ដោយ៖ ហ៊ីម អ៊ឹមរ៉ន
ភ្នំពេញ៖ នៅ ចន្ទសេរីវុឌ្ឍ ជាកូនពៅ នៃគ្រួសារមួយដែលមានបងប្អូន ៣ នាក់ ហើយមានម្ដាយជាអាជីវករ រស់នៅខេត្តតាកែវ។ យុវជនរូបនេះ គឺជាអតីតសិស្សនិទ្ទេស A ឆ្នាំ ២០១៧ មកពីវិទ្យាល័យជាស៊ីមតាកែវ ខេត្តតាកែវ។ និស្សិតវ័យ ២០ឆ្នាំ រូបនេះ ធ្លាប់ជាជ័យលាភីលេខ ២ ផ្នៃកតែងកំណាព្យ ពានរង្វាន់ឯកឧត្តម ឧបនាយករដ្ឋមន្ត្រី សុខ អាន ក្នុងឆ្នាំ២០១៧ ផងដែរ។ បច្ចុប្បន្ន ចន្ទសេរីវុឌ្ឍ ជានិស្សិតដែលកំពុងសិក្សាថ្នាក់បរិញ្ញាបត្រភាសាបារាំង ឆ្នាំទី២ នៅដេប៉ាតេម៉ង់ភាសាបារាំង នៃវិទ្យាស្ថានភាសាបរទេស ក្នុងសាកលវិទ្យាល័យភូមិន្ទភ្នំពេញ។ ទន្ទឹមគ្នានេះ លោកក៏ជានិស្សិតដែលកំពុងសិក្សាផ្នែកច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចផងដែរ។
ភាសាបារាំង ជាភាសាមួយដែលយុជនខ្មែរភាគច្រើន មិនសូវចាប់អារម្មណ៍ ឬពេញនិយមច្រើន ដូចភាសាអង់គ្លេសឡើយ ប៉ុន្តែនិស្សិត ចន្ទសេរីវុឌ្ឍ នៅតែមានះរៀនភាសាមួយនេះឲ្យខាងតែបាន។ និស្សិតវ័យ២០ឆ្នាំរូបនេះ ប្រាប់សារព័ត៌មានថ្មីៗថា មូលហេតុដែលរូបគេនៅតែចចេសរៀនភាសាបារាំង ព្រោះរូបគេចូលចិត្តភាសានេះ តាំងពីក្មេង។ ម្យ៉ាងទៀត អ្នកចេះភាសាបារាំង នឹងមានទីផ្សារទូលំទូលាយ ហើយពុំសូវមានការប្រកួតប្រជែងច្រើននោះឡើយ ខណៈកម្ពុជា គឺជាសមាជិកប្រទេសអ្នកនិយាយភាសាបារាំង តាំងពីសម័យសង្គមរាស្ត្រនិយមមក។ សេរីវឌ្ឍក៏សង្កេតឃើញដែរថា កម្ពុជាមានឯកសារប្រវត្តិសាស្ត្រជាច្រើនជាភាសាបារាំង។ ក្រៅពីនេះ ជីតាដែលជាអតីតគ្រូបង្រៀនភាសាបារាំង និងបងប្រុស ក៏បានលើកទឹកចិត្ត និងជំរុញឲ្យ សេរីវុឌ្ឍ សិក្សាភាសាបារាំងដែរ។ ពួកគាត់ យល់ស្របថា ការៀនភាសាបារាំង អាចនឹងជួយចៅ និងប្អូនប្រុសរបស់ខ្លួន មានអនាគតល្អ។
អតីតសិស្សនិទ្ទេស A ឆ្នាំ ២០១៧ មកពីវិទ្យាល័យជាស៊ីមតាកែវរូបនេះ បានប្រាប់សារព័ត៌មានអេឡិចត្រូនិកថ្មីៗបន្ថែមទៀតជុំវិញការសម្រេចចិត្តរៀនភាសាបារាំងនេះ៖«ខ្ញុំមានបំណងបន្តការសិក្សាផ្នែកច្បាប់ នៅប្រទេសបារាំង ហើយវា [ភាសាបារាំង] ជាយានមួយ ដែលអាចឲ្យខ្ញុំស្គាល់ពិភពលោក នឹងមានការប្រាស្រ័យទាក់ទងជាមួយមនុស្ស បានកាន់តែច្រើនផងដែរ។»
ដ្បិតថា លោកមានបំណងយកភាសាបារាំង ត្រឹមជាយានដើម្បីបន្តការសិក្សាផ្នែកច្បាប់ នៅប្រទេសបារាំងក្ដី លោកបានជ្រើសយកការសិក្សាថ្នាក់បរិញ្ញាបត្រ ជាជាងការសិក្សាវគ្គខ្លី។ គេគិតថា ការរៀនវគ្គសិក្សាខ្លីនៅសាលាឯកជន អាចផ្ដល់ឲ្យខ្លួនបានត្រឹមតែភាសានិយាយ និងការទំនាក់ទំនងធម្មតាតែប៉ុណ្ណោះ។ តែសម្រាប់ភាសាបច្ចេកទេស ខ្លួនត្រូវការការសិក្សារថ្នាក់បរិញ្ញាបត្រ ដែលការសិក្សាមានលក្ខណៈស៊ីជម្រៅជាង ទាំង ពាក្យ វាក្យសព្ទ ប្រវត្តិសាស្ត្រ និងច្បាប់ជាដើម។
