយ ទូទាំងប្រទេសដោយមិនគិតកម្រៃសេវា។
លោក គីម ស៊ុនឃ្យូ អគ្គនាយកប្រតិបត្តិ ដាប់ប៊ែលយូប៊ី ហ្វាយនែន បានមានប្រសាសន៍ថា៖ “ដាប់ប៊ែលយូប៊ី ហ្វាយនែន ប្តេជ្ញាអភិវឌ្ឍន៍សេវាហិរញ្ញវត្ថុ ឱ្យកាន់តែមានភាពងាយស្រួលបន្ថែមទៀត សម្រាប់អតិថិជន តាមរយៈការផ្តល់នូវជម្រើសសម្បូរបែប ក្នុងការធ្វើប្រតិបត្តិការហិរញ្ញវត្ថុ និងដើម្បីបំពេញតម្រូវការរបស់អតិថិជន បានកាន់តែប្រសើរ។ ភាពជាដៃគូនេះ បានពង្រឹង និងពង្រីកបណ្តាញទូទាត់ប្រាក់កម្ចី ឱ្យកាន់តែមានភាពងាយស្រួល និងមានសុវត្ថិភាពសម្រាប់អតិថិជនរបស់ ដាប់ប៊ែលយូប៊ី ហ្វាយនែន។ ក្រៅពីការទូទាត់ប្រាក់កម្ចី តាមរយៈបណ្តាយសាខាទាំង ១៣៦ ទូទាំងប្រទេស សេវាធនាគារចល័ត និងភាគីដៃគូដទៃទៀត។ យើងកំពុងរង់ចាំការចាប់ផ្តើមធ្វើប្រតិបត្តិការសេវាហិរញ្ញវត្ថុ ជាមួយ លី ហួរ វេរលុយ ដែលនេះជាការផ្តល់នូវសេវាហិរញ្ញវត្ថុដ៏ប្រសើរមួយ ដល់អតិថិជនរបស់យើង។ យើងនឹងបន្តចាប់ដៃគូ លើកិច្ចសហប្រតិបត្តិការសេវាហិរញ្ញវត្ថុថ្មីៗបន្ថែមទៀត នាពេលខាងមុខ»។
ដោយឡែក លោក លី សុភាព ប្រធានក្រុមប្រឹក្សាភិបាលក្រុមហ៊ុន លី ហួរ វេរលុយ និងជាអនុប្រធានក្រុមហ៊ុន លីហួរ គ្រុប មានប្រសាសន៍ថា៖« លី ហួរ វេរលុយ គឺជាក្រុមហ៊ុនផ្ទេរប្រាក់ ដ៏ធំមួយនៅកម្ពុជា ដែលត្រូវបានបង្កើតឡើង នៅថ្ងៃទី២០ ខែមករា ឆ្នាំ២០១៦ ដោយឈរលើចក្ខុវិស័យ ច្បាស់លាស់ និងរឹងមាំ ដើម្បីជួយលើកកម្ពស់ជីវភាពប្រជាជនកម្ពុជា តាមរយៈការផ្តល់សេវាហិរញ្ញវត្ថុក្រៅប្រព័ន្ធធនាគារ មានដូចជា សេវាផ្ទេរប្រាក់ ដាក់ប្រាក់ ដកប្រាក់ បង់ទឹក បង់ភ្លើង សំរាម ប ស ស បញ្ចូលទឹកប្រាក់ក្នុងទូរសព្ទ ទូទាត់វិក្កយប័ត្រ សេវាបើកប្រាក់បៀវត្ស និងសេវាទូទាត់ជាច្រើនទៀត ជាមួយកម្រៃសេវាសមរម្យ»។
បើតាមលោក លី សុភាព លីហួរ វេរលុយ មានបំណងពង្រីកភ្នាក់ងារឱ្យបានចំនួន ១០.០០០ ទីតាំង នៅទូទាំងប្រទេស ក្នុងឆ្នាំ២០២១។ លើសពីនេះ ក្រុមហ៊ុន លី ហួរ វេរលុយ ក៏មានគម្រោងដាក់ឱ្យដំណើរការ កម្មវិធី លី ហួរ ផេ (APP) ដើម្បីឱ្យអតិថិជន និងអ្នកប្រើប្រាស់ដទៃទៀត មានជម្រើសសម្បូរបែប និងមានភាពងាយស្រួល ក្នុងកាប្រើប្រាស់សេវារបស់ខ្លួន តាមរយៈទូរសព្ទដៃផ្ទាល់ខ្លួន។
យោងតាមចក្ខុវិស័យ និងបេសកម្មនេះ ថ្នាក់ដឹកនាំជឿជាក់ថា លី ហួរ ផេប្រ៉ូ និង ដាប់ប៊ែលយូប៊ី ហ្វាយនែន នឹងសហការគ្នាលើផ្នែកដទៃទៀត នៃសេវាហិរញ្ញវត្ថុដែលខ្លួនមាន ក្នុងន័យជួយសន្សំសំចៃ នឹងផ្តល់ភាពងាយស្រួលជូនអតិថិជន។
ដើម្បីអបអរសាទរ ការចាប់ផ្តើមកិច្ចសហប្រតិបត្តិការភាពជាដៃគូនេះ អតិថិជនរបស់ ដាប់ប៊ែលយូប៊ី ហ្វាយនែន ដែលទូទាត់ប្រាក់កម្ចី តាមរយៈភ្នាក់ងារលី ហួរ វេរលុយ នឹងមានឱកាសឈ្នះរង្វាន់ទូរសព្ទស្មាតហ្វូន ជាច្រើនគ្រឿង រយៈពេលបីខែ ចាប់ពីខែសីហា រហូតដល់ ខែតុលា ឆ្នាំ ២០២០៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