សម្រាប់ ចន្ទសេរីវុឌ្ឍ ការរៀនភាសាបារាំងមានឧបសគ្គច្រើន ដែលមានការទាមទារឲ្យខ្លួនអានព័ត៌មានផ្សេងៗជាច្រើន ដើម្បីធ្វើការស្រាវជ្រាវ។ ហើយចំណុចដែលមានមានការលំបាកខ្លាំងបំផុតសម្រាប់ខ្លួនគឺ ការអនុវត្តភាសា ព្រោះថា នៅកម្ពុជា សព្វថ្ងៃមិនសូវមានអ្នកនិយាយភាសាបារាំងច្រើនទេ។ ក្រៅពីនោះ ការរៀនភាសាបារាំង មានលក្ខណៈស្មុគស្មាញខ្លាំង ទាំងវេយ្យាករណ៍ និងពាក្យ ព្រោះថា នៅក្នុងភាសាបារាំង យើងត្រូវសម្គាល់ពាក្យដែលមានពីរភេទ និងការបំបែកកិរិយាសព្ទ សម្រាប់ប្រើប្រាស់ជាមួយសព្ទនាមផ្សេងៗគ្នាជាដើម។
តែយ៉ាងណាក៏ដោយ និស្សិតវ័យ ២០ឆ្នាំ រូបនេះ ក៏ទទួលបានភាពសប្បាយរីករាយខ្លះដែរ ពីការរៀនភាសាបារាំង។ ចន្ទសេរីវុឌ្ឍ រៀបរាប់ថា៖ «ខ្ញុំអាចស្វែងយល់វប្បធម៌បារាំងបានច្រើន ហើយវាមានភាពងាយស្រួល ក្នុងការស្រាវជ្រាវឯកសារប្រវត្តិសាស្ត្រ និងនយោបាយ ព្រោះថាភាគច្រើននៃឯកសាររបស់ខ្មែរ កាលពីសម័យដើម បានកត់ត្រាទុកជាភាសាបារាំង។»
ជាដំណោះស្រាយទៅនឹងបញ្ហាប្រឈមទាំងឡាយ យុវជនរូបនេះ បានព្យាយាមអស់ពីលទ្ធភាព ដើម្បីធ្វើយ៉ាងណា ឲ្យការសិក្សាររបស់ខ្លួនមានប្រសិទ្ធភាពល្អ។ ដ្បិតថាមិនសូវមានអ្នកនិយាយភាសាបារាំងច្រើននៅប្រទេសកម្ពុជាក្ដី ប៉ុន្តែរាល់ពេលទៅសាលា គេតែងតែព្យាយាមនិយាយជាភាសាបារាំង ជាមួយមិត្តភក្តិ។ សេរីវុឌ្ឍ ក៏មានទំនាក់ទំនង តាមរយៈបណ្ដាញសង្គមដូចជា Facebook និង Instagram ជាដើម ជាមួយមិត្តភក្កិជាជនជាតិបារាំង នៅឯបរទេសផងដែរ។
ថ្វីដ្បិតតែនៅក្នុងប្រទេសកម្ពុជា ភាសាដែរពេញនិយមជាងគេបន្ទាប់ពីភាសាខ្មែរ មានដូចជា ភាសាអង់គ្លេស និងភាសាចិនក៏ដោយ អតីតសិស្សនិទ្ទេស A រូបនេះ នៅតែមានគំនិតសុទិដ្ឋិនិយម សម្រាប់ទីផ្សារការងារសម្រាប់អ្នកចេះភាសាបារាំង។ ចន្ទសេរីវុឌ្ឍ លើកឡើងថា៖ «វាគឺជាការពិត ចំពោះការលើកឡើងថា ភាសាចិន និងភាសាអង់គ្លេស មានការរីកចម្រើនខ្លាំងនៅប្រទេសកម្ពុជាយើង តែទន្ទឹមនឹងការរីកចម្រើននេះ មនុស្សនឹងមានការចាប់អារម្មណ៍ខ្លាំង ហើយទីផ្សារការងារនិងមានការថយចុះ។ ដូច្នេះ ទីផ្សារនៃភាសាបារាំង នឹងនៅតែមិនមានការថយចុះ មិនថាក្នុង ឬក្រៅប្រទេសទេ ព្រោះកម្ពុជា មានកិច្ចសហប្រតិបត្តិការល្អជាមួយបារាំង ដែលតែងតែមានការផ្ដល់អាហាររូបករណ៍ជាច្រើនកន្លែង រៀងរាល់ឆ្នាំ។»
សម្រាប់ភាសាបរទស រូបគេគិតថា ភាសាបារាំងគឺមានសារសំខាន់មួយដែរ បន្ទាប់ពីភាសាអង់គ្លេស។ លំហូរនៃការនិយាយភាសាបារាំងមានច្រើន ដ្បិតភាសាបារាំង កំពុងស្ថិតនៅចំណាត់ថ្នាក់ទី ៣ នៃភាសាពេញនិយមជាងគេ លើពិភពលោក។ ម្យ៉ាងទៀត យុវជនដែលកំពុងសិក្សាភាសាបារាំងរូបនេះ បានសង្កត់ធ្ងន់ថា ភាសាបារាំង គឺមានសារៈសំខាន់សម្រាប់យុវជនកម្ពុជាដែរ ព្រោះថា ឯកសារប្រវត្តិសាស្ត្រខ្មែរជាច្រើន ត្រូវបានកត់ត្រាទុកជាភាសាបារាំង៕